¹ Ame ne nomutemo ghokukihuruka, mutemo gho mumuronga. ² Yira mutemo mumighunga noruhakitho rwange kwambuyama ghana. ³ Yira thitondo thombuyo mumuthitu, kemo ruhakitho rwange we muhakwa wange rokwawa ngaghu ghana. Nakuhungumana mumumbure wendi norumwemwe nombuyo dhendi ne ghutowi. ⁴ Ghani reta mundhugho dhovinyu nomapungwero ghendi kwange ne ruhakitho. ⁵ Nikorere me nothikuki thomandjembere noniyumbure mbuyo dho apulasi, yoyishi nomukorwi ghoruhakitho. ⁶ Dyoko dyendi dyorumoho ne pamutwi wange didi nodyoko dyendi dyorudyo ne kuni shambereritha. ⁷ Nakwedha mwe mwahana Jerusalem pafumbo nopayiruwana yomumapya eshi mbadi mupinduthe ruhakitho kate gharu tawedhere. ⁸ Diywi dyawange ghopamutjima! Mone, ghana kwiya ghureya marundu. ⁹ Muhakwa wange ne yira fumbo no aye ne ghanemana munyima dhoditete dyetu ghana kununguruka padikende dyondhugho. ¹⁰ Muhakwa wange ghaghambire ghuninga eshi; Wimane muhakwa wange shaghuwa, tuyende pofotji nange. ¹¹ Mone, kufu ne ghana pu nomvura ne ghapita. ¹² Mutemo ne dhina temuna; ruvedhe rokuveva thiwana yitondo norwimbo royinyunyi ne runa kokera notuna kuyuva edi ghana kughamba makutji. ¹³ Thitondo thoghukuyu ne thinapi thiwana noyitondo yomuthikwinino ne yina temuna mutemo dhomadimukitho ghombuyo; yina kureta thiwe mwene. Wimane muhakwa wange, owe shaghuwa nowiye nange. ¹⁴ Dikutji dyange, mumbirikatji dhodiwe nokudyango dyoghudhindo dyomarundu. Ninge nimone rupara roye. Ninge niyuve diywi dyoye, yoyishi diywi dyoye ne ditowi norupara roye ne ruwa shemwa. ¹⁵ Tu kwatere yishereka, eyi yina kwipitha yinyamo yetu yoyishi yina tanga kutemuna mitemo. ¹⁶ Muhakwa wange ne wange noname nowendi; aye ne ghana kughondhera mumitemo dhishaghuwa noyishamberera. ¹⁷ Kate dyuwa dishwaghe nomudhidhimbi ghushwaghe. Piruke muhakwa wange nokare yira fumbo padirundu dyaBether.