¹ Mudiyuwa dyomakumi mawadi nodiyuwa dyoghune ghokaghonda koko, ha-Esreali ne hapongire mukudhirerekedha hana shupata ghudjodjoro norukungu pamitwi dhagho. ² Ha-Esrealite hoshemwa ne hayakunukire kwawa mutundakure; Nohemanine noha tongononine maharwero ghagho nomurandu dhawa kerekandongo wagho. ³ Nohemanine pamango ghagho noha toyire muMbapira dhoMuragho waFumu ghoNyambi wagho munyima dhomaviri kwoko fotji mudiyuwa nokate munyima karo dhomaviri kwoko-fotji ne hatongononine nokukugha Fumu ghoNyambi wagho. ⁴ Ndani haJeshua, Bani, Kadmiel, Shebaniah, Bunni, Sherebiah, Bani, Chenani ne hemanine pawiru dhawa Levite noha kughererire noka kuwo kokakuru kwaFumu ghoNyambi wagho. ⁵ HaLevite, Jeshua, Kadmiel, Bani, Hashabniah, Sherebiah, Hodijah, Shebaniah, naPethahiah ne haghambire eshi; "Mwimane nomukughe Fumu ghoNyambi wenu, kuroruhe nororuheya! Fiyaghudhi kudina Dyoye dyodikuto, edi dyawana difumanekero kupiterera fiyaghudhi nomashoyerero ghomaheya!" ⁶ Yowe pithoye Fumu; Watenda diwiru, Diwiru dyomawiru, noyoyiheya eyi yakaramo, Kaye noyoyiheya eyi yakaramo, Dikuruviya noyoyiheya eyi yakaramo, Owe ne yoyiheya wayipungura. Waheya homuwiru ne ku kukugha. ⁷ Owe ne Yowe Fumu Nyambi, Oyu ghatorore Abram, nokamushwayitha mu-Ur, ditunga dyawa Chaldeans, Nokuna muta dina eshi Abraham. ⁸ Wawanine eshi mutjima wendi ne ghutawedhi paghutho Dhoye nowa tendire makuyuvero nendi, mukumupa matunga ghawa Kananite, Hittities, Amorite, Perizzte, Jebusite noha Girgashite kohana hoka wendi. Wakumithamo yighamba yoye, yoyishi We ne Ghomuhunga. ⁹ Wamonine yinyanda yawa kerekandongo wetu mu-Egyptena noWa yuvire thidiro thagho kudikuruviya dyodikihu. ¹⁰ Waneghedhire madimukithero noyitetukitha kwimanganyena Pharaoh noha pikendi waheya, nohanu waheya awa hatunga muditunga dyendi, yoyishi ne Wadimukire eshi awo ne hakununekire hathinda kwawa pikoye haEsreali. Wayeyurire dina Dyoye, thika mudiyuwa dino. ¹¹ Wayakunuthire dikuruviya paghutho dhagho, podiyo eshi hayendire pakatji kodikuruviya mudyango dyokukukuta; Noha payi wagho ne Wawa vukumene mughudhungi ghodikuruviya, thika diwe mumeyu ghongcamu. ¹² Shime karo, Wawa yendithire mutenya nodighundhi dyodivuyi, noghuthiku ne dighundhi dyomudiro, podiyo eshi diwape munyenge mundhira omu shoha yende. ¹³ Washurukire karo kudirundu dya-Sinai, noWa ghambire nagho mudiwiru, Wawa pire mayendithitho nomuragho, makonekithero nomarawero ghomawa. ¹⁴ Wawa dimukithire diyuwa dyodye dyoSabbatha ghokupongoka noWawa rawere mayendithitho, makonekitho nomuragho, panyara dhamupikoye Mosesi. ¹⁵ Wawa pire ghuroto ghokushwagha muwiru kundhara dhagho, NoWawa pire meyu kushwagherera mudiwe pamurandu ghodinota dyagho, noWawa tongwere hengene noka pinga ditunga, edi Watapire medhero kudi wapa. ¹⁶ Ene awo nawa wihetu ne hakununekire noha kukutithire mathingo ghagho nombadi hateyire kutwi kumarawero Ghoye. ¹⁷ Hashwenine kukutekera, nombadi hathotere kuyitetukitha Yoye, eyi Watendire mukatji kagho ene hakukutithire mathingo ghagho nomu ghudhinakaro wagho ne hatororire mupiterithi hahuke mughupika ene We ne ghoNyambi, Wakuroyithera kuwathiyerera, Wayara mathiyerero nothine'ke, mbadi wakupata wangu ene Wayara mughunongo nombadi Wawa nyathire. ¹⁸ Ngambi apa hakutendere hathinda ndana ghokughenyumuna noha ghambathanine eshi; oyu ne yonyambi wagho, oyu ghawa shwayithire mu-Egyptena noha tendire dishamu dishokuru. ¹⁹ Ene paghunongo ghoye ne mbadi Wawa nyathire mumamboreya. Dighundhi dyodivuyi ne mbadi dyawa yakunukire mumutenya, mukuwa yenditha mundhira; ngambi dighundhi dyomudiro paghuthiku, mukuwa munekera mundhira omu shoha yende. ²⁰ Shime karo Wawa pire Mupepo ghoghuwa mukuwa neghedha, nombadi Wawa yumene Manna Ghoye ene Wawa pire meyu kudinota dyagho. ²¹ Myaka makumi mane Wawa korere mumamboreya; Mbadiko ethi hanyandire; Yishupata yagho ne mbadi yadjovokire nomapadhi ghagho ne mbadi ghatumanine. ²² Shime karo Wawa pire maghufumu nomatunga, noWawa tawaghurire mumikunda, Hashimbire ghuraghuri ghoditunga dya-Sihon, Ditunga dyafumu ghoku Heshbon noditunga dya-Og fumu wawa Bashan. ²³ Shime Wengipithire hanawo yira tutumwedhi tomuwiru, noka wareta muditunga edi Watoyedhere hakerekandongo wagho eshi hengene noha shimbe ghuraghuri wadyo. ²⁴ Yodiyo, hanu ne hengenine nodya karire dyagho; Wawithire paghutho dhagho awa hatungire muditunga di awo ne haKananite, Wawa tapire nomafumu ghagho munyara dhawa kuru wetu, eshi hawa tende kehe yi hana himi. ²⁵ Hashimbire yitata yongcamu noditunga dyodi shwi, noha pingire mayuwo agha ghayara maghushwi ghomengi, mathima ne hagharoyitha, yikwinino yomandjembere, mapya ghoyitondo yo-Oliva noyitondo yombuyo dhokukutjaka-tjaka. Yodiyo ne hadire nohekutire noha kanyupire, noha djabwanine kumaghuwa Ghoye ghashokuru. ²⁶ Ngambi kemo eshi hakarire ghuthiko nokutjora muragho Ghoye. Awo ne hakundwere muragho Ghoye mumughongo dhagho noha payire hapumbi Ghoye, awa hashwenine ghuyi wagho eshi ngoha wahuthe kuKoye; Awo ne haKushamune thikuma eshi mbadi GhoNyambi. ²⁷ Yodiyo, Wawa tapire munyara dhawa nyathi wawo, awa hawa pethire; Ene muruvedhe romaghukukutu, apa hadirere kuKoye, Wawa yuvere mudiwiru nopaghukuru ghoghunongo Ghoye, Owe ne Wawa pire haghamweni awa hawa ghamwenine hashwaghe munyara dhawa nyathi wawo. ²⁸ Ene munyima dhokuturumutha kwagho, shime karo hatendire ghushatani paghutho Dhoye, Yodiyo, Wawa thiyire munyara dhawa nyathi wawo, noha karire noghuraghuri papagho; Ene ngambi kemo shime hapirukire noha direre kuKoye, Wawa yuvere oku We ne mudiwiru; Nomaruvedhe ghomengi Wawa ghamwene kukutha kughukuru ghoghunongo ghoye. ²⁹ Wawa nyangerekedhire eshi Ghuwa huthe kuMuragho Ghoye. Ene awo ne hakununekire nombadi hathotere marawero Ghoye, ene hatjorire matetero ndhango Ghoye, ogha ghakara eshi ngeshi munu ghagha kuthu ne kukona ghaparere mumwagho ene hayakunuthire mapaghe ghagho nokugoritha mathingo ghagho podiyo eshi mbadi hayuve. ³⁰ Ene myaka dhodhingi Wadhidhimeka thikuma kukwagho noWa wa nyangerekedha noMupepo Ghoye kupitera mwawa pumbu Ghoye. Ene ngambi kemo, mbadi hathotere, yodiyo Wawa tapire munyara dhawa nyathi wagho. ³¹ Ene pamurandu ghoghukuru ghoghunongo Ghoye, mbadi Wawa dhongononine po endi ghuWa nuthe; Owe ne ghoNyambi Yu ghayara ghunongo nomathiyerero. ³² Pano keho Nyambi wetu, Shokuru nongcamu noNyambi Ghomuwa thikuma, Oyu ghapungura makuyuvero nomathiyerero: Mbadi Ghumone maghukukutu agha ghana tuwera eshi mambiru kuKoye, Agha ghana wera pawa mafumu nomafumu ghana wetu, Pawa pristeri nawa pumbi wetu, Pawa wihetu nopawanu waheya, kutunderera mumayuwa ghawa mafumu gha-Assyria kate mayuwa ghano. ³³ Ngambi kemo, Owe ne ghoMuhungami koyoyiheya eyi yina tuwera; Ghuna yiruwana noghutawedhi ene atwe ne twatenda maharwero. ³⁴ Twaheya mbadi twakumithamo muragho Ghoye, yikare eshi hamafumu ghetu, hamafumu ghana hetu, hapristeri wetu, hawihetu. Mbadi twakutekera marawero Ghoye nothishupo Thoye, ethi Wahokore kukwetu. ³⁵ Awo ne mbadi haku Kugha mumaghufumu ghagho, endi hakukughere poyoyiwa eyi Wawapire, endi mughukuru noghutungi ghodyango edi Wawapire; Nombadi hapirukire eshi hashayeke ghuyi wagho. ³⁶ Pano keho ne twapika muditunga edi We Nyambi Watapire kwawa kuru wetu eshi hadjabwane mbuyo dhadyo noyitapera yadyo, yashemwa twapika muditunga di tudi! ³⁷ Muyangu ghoghushwi ghoditunga ne kuyenda kwafumu oyu ghana kuturaghura, pamurandu ghomaharwero ghetu. Shime karo hadi noghuraghuri kuyirama yetu nokuyimuna yetu momu hana himena no atwe ne mutoko-toko tudi. ³⁸ Pamurandu oyi, tuna kuturithapo makuyuvero ghokutanara ghopa tjangwa; Hapiterithi wetu, ha Levite noha Pristeri ne hayitanarithe."