¹ Ndani ghopa karire thidiro thishokuru kwawa Juda hayendhagho. ² Pohadi hamweya awa haghambire eshi; "Hanetu ne hengi; mutupe yidya podiyo eshi tudye tupare. ³ No pohadi karo hamweya awa haghambire eshi; "Tuna tapa medhero kumapya ghetu, yikwinino yomandjembere nomandhugho ghetu mukutjindjitha noyidya ruvedhe ru rodirumbu. ⁴ Pohadi karo hamweya awa haghambire eshi; "Atwe ne twaromba masherenyi twakuruwere diketo dyafumu pamapya noyinyamo yetu. ⁵ Ene yirama yetu ne pofotji noyirama yawa yendhetu, hanetu ne yira hanagho; ghushemwa atwe ne kuna kuthineneka hanetu hakare ghupika nohanetu hamweya hoha mbuyama ne hapwa kughura kughupika. Nombadi tudi nongcamu eshi tuwa komonone nawa tutughuru hamweya ne hadi nomapya ghetu noyinyamo yetu." ⁶ Napatire thikuma apa nayuvire thidiro thi noyighamba yagho. ⁷ Munyima dhokudheghetera, napatere hamayami nawa raghuri ghughamba eshi; "Kehe yu ghadi nomukudi ghokuwedherera kwamuyendhendi." ⁸ Nethire mbunga dhishokuru muku wemanganyena. Nona ghambire kukwagho eshi; "Kukutha mangcamu ghetu ne twakomonona hayendhetu hoha Juda, awa haghurithire kumatunga. Nopano kemo, kukona mughurithe hayendhenu ndi? Endi hawa ghurithe kukwetu? Ndani poha karire waheya nyiki nombadi hakonine kughamba kehe yi. ⁹ Ndani ghona ghambaire eshi; "Eyi muna kutenda ne mbadi yihunga. Mbadi nane mwaroghera kuyenda muwoma waNyambi wetu, pamurandu ghohonyi dhawa nyathi wetu ndi? ¹⁰ Name, hayendhange nawa pikange, kuna kutapa mukudi noyidya ene tushayeke kutapa mikudi dhokuwedherera. ¹¹ Muwahuthere dyarero mapya ghagho noyikwinino yagho, yinyamo yoyitondo, mandhugho ghagho, nomasherenyi ghokukuma kudithere, yidya, vinyu ghomupya nomaghadhi eyi mwawa ropere." ¹² Yodiyo, haghambire eshi; "Tuna kuwa huthera kupira kukumbera kehe thi kukwagho notuna kutenda thika dyodi ghuna ghamba." Ghonethire hapristeri, nona kumbere medhero kukwagho eshi hana kutenda kukutha makuruperitho gha. ¹³ Ndani nanyungire makwatero ghothishupata thange nokughamba eshi; "Nyambi ngogha nyunge kehe katughuru mundhugho dhendi nokuyiwana yendi oyu shogha pire kukumithamo makuruperitho gha. Ngogha munyunge nokumuthiya nyara-nyara nombunga dhodhiheya ne dhahuthire eshi, "Ngo yikare kemo!" Noha kuyire Fumu Nyambi. Nohanu ne hatendire kukutha makuruperitho gha. ¹⁴ Kuwedherera po, kutunderera ruvedhe oru hani torore nikare nonguvuru mudyango dyaJuda, kutunderera mumwaka ghomakumi mawadi kate mumwaka ghomakumi mahatu nomyaka dhiwadi dhoghuraghuri wafumu Artaxerxes ne myaka dikumi nomyaka dhiwadi, noyofotji temba ghadire yidya yokuroyithera nguvuru. ¹⁵ Ene hanguvuru hamweya awa hakariremo kughutho wange ne hatapire muremeghena kwawanu ene mbadi nayitendire pamurandu ghokuyapa Nyambi. ¹⁶ Ghushemwa, natwikere thiruwana thokuruwana kuditete nombadi twaghurire kehe muve. Hapikange waheya ne hakughongawedhire kuyiruwana yi. ¹⁷ Kutishi wange ne haJuda dithere nomakumi kwoko noha raghuri, kushwayithako awa heyire kukwetu kutunderera matunga agha ghatu dhingumwetwedha. ¹⁸ Pano keho, eyi haroyithire kehe diyuwa ne hove ghofotji nondjwi kwoko fotji edhi ghana torora, noyinyunyi nayo yapwire kuni royithera nokehe mayuwa dikumi ne hani royithere marudhi ghovinyu. Ene koyoyiheya yi ne mbadi narawere maghuwa agha hawananga hanguvuru, pamurandu eshi muremeghena ne wakarire ghukuru kohanu. ¹⁹ Nivuruke Nyambi wange, kumaghuwa kukutha koyoyiheya eyi naruwanine kowa hanu.