¹ Ndani Eliashib mupristeri shokuru ghemanganyine nawa minendi hoha pristeri nokutenda Dikorogho dyoNdjwi. Hadi tungekire nokutura mathero ghadyo. Awo ne haditendire kokayenda-yenda yira Mushoke wawa Dithere nokuditungeka no kokayenda-yenda yira Mushoke waHananel. ² Kuwedherera kwa-Eliashib ne hatutughuru ho ku-Jericho na-Zaccur ghomwana Imri ne hakukwatithire haruwane. ³ Shime nohana Hassenaah ne hatendire Dikorogho dyoThi; Awo ne haturire mitambo dhapo nokutura mathero ghapo nomayonga nomaboha. ⁴ Ghokurandako ne Meremoth ghomwana Arijah, ghomwana Koz, aye ne gharoghuthurure. Ghokurandako ne Meshullam ghomwana Berechiah, ghomwana Meshezabel oyu gharoghuthurire. Ghokurandako ne Zadok ghomwana Baana naye gharoghuthurure. ⁵ Ghokurandako ne Tekoites naye gharoghuthurure ene hamayami wagho ne mbadi hakwatithireko yiruwana yaFumu Nyambi wagho. ⁶ Mukuwedherera po ne Jehoiada ghomwana Paseah naMeshullam ghomwana Besodeiah ne haroghuthurire Dikorogho dyoKare; Awo ne haturire mitambo dhapo nokuturako mathero ghapo nomayonga ghadyo nomamboha. ⁷ Ghokuranda ko ne Melatiah ghomu Gibeonite, Jadon ghomu Meronothite, hatutughuru homu Gibeon naMizpah ne haroghuthure matungo ghanguvuru ghokumikunda edhi dhatungera kumbombwa dhorware. ⁸ Ghokurandako ne Uzziel ghomwana Harhaiah, ghumweya pawa ghenyumuni ngorondo nagho hatendururire. Ghumweya ghokuwedherera po ne Hananiah, ghumweya pawa tendi munde, naye ghatendururire; Hatendururire Jerusalem kumuyaghurupitha kate kakuma kuditete dyoko kayenda. ⁹ Ghokurandako ne Rephaiah ghomwana Hur, mupiterithi mutara ghodihenda dyokangiri-ngiri ka-Jerusalem, naye gharoghuthurire. ¹⁰ Ghokurandako ne Jedaiah ghomwana Harumaph ne naye ghatendire maroghuthwere paghutho dhondhugho dhendi, nogho kurandako ne Hattush ghomwana Hashabniah naye gharoghuthurure. ¹¹ Malchijah ghomwana Harim naHashub ghomwana Pahath-Moab, nagho haroghuthurire mutara ghumweya kuwedherera ko noMushoke ghoMadhiko. ¹² Ghokurandako ne Shallum ghomwana Hallohesh, ghumweya mupiterithi kumutara ghumweya wa-Jerusalem. Naye nawanendi hoha mbuyama ne hatendururire. ¹³ Hanun nawa hatunga mu-Zanoah ne hatendururire dikorogho dyoku muronga. Awo ne hatendire dikorogho di nokuturako mathero nomayonga nomamboha, noha roghuthurire makumbiki ghokukuma kudiyovi ghoditete kate kakuma kuDikorogho dyo kuDiyara. ¹⁴ Malchijah ghomwana Rechab, mupiterithi kukangiri-ngiri ka-Beth Haccerem, awo ne haroghuthure Dikorogho dyo kuDiyara; Aye ne ghatendire dikorogho di nokuturako mathero, mayonga nomakumba. ¹⁵ Shallum ghomwana Col-Hezeh, mupiterithi ghokangiri-ngiri ka-Mizpah ne gharoyithire Dikorogho dyoDithima; ghatendire dikorogho nokudiyandhera, kuturako mathero nomakumba nomayonga nogha roghuthure ditete dyothiviya thaShelah kumbadi dhothinyamo thaFumu kate kakuma kundhira dhokughurumuka kutunda kundhugho dhokuwiru dhothitata thafumu David. ¹⁶ Munyima dhendi Nehemiah ghomwana Azbuk, mupiterithi ghomutara ghumweya ghokangiri-ngiri ka-Beth Zur, gharoghuthurure kate kakuma kuyipiro yaDavid, kate kuthiviya ethi ghatenda munu nokate kakuma kundhugho dhawa kamangcamu. ¹⁷ Munyima dhendi ne ha-Levite, kupitera mwa-Rehum ghomwana Bani ne nagho haroghuthurure. Ghokumuranda ne Hashabiah, mupiterithi ghokangiri-ngiri ka-Keilah, aye ne gharoghuthurure kangiri-ngiri komukunda wagho. ¹⁸ Munyima dhendi, haminagho kupitera mwa-Bavai ghomwana Henadad, mupiterithi ghodihenda dyokangiri-ngiri ka-Keilah ne nagho haroghuthure. ¹⁹ Ghokurandako ne Ezer ghomwana Jeshua, mupiterithi ku-Mizpah ne ghatendururire mutara ghumweya owu wapirukere pawiru dhondhugho dhomapungwero ghoyirwitha ghoditete. ²⁰ Munyima dhendi ne Baruch ghomwana Zabbai, nothinga ne haka tendururire mutara ghumweya, kutunderera kudishonga dyoditete kate kuthero dhondhugho dha-Eliashib mupristeri shokuru. ²¹ Munyima dhendi ne Meremoth ghomwana Urijah ghomwana Koz ne naye gharoghuthure mutara ghumweya, kutunderera kuthero dhondhugho dha-Eliashib kate kughuhura ghondhugho dha-Eliashib. ²² Munyima dhendi ne hapristeri, hatutughuru awa hatunga muJerusalem ne nagho hatendurure. ²³ Munyima dhagho ne Benjamin na-Hasshub ne nagho haroghuthurure muthambo muya dhomandhugho ghagho. Munyima dhagho ne Azariah ghomwana Maaseiah, ghomwana Ananiah naye gharoghuthure kundhugho dhendi. ²⁴ Munyima dhendi ne Binnui ghomwana Henadad nagho hatendurure mutara ghumweya, kutunderera kundhugho dha-Azariah kate kudishonga dyoditete. ²⁵ Palal ghomwana Uzai ne ghatendurure muthambo muya dhodishonga dyoditete kate kumushoke ghokutamba kundhugho dhokuwiru dhafumu, edhi dhakarere kukashitiko. Munyima dhendi ne Pedaiah ghomwana Parosh nagho haroghuthurure. ²⁶ Kuwedhererapo ne ha-Nethinim awa hatungire mu-Ophel, haroghuthurure kutangera kuDikorogho dyoMeyu kate kutamba kuDiva kate kuMushoke ghokumoneghena. ²⁷ Munyima dhagho ne Tekoites haroghuthure mutara ghumweya, pepi noMushoke kate kakuma kuditete dyo ku-Ophel. ²⁸ Kupiterera Dikorogho dyoTukambe ne hapristeri haroghuthure ko, kehe yu paghutho dhondhugho dhendi. ²⁹ Munyima dhagho ne Zadok ghomwana Immer, naye gharoghuthure kughutho dhondhugho dhendi. Munyima dhendi ne Shemaiah ghomwana Shechaniah, mukungi ghoDikorogho dyo kuDiva ne naye gharoghuthure. ³⁰ Munyima dhendi ne Hananiah ghomwana Shelemiah naHanun, mwana ghokatughuru ghoghukwoko-fotji waZaraph, naye gharoghuthurure mutara ghumweya. Munyima dhendi ne Meshullam ghomwana Berechiah ne ghatendururire paghutho dhondhugho dhendi. ³¹ Munyima dhendi ne Malchijah, ghumweya wawa ghenyumuni ngorondo, gharoghuthurure kutunderera kundhugho dhawa Nithinim nokudyango dyomaghurithero muthambo muya dhoDikorogho dyoMatorwero kate kungonda dhokuwiru kudishonga. ³² Mukatji kongonda dhokuwiru kudishonga, kate kuDikorogho dyoNdjwi, haghenyumuni ngorondo nawa kamughuro ne haroyithire dyango di.