¹ Mudiyuwa dyo ne hatoyire mumbapira dhaMosesi oku hanu ne pakutegherera, hawaninemo eshi mbadiko muka Ammonite noMoabite ghokukona gheye kumbunga dhaNyambi. ² Pamurandu eshi mbadi hatambure hana hoka wa-Esreali noyidya nomeyu ene haruwere Balaam ghaka wakute, ngambi kemo eshi Nyambi wetu ne ghatjindjire thikuto thiya thikare fiyaghudhi. ³ Yodiyo, dyoya hokokire apa hayuvire muragho ne hayakunuthire hamutundakure kwaka Esreali. ⁴ Kughutho ghoyi, Elieshib ghomu Pristeri ne ghakarire nongcamu kungonda dhomapungwero mundhugho dhaNyambi, ghakutundakana naTobiah. ⁵ Nogha muroyithere ngonda dhodhikuru, omu ngaha pungweranga muyambo ghomushungwa noghuheke ghombuto, munde ghothiwe mwene, yinwitha, thofotji kudikumi thomushungwa, vinyu nomaghadhi ghomapya, eyi harawere eshi ngokuyitapa kwawa Levite, hembi, hakungi makorogho nomuyambo wawa Pristeri. ⁶ Ene apa yahokokire yi ne oku me ne mbadimo mu-Jerusalem, Mumwaka ghomakumi mahatu nomyaka dhiwadi dhoghuraghuri wa-Artaxaxes fumu wa-Babylon ne nahukire kwafumu. Munyima dhomayuwa ghongandji ne nawanine matawedhero kwafumu eshi nikahuke. ⁷ Nona keyire ku-Jerusalem nonana nongonone ghushatani oghu gharuwana Elieshib kwaTobiah, mukumupa ngonda mundhugho dhaNyambi. ⁸ Noya nitokotithire thikuma; yodiyo navukimine yitere yaTobiah yishwaghe mungonda. ⁹ Nona warawere eshi hakenithe ngonda dhi; nona kahuthire mungonda dhi yiruwanitha yomundhugho dhaNyambi nomuyambo ghomushungwa nomunde ghothiwe mwene. ¹⁰ Shime natjwathanine eshi ha-Levite ne mbadi hana wananga maghuwa ghagho; Nokehe yu kudipya dyendi, ha-Levite nohembi awa ngaruwananga yiruwana mungirishe. ¹¹ Yodiyo, nahenyene haraghuri nona wepure eshi; "Pashanye muna nyathera ndhugho dhaNyambi?" Naghongawedhire waheya nona waturire padyango dyoyiruwana yagho. ¹² Ndani Juda ghomuheya ne gharetire thofotji kudikumi thomushungwa, vinyu ghomupya nomaghadhi ghomapya kundhugho dhomapungwero. ¹³ Natorore Shelemiah ghomu pristeri naZadok ghomuka marukwaro eshi hapunguri noha Levite ne; Pedaiah, ghokurandako ne Hanan ghomwana Zaccur, mwana Mattaniah; hamonekire ghutawedhi noyiruwana yagho ne kutapera hayendhagho. ¹⁴ Nivuruke, Nyambi wange, kuhatera yinu yi nombadi ghudhongonone yiruwana yange yoyiwa eyi natenda kundhugho dhaNyambi wange nokuyiruwana yamo. ¹⁵ Mumayuwa gho ne namonine hanu hana kughuritha vinyu muSabbata nokareta yirambo yoghuheke ghombuto dhokukuthiya-thiya hana dhineka payidongi, novinyu, mandjembere, mbuyo dhoghukuyu nomuremeghena ghoghuheya oghu haretangire mu-Jerusalem mudiyuwa dyoSabbata ene nawa nyangadhekire eshi mbadi hakona kughuritha yidya mudiyuwa di. ¹⁶ Hatutughuru hoku Tyre ne hana tungire muJerusalem, haretire thi noyighuritha yokukutjaka-tjaka noha yighurithire muSabbata kohanu wa-Juda nomu Jerusalem. ¹⁷ Ndani napatere hapiterithi wa-Juda nona ghambire kukwagho eshi; "Nye muna kutendera ghushatani ghokemo, mukutjora diyuwa dyoSabbata?" ¹⁸ Nane mbadi yoha tendire hakerekandongo wenu, nane mbadi yoGha retera Nyambi wetu maghukukutu gha ndi? Ene shime ghomuna wedherera ghupata kwa-Esreali mukutjora Sabbata." ¹⁹ Dyoya karire kumakorogho gha Jerusalem, apa dyatokerire diyuwa kughutho ghokwingena muSabbata, narawere eshi makorogho ne ghapwe kutjapera nona warawere eshi mbadi hakona kugha yandhurura kate ghakupwe Sabbata. Yodiyo naturire hapikange pamakorogho, podiyo eshi mbadiko karo muremeghena showingene muJerusalem mudiyuwa dyoSabbata. ²⁰ Hakamughuro ghokukutjaka-tjaka wa ne hatendire mwara panunda dhaJerusalem yikandho yongatji ²¹ Ndani nawa nyangadhekire eshi; "Pashanye muna kuhungerera ghuthiku ghoghuheya panunda ghudhingumwetwedha ditete dyomawe?" Ngeshi mwakuyitende karo ne, payirama nakumukwata! Kutunderera ruvedhe ruya mbadi heyire karo mudiyuwa dyoSabbata. ²² Nona rawere ha-Levite hakukenitha hathinda noha yende haka kunge makorogho, mukutungeka diyuwa dyoSabbata. Nivuruke Nyambi wange, kuhatera koyino noghuni pungure kukutha kughukuru ghoghunongo Ghoye! ²³ Mumayuwa gho ne namonine karo haJuda awa hayekire hambuyama hoku-Ashdod, Ammon noku-Moab. ²⁴ Nodihenda dyohanagho ne kughamba ndimi dhawa Ashdod nombadi wakukona kughamba ru-Juda ene haghambire ngenyu ndimi dhohanu hamweya. ²⁵ Yodiyo, nawa patere nokuwakuta nona pumure hamweya nokuwa koka huki dhagho nokuninga hatape medhero kwaNyambi ghuninga eshi; "Mbadi mbomutapa hambuyama ghana wenu eshi hawa yeke hanagho hotutughuru ngambi eshi hatape hanagho hotuturu kohanetu hohambuyama, endi mwathinda." ²⁶ Nane mbadi mogha harwere Salomon ghofumu wa-Esreali muyinu yira yoyi ndi? Mumatunga ghomengi, mbadiko fumu ghakarire yira, yoyishi ye ne ghamuhakire Nyambi wendi naNyambi ne ghamutendire ghakare fumu wa-Esreali. Ngambi kemo, hambuyama hoha hayidena ne hamuharurithire. ²⁷ Tutegherere kukwenu eshi tutende ghushatani ghushokuru ndi, mukutjora muragho waNyambi wetu mukuyeka hambuyama hoha hayidena ndi? ²⁸ Ghofotji pawana Joiada ghomwana Eliashib, mupristeri shokuru, ghohemwenya Sanballat ghomu Horonite ne, namutongwere ghashwaghe kughutho wange. ²⁹ Wavuruke Hekudyange, pamurandu eshi hanyateka ghupristeri nomakuyuvero ghoghu pristeri nogho ghu-Levite. ³⁰ Yodiyo, nakenithire ghuhayidena ghoghuheya. Shime karo, natapire yitumbukera kwawa pristeri nawa Levite, keheyu kudyango dyoyiruwana yendi. ³¹ Nokareta muyambo ghoyikunyi nomuyambo ghomukesho ghokutanga paruvedhe oru haturapo, Nivuruke Nyambi wange kughuwa!