¹ Toko-toko kukwange! Nakara yira maghongawedhero ghombuyo dhopaditenya noyira mandjembere agha hana gugura; mbadiko karo mandjembere ghokudya ko, endi agha ghapya ghokukona mudhimu ghuhafere. ² Ghoghutawedhi ne ghadhongonoka kutunda mudyango ndi; mbadimo oyu ghadi ndjikiti mwawanu wahe. Wahe hana taterera mukunotora manyinga nokeyuno kuna kushana muyendhendi nodikwe. ³ Manyara ghagho ne maredhu kutenda ghuyi; hapiterithi ne kwipura sherenyi, nohatheki ne hakuroyithera kwangera nohanu hongcamu ne kuna kutongwera hanu yirumbera yomudhimu dhagho. Hana kurongeka pofotji. ⁴ Hohawapo ne yira mighunga no awa hahungama ne yira ruthito romunga. Edi ne diyuwa edi hamutongwere hakungi wenu, diyuwa dyomahumbire ghenu no oru ne ruvedhe romapemukithero. ⁵ Mwakurupera hakamaparaghumbo; mwatapa makurupero mwa yendhenu endi hambuyama awa hana kumuruwanena pamadhiko. ⁶ Mwana ghokatughuru, kuna kushwahura wiha munu, namwana ghombuyama ghanemanganyena nyina ngambi ngumwenya munu naye kwngumwenyendi. Munyathi wamunu ne yoyu ghatunga nendi mundhugho dhofotji. ⁷ Ene kukwange me, mbona toperera paFumu Nyambi. Mbona taterera kwaNyambi ghomakomweneno ghange noNyambi wange mboghana niyuvu. ⁸ Mbadi mushamberera koyi nina kupita mumwayo mwe mwanyathi wange. Munyima dhokuwa kwange, mbona pinduka. Ngeshi nahungumana mudikokore, Fumu Nyambi ne mboghana kara munyenge wange. ⁹ Pamurandu eshi nepithere Fumu Nyambi, mbona hangana ghupata wendi kate tape theko dhange nokate ghakushwayithepo theko dhi. Mboghana nireta kumunyenge nombona mono ghupongoki wendi. ¹⁰ Ndani hanyathi wange ne mbohana yimono nohonyi mbodhina ngambwera oyu ghaghambire kukwange eshi; Kupi ghadi Fumu Nyambi ghoye? Meho ghange ne mboghana mununguruka nomboghana nomboghana ghu yira matapa ghomu mukara. ¹¹ Diyuwa dyokutenda dikuma dyomaginditho ne mbodineya; nomodyo diyuwa mirurwani ne mbotuna henyitha kokayenda. ¹² Mudiyuwa dyo, hanu woye ne mbohana kwoyera, kutunderera kuAssyria, mambara mu Egypt kurware nokutunda kudikuruviya kate kudikuruviya, nokutunda kumarundu kate kumarundu. ¹³ Ene dyango ne mbodina kara mukunguru pamurandu ghohanu awa hana kutunga mo nopamurandu ghombuyo dhoyiruwana yagho. ¹⁴ Dithe hanu ghoye nomburo, mutanga ghoghupingwa ghoye. Awo ne hatunga pithagho mudiputa nomukatji kodyango dyomadithero. Ngoha dithere muBashani naGeleadi thika pashakare. ¹⁵ Thika pashakare apa mwakashwayire ku Egyptena nombona waneghedha thitetu. ¹⁶ Matunga ne mboghana mono nombona fu honyi kumangcamu ghagho. Mbohana tura manyara ghagho mutunwa twagho; matwi ghagho ne mboghana fu. ¹⁷ Mbohana ratha dikungi yira hayiyoka, noyira yighurondodhi yopakaye. Mbohana shwagha mumango ghagho nowoma; nombohaneya nowoma kwaFumu Nyambi nombohana tutukwa pamurandu wenu. ¹⁸ Yidye Nyambi yira we, ghokushwayitha maharwero, Oyu ghokupitakana maharwero ghoyiruhupwa yoghupingwa wendi? Mbadi ghaneghedha nga ghupata wendi kuroruheya, pamurandu eshi Aye ne ghashamberera kumakuyuvero ghendi ghoghutawedhi. ¹⁹ Shime mboghuna tuthiyerera po; mboghuna djata-djata maharwero ghetu nomapadhi ghoye. Mboghuna vukumena maharwero ghetu mughudhungi ghodikuruviya. ²⁰ Mboghuna tapa mughushemwa kwaJacob nomakuyuvero ghoghutawedhi na-Abrahamu thika dyodi watapire medhero kwawakuru wetu mumayuwa gho pathihuru-huru.