¹ Edhi ne mbudhi dhaFumu Nyambi edhi dheyire kwaMicah ghomuka Moresheth mumayuwa ghaJotham naHezekiah ghofumu waJudah, eyi ne yona monine kuhatera Samaria naJerusalemu. ² Mutegherere amwe mwahanu, tegherere we kaye noyoyiheya yakara mumoye. Fumu Nyambi ghana kukara mushupi kughuyi oghu ghuna kutamba, kutunderera mutembeli ghokupongoka. ³ Mumone Fumu Nyambi mboghaneya kushwagha mudyango dyendi nomboghana shuruka nokuna raghura mumango ghomakuru ghokaye. ⁴ Marundu ne mboghana ghenyumuka, mironga mbodhina dyadyangedha, yira maghadhi pamudiro noyira meyu agha hana notwera padyango dyokaghurumuko. ⁵ Yoyiheya yi ne pamurandu ghomaharwero ghaJacob nopamurandu ghomaharwero ghomundhugho dhaIsreali. Diharwero nane munye dyaJacob? Nane mbadi Samaria? Mango munye ghomakuru ghaJuda? Nane ne mbadi Jerusalemu? ⁶ Mbona tendi Samaria thirambo thoyinu yokuyipa mudipya, dyango dyoyinyamo nombona notwera mawe ghendi mumironga nokututherako. ⁷ Yoyiheya yitjwandjo yendi mbona yitetaghura yipindhi-yipindhi noyiyeramo yendi mbona yitumekera nomudiro. Mbona haranganya yitjwandjo yendi yoyiheya. Thika dyodi gha ghongawedhire yiyeramo yendi kutunderera kurungu, mboyina kara karo ndjambi dhawa karungu. ⁸ Pamurandu ghoyi, mbona wahumbitha nokudira nombona yendi mapadhi-padhi nothiheha; Mbona diri yira mbwawa nokutokota yira makuru. ⁹ Noyitombo yendi ne mbadiko kwiruka, ayo ne yineya kwaJuda. Yakakuma kudikorogho dyahanu wange muJerusalemu. ¹⁰ Mbadi ghukayitongore muGath; nowadira temba. Ene kuBeth Leaphrah ne naka kughandumuna mudikungu. ¹¹ Pite mwatungi homu Shaphiri, muthiheha nohonyi. Hatungi homu Zaanani ne mbadi ghuka washwaghere. Beth Ezel ne hadire yoyishi makomweneno ghagho ne nagha shayithako. ¹² Mwatungi muMaroth ne mutaterere ghutokota kumbudhi edhi dhina mutamba, yoyishi dirumbu ne dina mutamba kutunderera kwaFumu Nyambi kutamba kumakorogho ghaJerusalemu. ¹³ Mwatungi ghomu Lachish, makwatithoko ghokambunga kawa katukambe, owe Lachish matamekero ghdiharwero dyamwanange ghombuyama muZion, diharwero dyaIsreali kwadiwanine mumoye. ¹⁴ Owe ne ghuna kutapera yiwana kwaMoresheth Gath; nomayugho ghaAkzib ne mboghana shwahura mafumu gha Isreal. ¹⁵ Mbona reta muwithi kukoye, mwatungi muMareshah; mukamaghano ghomuIsreali ne mboghaneya kuAdullam. ¹⁶ Kurure mutwi ghoye notete huki dhohana awa wahafera. Kutende ngwara yira nwanyi, yoyishi hanoye ne mbohana yendi mughupika.