¹ Mbara edhi dhakarire dhayara hanu ene dyarero ne mukunguru. Dhina kara yira mudidhi ngambi kemo eshi dhakarire mushovo gho ngcamu. Mbara dhi ne dhamonekire eshi dhamwana fumu ene pano ne dhapwa kuthinenekera mughupika. ² Ghana kudira thikuma mughuthiku nomahodhi ghendi ne ghana kukuma kuthindjumu; noyofotji temba muhakwa yu ghana kumuhengaghura. Hayendhendi wahe ne haheti wendi nohana kara hanyathi wendi. ³ Juda ne ghapita kughupika pamurandu ghomaharwero noyiruwana yoghupika. Aye ne ghana kutunga muditunga dyoghupika nokupira maturumuthero. Haka kumupetha hamupiterera nokumutura momuthoropoto. ⁴ Mayira ghokuta kuZioni kuna kudira pamurandu eshi noyofotji temba yu ghana kwiya kumukandi ghomatoyedhero. Makorogho ghomahe ne gharundumuka. Ha pristeri wendi ne kuna kudira. Hambuyama awa hapira kukundama kwawa tuturu ne kuna kuwapetha ene kukwendi ne mbokapwe. ⁵ Hanyathi wendi ne hana kara hahona wendi nohanyathi wendi kuna kuwatomboka. Fumu Nyambi ne kuna kumuhumbitha pamurandu ghowingi maharwero. Hana hoka wendi ne hana kukara mughupika. ⁶ Mwedhi ghushokuru ne watunda pamwana Zioni ghombuyama. Hana fumu hana piruka yira yiyama eyi yina piri ghudyero nohana kuyenda kupira mangcamu paghutho wawa nyathi. ⁷ Mumayuwa ghoyinyanda yendi nokupira ghuturo wendi, Jerusalemu ne mboghana mwitha mukundhundha ghutungi oghu ghakarire nagho pakutanga. Apa hatungi mo wendi hawerere munyara dhamunyathi nombadiko oyu ghamughamwene. Munyathi ghamumonine nokumusherera kusabatha wendi. ⁸ Jerusalemu ne ghaharura thikuma, yodiyo ghana ghana mushwayitha po: Wahe awa hamu kutekerire ne hana munyatha keho, pamurandu eshi hana mono thiheha thendi. Ghana kudira nokuhuka munyima. ⁹ Ghana kumoneka nyata mwimi dhothishupata thendi. Mbadi ghana kuvuruka ghutho wendi yoyishi mawero ghendi ne ghathitetu. Noyofotji temba yu ghana kumuhengaghura. Ghana kudira, mone yinyanda yange Fumu Nyambi, yoyishi munyathi wange ne ghadi nongcamu! ¹⁰ Munyathi ne ghana kwata ghushwi wetu. Ghana mono matunga ghawa hayidena ghana kwingena muthinyaku thendi, awa warawere eshi ngo mbadi hakona kwingena mumakonganeno. ¹¹ Hanu wendi wahe kuna kudira mukushana yidya. Awo ne hatapa maghushwi ghagho mukupingithera moyo dhagho. Fumu Nyambi ngo ghuni mone nokuni thotera yoyishi napiri mudyo. ¹² Kukwenu ne mbadiko ndi amwe muna kunipita? Mumone ngeshi poghadi yu ghana kupita mughukukutu oghu nidi nagho, apa ghana nihumbitha Fumu Nyambi mudiyuwa dyoghukenya wendi. ¹³ Kutunderera muwiru ghatuma mudiro wendi muyishokora yange nokuwa witha. Ghahanyitha dikwe kumapadhi ghange nokuni thighura. Ghani tenda nikare mbumi noghukashu. ¹⁴ Djoko dhomaharwero ghange ne dhapwa kughanga nonyara ghendi. Hadhighanga pofotji nokudhitura muthingo dhange nogha kashitha mangcamu ghange. Fumu Nyambi ne ghani ghamwena mumoko ghowa napiri mangcamu kuwema nena. ¹⁵ Fumu ghadjata-djata nomapadhi wahe handwarume awa ngaha nighamwenanga. Ghetha mbunga dhini manganyene nokuwitha hangawana wange. Fumu Nyambi gharemeka hanange hohambuyama awa hapira kukundama kwawa tutughuru waJuda muvinyu. ¹⁶ Payinu yi ne nina kudira nomeho ghange kuna kushwagha mahodhi; yoyishi muhengaghuri ne kayenda ghadi nange no Aye ne yomutapi ghomoyo wange. Hana hoka wange ne hana kuhanya pamurandu eshi ghana niwitha. ¹⁷ Zioni ne ghana yakunutha manyara ghendi; noyofotji temba yu shamuhengaghure. Fumu Nyambi ne gharawera eshi awa hana dhingumwetwedha Jacob ne ghakare hanyathi wendi. Jerusalemu ne ghana kumoneka nyata kukwagho. ¹⁸ Fumu Nyambi ne ghapongoka nona tjora miragho dhendi. Muyuve mwaheya nokumona madiro ghange. Hambuyama awa hadhira kukundama kwawa tutughuru nohangaghu ghana wange ne hapita mughupika. ¹⁹ Nethire hahakwa wange ene hanangere. Hapristeri nawa kuru ne haferere mumbara apa hashanine yidya mukuhangedhera moyo dhagho. ²⁰ Mone Fumu Nyambi, mumaghukukutu nidi nodira dyange ne kuna kungurunganya nomutjima wange ne ghuna ndundumena yoyishi mirandu dhange dhingi. Panunda dhothimende ne widhi ghomukungu; mushi dhondhugho ne yifa vene. ²¹ Hayuva madiro ghange ene noyofotji temba ghana kuni hengaghura. Wahe hanyathi wange hayuva maghukukutu ghange; nohana shamberera yoyishi wayiruwana kemo; Wareta diyuwa edi watoyedhera; pano keho ne nagho watende yira me. ²² Ghuyi wagho ngoghukume kukoye nowa tende thika dyodi ghuna nitendi, pamurandu ghomaharwero ghange. Madiro ghange ne makuru nomutjima wange ne pwera-pwera ngcamu.