¹ Mathero gho mahe gha Jeriko ghapwire kuyandhera pumurandu gho hakayita wa Israeli. Mbadiko gho kushwagha no mbadiko gho kwingena. ² Fumu Nyambi ghambire kwa Joshwa eshi, ''Mone, Natapa Jeriko munyara dhoye, fumu wawo, no harwi wendi ho ngcamu. ³ Mwakona kudhinguruka mbara, hatutughuru wahe gho hakayita kudhinguruka mbara ruvedhe rofotji. Mwakona kuyitenda yi mumayuwa kwoko no dyofotji. ⁴ Hapristeri kwoko no hawadi hakona kushimba marumbendo gho manyiha ghoyikungwe kughutho gho dimbangu. Mudiyuwa dyo ghukwoko noghuwadi, mwakona kudhinguruka mbara kwoko no ruwadi, no hapristeri hakona kufudha murumbendo. ⁵ Mwakona kutura mughuma ghoshokuru pakufudha no manyiha ghoyikungwe, no opa mwakuyuva mughuma gho marumbendo hanu wahe hakona kukugherera no muyoyo ghushokuru, no dikuma dyo mbara nanyi dyakuwe dyodihe. Hakayita hakona kuhomokera, keheyuno ghakona kuyenda kughutho. ⁶ Joshwa gho mwana Nun hethire ha pristeri no kughamba nawo eshi, ''Mushimbe dimbangu dyo makuwanekero, no hapristeri kwoko no hawadi hashimbe marumbendo gho manyiha ghoyikungwe kughutho gho dimbangu dya Fumu Nyambi. ⁷ ''Ghaghambire kohanu eshi, ''Muyende mukadhinguruke mbara, no hamashurundate hana kupita kughutho gho dimbangu dya Fumu Nyambi. ⁸ Thika kenge dighayighambire Joshwa kohanu, hapristeri kwoko nohawadi keheyu gha shimbire rumbendo ro manyiha ghoyikungwe nokupita kughutho wa Fumu Nyambi. Thika dighayiwarawere, hafudhire marumbendo. Dimbangu dyo nungathano dya Fumu Nyambi dya wakuthire munyima dhawo. ⁹ Mashurundate hapitire kughutho dhawa hapristeri, no hafudhire marumbendo ghawo, ene mashurundate ghokuthiyarako hakuthire munyima dimbangu, no hapristeri hatwikere ku fudha marumbendo ghawo. ¹⁰ Ene Joshwa gharawere hanu, eshi, ''Mbadi mwakona kukuyera. Mbadiko mughuma oghu shoghu kare mutunwa twenu kate diyuwa edi mbonimutongwera shi muyoghotere. Ndani mbomuyoghotera. ¹¹ ''Gharawere dimbangu dya Fumu Nyambi didhinguruke mbara rofotji mudiyuwa. Munyima koku nengena mu mwara wawo, no kuna rara ghuthiku mu mwara wawo ¹² Munyima Joshwa ghapindukire mathiku-thiku gho murughura, no hapriesteri wa hashimbire dimbangu dya Fumu Nyambi. ¹³ Hapristeri kwoko no hawadi owa ha shimbangire marumbendo gho manyiha gho yikungwe kughutho ghodimbangu dya Fumu Nyambi, hapitire kughutho no kutwikera kufudha marumbendo. Mashurundate ha pitire kughutho wawo. Mashurundate gho kuthigharako hayendire munyima dho dimbangu dya Fumu Nyambi, hakamarumbendo hatwikere kufudha. ¹⁴ Hakundukire mbara muruvedhe rofotji diyuwa dyoghuwadi no hahukire kumwara. Hayiruwanine mayuwa kwoko no dyofotji. ¹⁵ Mudiyuwa dyo ghukwoko noghuwadi ghemanine no ruvedhe-vedhe, oku pepi no katokera diyuwa hadhingurukire mbara mundhira dhi hayiruwananga, ruvedhe ru ne roghu kwoko no ghuwadi. Dyodi diyuwa hadhingurukire mbara dhi kwoko no ruwadi. ¹⁶ Adyo ne kwakarire diyuwa dyo ghukwoko noghuwadi, apa hafudhire hapristeri no marumbendo, Joshwa gharawere hanu eshi, ''Muyoghotere! Yoyi Fumu Nyambi ghana mupa mbara dhi. ¹⁷ Mbara no yoyihe yakaromo ayo ne twakona kuyipongwera kwa Fumu Nyambi ghayi hanyaghure po. Shimengwa Rahab gho mukaruhonda shoghakone kupara-yodighe no wa hadi nendi mundhugho-pamurandu shi ghahorekire hatumi wa twatumine. ¹⁸ Ene mwene mutakamithe shi mbadi mwakona kushimba yi yina roghera kuhanyaghura, munyima dhokuyi hatithera kuma hanyaghukero, mbadi mwakona kushimba po kehethino. ngeshi muyiruwane, muna kutenda mwara wa Israeli thinu thimwe shohakone kuhanyaghura no muna kukuretera maghukukutu pa payo. ¹⁹ Ma silveri no mangorondo gho mahe noyi kuvo yimweya ayone yinahatera kwa Fumu Nyambi. Yakona kuyenda kuma pungwero gha Fumu Nyambi.'' ²⁰ Hanu hatapire muyoyo ghu shokuru, no hafudhire marumbendo ghawo. Pakuyuva hanu kayoghototo ko marumbendo, hatapire muyoyo ghoghukuru, dikuma dya wire pamuve, no kehe no munu hamutambire no hashimbire mbara. ²¹ Hamanine kuhanyaghura yoyihe yiyakarire mumbara kudimende-wahe ha tutughuru no hakamadi, hanuke,no hakuru, ngombe,ndjwi no yidongi. ²² Munyima Joshwa ghambire koha tutughuru hawadi wa hayendire mukakenga ditunga, ''Muyende mundhugho dha mukamadi gho ruhonda. Mukarete mukamadi no wahe wa ghadi nendi, thika dyodi mwatendire medhero kukwendi.'' ²³ Owo harume hayire mukukenga ditunga hayendire mwishi no hakaretire Rahabu panunda. Hakaretire wihe, nyina, haminendi no hakurwendi, no dikodyendi di dyakarire nendi. Hawaretire padyango dyo panunda dho mwara wa Israeli. ²⁴ Hatumekire mbara noyoyihe yi yakarire mo. Shimengwa silveri, ngorondo no yikuvo yimwe hayiturire kumapungwero mundhugho dha Fumu Nyambi. ²⁵ Ene Joshwa gha ghamwenine Rahabu gho ruhonda, diko dya wihe dyo dihe, no wahe wa ghakarire mukupara shime. Ghatungire muditunga dya Israeli kumayuwa gho mahe, yoyi ghondekire hatumi wa ghatumine Joshwa mukakenga Jeriko. ²⁶ Munyima Joshwa ghawarawere ruvedhe ruya no medhero, ghambire eshi, ''Thikuto kwa munu kughutho wa Fumu Nyambi, oyu mboghatendurura mbara dhi, Jeriko. Mbodhina kara paro pamwanoye gho mbendi, mboghana tura matatekero, no paro kwa mwanoye ghombiru, mboghana turithapo mathero. ²⁷ ''Fumu Nyambi ghakrire na Joshwa, no fumwa dhendi dhakuhanyane muditunga dyodihe.