¹ Ruvedhe ro Joshwa hethire hanahoka wa Ruben, haGadites, na dihenda dyo rudhi rwa Manasseh. ² gha hambire kukwa eshi, ''Muna tendi yoyihe yi ghamurawere Moses gho mukareri wa Fumu. Muna kutekera diywi dyange muyoyihe yina munarawere. ³ Mbadi munakono kumwaghera hakurwenu mo ghano mayuwa gho mengi, kate pashadyarero, no munakumithamo yiruwana yoyihe yatumbukera pa marawero gha Fumu gho Nyambi wenu. ⁴ Pano Fumu gho Nyambi wenu ghana tapa maturumuthero ko hakuru wenu, thika kengedi ghawa kuruperithire. Pano mupiruke no muhuke kuma mwara ghenu muditunga di mwapinga, edi ghamupire Moses gho mukareri wa Fumu Nyambi kumutara ghuya wa Jordani. ⁵ Ene mutakamithe pakukumithamo marawero no miragho dhi ghamurawere Moses gho mukareri wa Fumu gho Nyambi wenu dhi ghamurawere, Mukuhaka Fumu gho Nyambi wenu, mukukutha mumayira ghendi gho mahe, mukupungura miragho dhendi, no kumamatera kukwendi no ku mukarera no mutjima dhenu dhodhihe no mudhimu dhenu dho dhihe.'' ⁶ Joshwa ghawa tungekire no kuwa tuma gha huke, nawo hahukire kuma mwaraghawo. ⁷ Pano kudihenda dyo rudhi rofotji rwa Manasseh Moses ghawapire ghupingwa mudyango dya Bashan, ene kudihenda dimwe Joshwa ghawa pire ghupingwa kumutara gho ha kurwawo kudyango dyokughurumuka kudiva dya Jordani. Joshwa ghawa tumine hahuke ku ma mwaraghawo; ghawa tungekire ⁸ no kughamba kukwawo eshi, ''Muhuke ku ma mwaraghenu no maghushwi gho mengi, no yimuna yoyingi, no masilveri no mangorondo, no Buronzi no yikuvo, no dhimuthithi dhodhingi. Mukutapere yinu yokuyipa yokutunda kohanore dhenu pofotji no haminenu. ⁹ Kohana hoka wa Ruben, hanahoka wa Gad, no dihenda dyo rudhi rwa Manasseh hahukire kudighumbo, kuthigha mbunga dha Israeli pa Shiloh, kwakarere muditunga dya Kanaani. Hathighukire no kuhuka kumukunda wa Gilead, kuditunga dyawo, edi hapingire hathinda, mughutawedhi ghokumuragho wa Fumu Nyambi, munyara dha Moses ¹⁰ Opa hana kumine ku Jordani omune muditunga dya Kanaani, hana hoka wa Ruben na Gadites no dihenda dyo rudhi rwa Manasseh ghatendire thinyaku kumutara wa Jordani, thinyaku thothikuru no thiwa. ¹¹ Mbunga dha Israeli hayuvire yokuhatera yinu yi no ghambire eshi, ''Mumone! Mbunga dha Ruben, Gad, no dihenda dyo rudhi rwa Manasseh hana tendi thinyaku kughutho ghoditunga dya Kanaani, pa Geliloth, mumukunda gho pepi na Jordani, kumutara ghu wahatera kumbunga dha Israeli.'' ¹² Opahayiyuvire mbunga dha Israeli yinu yi, Mbunga dhodhihe dhakughongawedhire hanu wa Israeli pofotji pa Shiloh Mukatenda yita nawo ¹³ Mbunga dha Israeli hatumine mbudhi kohanu wa Ruben, Gadites, no dihenda dyo rudhi rwa Manasseh, muditunga dya Gilead. Hatumine karo Pineahasi mwana Eleazer, mupristeri, ¹⁴ pofotji nendi ghakarine no hapiterithi dikumi, ghofotji mukehe runo rudhi rodiko dya Israeli, no keheyuno ghakarire mutwi ghodiko mukatji kodiko dya Israeli. ¹⁵ Heyire kumbunga dha Ruben,Gad no dihenda dyo mbunga dha Manasseh, muditunga dya Gilead, no ghana ghambire kukwawo: ¹⁶ Mbunga dhodhi dha Fumu Nyambi dhaghambire yi, 'Yinumunye yi muna tendi yokupira ghuhunga kughutho wa Fumu Nyambi wa Israeli, mukushayeka kudhira kumukutha Fumu pakutenda mwathinda thinyaku diyuwa di muna reghi Fumu Nyambi? ¹⁷ Napo ghuyi wa Poer mbadi warikanya kukwetu? Shime napo mbadi twakushuka kukwagho. Poghadi mahumbithero mumbunga gha Fumu Nyambi gho ghuyiwo. ¹⁸ Namwe karo muna piruka mukudhira kukutha Nyambi moruno ruvedhe? Ngeshi namwe muna shwena kukutha Fumu Nyambi dyarero, peghundha ghana kupata no mbunga dhodhuhe dha Israeli. ¹⁹ Ngeshi ngo ditunga diya mwawana eshi dyanyata, ngomuna piti kuthambo kuya dhoditunga okuthemana thi nyaku tha Fumu no kushimba mwathinda ghupingwa mukatji ketu. Ene mbadi mwakona kwinganyena Nyambi, endi kutwimanganyena twe pakutenda mwathinda thinyaku thenu mbadi thina kara shi thinyaku tha Fumu gho wetu. ²⁰ Achan gho mwana Zerah napo mbadi gha tendire mukudhira kufumaneka koyi yina kara shi yina fumanena Nyambi? Ghupata mbadi napo wa werere mukunda ghoghuhe wa Israeli? Oyamunu mbadi ghayongarire pithendi mughuyiwendi.''' ²¹ Ndani Rudhi rwa Ruben, Gad, no dihenda dyo rudhi rwa Manasseh hahuthire mukughamba ko kohapiterithi gho mako gho mbunga dha Israeli: ²² Gho Mukamangcamu, Nyambi, Fumu! Gho Mukamangcamu, Nyambi, Fumu!-Ghadimu, no ghaningitha ha Israeli hathinda hadimuke! Ngeshi yakarire wina endi mbadi mughuhunga kughutho wa Fumu Nyambi, watughamwena dyarero ²³ mukutenda thinyaku thi pamahimeno ghetu mukudhira kukutha Fumu Nyambi. Ngeshi kuna tendi twe thinyaku thi mukutapa po kunore po miyambo, muyambo dhoyidya, endi miyambo dho dhothiraro, ninge Fumu ghatufutithe kuyitenda yi. ²⁴ Kadikemo! Tuna yitendera yino woma eshi ruvedhe ru mborwiya hanenu kukona ha ghambe kohanetu, 'Nye yokukona mutenda na Fumu, Nyambi wa Israeli? ²⁵ Fumu Nyambi ghatura Jordani mururwani pakatji ketu natwe. Amwe mbunga dha Ruben na Gad, mbadiko yo kutenda kwa Fumu Nyambi.' Yoyi haneneu mbohana shayekitha hanetu kutongamena Fumu Nyambi. ²⁶ Twaghmbire eshi, 'Tutende keho pano thinyaku, mbadi tho kutumekera miyambo, endi thoyi djambera, ²⁷ ene tho ghushupi pakatji ketu namwe, no pakatji ko rudhi rwetu owa mboheya munyima dhetu, gho tuna tendi thiruwa kwa Fumu Nyambi, podighoshi hanenu mbadi mboha ghambe kohanetu muruvedhe rumborwiya, ''Mbadi mwakare no yitapera mwa Fumu Nyambi.''' ²⁸ atwe twaghambire, 'Ngeshi yi kuyighamba kukwetu endi kohana hoka wetu muruvedhe rumborwiya, tuna kughamba eshi, ''Mumone! Oghune mudhidhimbi gho thinyaku tha Fumu Nyambi, ethi hatendire hakerekandongo wetu, mbadi tho kukonera muyambo, endi thokuyamba, ene thoghushupi pakatjikenu natwe. ²⁹ ''Yikare kayenda kukwetu eshi atwe tuna yipitha kwa Fumu Nyambi, no dyarero tutundekukwendi mukudhira kumukutha pakutenda thinyaku to kukonera muyambo, muyambo gho tumbi, endi ghokutumekera, yidhire kukara thinyaku tha Fumu gho Nyambi wetu ethi thina kara kughutho dho makuwanekero. ³⁰ Phineas gho mupristeri no hapiterithi wa Israeli, owa hadhi mutwi ghomako gha Israeli owa hakarire nendi, hayuvire mbudhi eshi mbunga dha Ruben, Gad, na Manasseh hana ghamba eshi, ayo ne yiwa kughutho wawo. ³¹ Pinehasi gho mwana Eleazer mupristeri ghambire kumbunga dha Ruben, Gad na Manasseh, ''Dyarero tuna dimukashi Fumu Nyambi mukatji ketu ghadi, yoyishi mbadi muna tendi ghuyi ethi thiruwana mbadi thinakara eshi mbadi thihunga kukwendi. Pano munaghamwena mbunga dha Israeli munyara dha Fumu Nyambi. ³² Ndani Phinehas mwana Eleazer mupristeri, no hapiterithi ha thighire hana hoka wa Ruben no haka Gadites, kutunda muditunga dya Gilead, hahuke kuditunga dya Kanaani, kumbunga dha Israeli, no kareta mbudhi kukwawo. ³³ Yitunda mo yawo yakarire yiwa kughutho ghombunga dha Israeli. Mbunga dha Israeli hafumanekire Nyambi no mbadi haghambire yo kuhatera kutenda yita no hanahoka wa ruben na Gadites, mukuhanyaghura ditunga dihatungire. ³⁴ Hana hoka wa Ruben no haka Gadites hatire thinyaku thi ''Ghushupi,'' ghambire eshi, ''Ghushupi pakatji ketu eshi Fumu ne Nyambi.''