¹ Mumwaka ghokutanga wafumu Cyrus, fumu ghomu Persia, Fumu Nyambi ne ghayarithire yighamba yamupumbi Jeremiah. Fumu Nyambi ne ghatjokedhire mupepo wafumu Cyrus nodiywi dyafumu ne dyayendire mumbara dhodhihe. Eyi ne yogha tjangire ghuninga: ² Cyrus ghofumu waPersia ghana kughamba eshi; Fumu Nyambi, no aye ne Nyambi ghomudiwiru, ghanipa maghufumu ghomaheya ghopakaye no ghani torora nimutendere ndhugho muJerusalem mwawa Juda. ³ Yidye oyu ghadimo amwe mwahanu wendi? Nyambi wendi ngogha kare nendi no ngogha yende kuJerusalem mwawa Juda noka tenda ndhugho dhaFumu Nyambi, Nyambi waka Esreali noNyambi oyu ghakara MuJerusalem. ⁴ Kehe munu yu ghana kupara kukehe dyango, hanu awa ghatunga nagho hakone kumughamwena nosiliveri, ngorondo, ghushwi noyimuna noyitapa yokutunda kumutjima yikare muyambo ghomundhugho dhaNyambi muJerusalem. ⁵ Popo manduraghumbo ghawatukuru mudiko dyaJuda naBenjamin, hapristeri nawa Levites nokehe yu watanarithire mupepo waNyambi ghayende nokatenda ndhugho dhaFumu Nyambi dhomu Jerusalem ne hemanine. ⁶ Owa hawa dhingumwetwedhire ne hawa ghamwene nosiliveri, ngorondo, maghushwi, yimuna, yinu yondhiro nomuyambo ghokutapa mumashutukero. ⁷ Fumu Cyrus ne ghashwayithire ghushwi ghomundhugho dhaFumu Nyambi oghu ghakashimbire Nebuchadnezzar katunda kuJerusalem nokuna ghutura mundhugho dhoha nyambi wendi. ⁸ Cyrus fumu waPersia ghayishwayithire nogha yitapire mumoko ghaMithredath ghomupunguri, oyu ghayi tarire nokuyitapa kwaSheshbazzar, fumu ghana muJuda. ⁹ Ethi ne thivarero thayo, yindeyi-ndeyi makumi mahatu ghongorondo, yindeyi-ndeyi diyovi yosiliveri, nomakumi mawadi nokwoko-ne ghomamoko. ¹⁰ Makumi mahatu ghoyindeyi-ndeyi yongorondo, nomathere mane nodikumi dyoyindeyi-ndeyi yosiliveri yorupitu nodiyovi dyofotji dyoghushwi ghumweya. ¹¹ Ghushwi ghoghuheya ghongorondo nosiliveri ne mayovi kwoko nomathere mane. Yoyiheya ne ghayishimbire Sheshbazzar nawahe awa hana karire mughupika hatunde kuBabylon nokutamba kuJerusalem.