7 ¹ Sima na yango, namoni ba-anzelu minei batelemi na bipai minei ya mokili, bakangi mipepe minei ya mokili po mopepe moko épepa na mokili té, na mbu té, na nzete moko pe té. ² Namoni anzelu mosusu azali komata uta na epai moi ebimaka, asimbi elembo ya Nzambe ya bomoi; abeleli na mongongo makasi na ba-anzelu minei oyo nzela ya kobebisa mokili pe mbu epesamelaki bango, ³ alobi: «Bóbebisa mokili té, mbu té, banzete pe té, tii tango nakosilisa kotia basali ya Nzambe na biso elembo na bilongi na bango.» ⁴ Pe nayoki motango ya bato oyo batiami elembo: bazalaki nkoto kama moko na tuku minei na minei, batiami elembo, ya mabota nyonso ya bana ya Israel. ⁵ Bato ya libota ya Yuda: nkoto zomi na mibale batiami elembo; bato ya libota ya Ruben: nkoto zomi na mibale; bato ya libota ya Gad: nkoto zomi na mibale; ⁶ bato ya libota ya Aser: nkoto zomi na mibale; bato ya libota ya Neftali: nkoto zomi na mibale; bato ya libota ya Manasé: nkoto zomi na mibale; ⁷ bato ya libota ya Simeon: nkoto zomi na mibale; bato ya libota ya Levi: nkoto zomi na mibale; bato ya libota ya Isakar: nkoto zomi na mibale; ⁸ bato ya libota ya Zabulon: nkoto zomi na mibale; bato ya libota ya Jozef: nkoto zomi na mibale; bato ya libota ya Benjamen: nkoto zomi na mibale batiami elembo. ⁹ Sima na yango, namoni: tala, bato ebele penza oyo moto moko té akoki kotanga bango, bato ya bikolo nyonso, ya mabota nyonso, ya bamboka nyonso pe ya minoko nyonsoa, batelemi liboso ya ngwende pe liboso ya mwana-mpate, balati bilamba milai ya pembe, pe mandalala na maboko na bango, ¹⁰ bazali koganga na mongongo makasi: Lobiko na Nzambe na biso oyo afandi na ngwende, pe na mwana-mpate! ¹¹ Pe ba-anzelu nyonso oyo bazalaki zingazinga ya ngwende, ya bampaka pe ya ba-bomoi bafukami, bilongi na bango na se liboso ya ngwende pe bakumbameli Nzambe, ¹² balobi: Amen! Mapamboli, nkembo, bwanya, matondi, lokumu, nguya pe makasi ézala na Nzambe na biso po na seko na seko, Amen! ¹³ Pe moko na kati ya bampaka atuni ngai, alobi: «Bato oyo balati bilamba milai ya pembe, bazali banani pe bauti wapi?» ¹⁴ Nazongiseli ye: «Mokonzi na ngai, yo nde oyebi.» Pe ayebisi ngai: «Ezali bato oyo bauti na monyoko monene; basukoli bilamba milai na bango pe bakómisi yango pembe na makila ya mwana-mpate. ¹⁵ Yango wana bazali liboso ya ngwende ya Nzambe pe bazali kosambela ye butu moi na ndako mosantu na ye. Pe Oyo afandi na ngwende akotia éma likolo na bango. ¹⁶ Bakoyoka lisusu nzala té, bakoyoka lisusu posa ya mai pe té; moi ekobeta bango ata moke té, molunge makasi moko pe téb; ¹⁷ po mwana-mpate oyo azali na katikati ya ngwende akobatela bango, akokamba bango na maziba ya mai ya bomoi; pe Nzambe akolongola mpinzoli nyonso na miso na bangoc.»