¹ Umoyo wanu mwaKristu umbakumbapasani kulimba, ndiye chikondi chake chimbakunyamalizani. Munako kuphatilana mumuzimu waMulungu tsapano imwepo munikomelana mtima pomwe munimvelana ntsisi kuna munango namunango. ² Ndinikukhumbilani, tsapano , kuti mundikhondwelese kwene-kwene mwentse pakukhala nanzelu zibodzi nachikondi chibodzi, pomwe nakukhala namtima ubodzi nakufunga kubodzi. ³ Muleke kuyitilana makhani nakubzvikuza. Muyitilane mtima wakubzvichepesa pachanu. ⁴ Mulekele kuyita kuti mubodzi namubodzi ayite bzvake yekha, muyitembo kufuna kwaanzanu. ⁵ Tenepo mwentse khalani namtima ninga ule ukhana Klistu Yesu; ⁶ Iye akhada fanana naMulungu, koma iye alibe kuyesa kuti kufanana kwake naMulungu ndichinthu chakuphatisisa. ⁷ Koma, iye mwechilo adapeleka bzventse bzvakanabzvo mukufuna kwake, pakubzvisandula kukhala mulanda achikhala munthu ninga wanthu wentse. ⁸ Ali munthu tenepo, iye adabzvichepesa pomwe kukhala wakutetekela, kana bzvikalewa kuti iye afe pamutanda. ⁹ Nathangwe labzvimwebzvi Mulungu adamusimudzila padzulu-dzulu, ndikumupasa dzina liniposa madzina yentse. ¹⁰ Bzvakuti bzventse bzvakudzulu, bzvapansi pano nabzvapadziko lapantsi ladhakha, bzvinizagwadama kulemekeza dzina laYesu. ¹¹ Ndiye munthu wentse anidayila namulomo wake kuti Yesu Klistu ndiMambo, kuti Mulungu apayi alemekezewe. ¹² Tsapano, abale wangu wapamtima wangu, mudakhala muli munthu wakutetekela chokela apo pandikhali naimwepo. Pakuti inepo ndili kutali tsapano, munyanye kunditetekela kuzhula pale pandikhali naimwepo. Tsapano khalani muchiyita bzvinthu namantha nakutetemela bzviniwonesa kuti mudapulumusiwa. ¹³ Pakuti Mulungu ndiye aniphata basa mwaimwepo pakukutayisani kuti mufune nakukwanisa kutetekela kufuna kwake. ¹⁴ Patani bzventse musingalilelile pomwe nakupisana ¹⁵ Kuti mukhale wanthu alibe mulandu, pomwe anamtima wakuchena, wana waMulungu anisaya chinganongedzelewe, pakati padzina lakusaya kulungama. Imwepo ndimwe chayedza pakati pawo ninga nyenyezi zinivhenekela dziko lentse. ¹⁶ Pakuwawuza iwo mafala yanipasa umoyo. Kana mukhabzviyita inepo ndinizakhala nalo tangwe lakubzvidumba pantsinku yakubwela pomwe kwaklistu, pakuti bzvimwebzvi bzvinizawoneka kuti mphamvu pabasa langu bzvilibe kumalila pabzvinthu bzvapezi nee. ¹⁷ Chikhulupililo chanu chakhala ninga ntsembe inipasiliwa kuna Mulungu. kana gazi langu likhatululiliwa padzulu pantsembe imweyi ndinikhondwa nakukhondwesesa pabodzi naimwepo mwentse. ¹⁸ Ndichibodzi bodzimbo imwembo khondwelani, pomwe gawanani nayinepo chikhondwelelo chanu. ¹⁹ Kana kuli kufuna kwamufumu, ndininyanganila kukutumilani Timoti kwaimwepo tsapanopa, kuti inepo ndizalimbisiwe mtima tangwe labzvinthu bzvazandiwuza bzvapadzulu panu. ²⁰ Iye ndiye basi uyo ananzelu ninga zangu pomwe anikhumbuka nabzvaimwepo. ²¹ Anango wentse anikhumbuka bzvinikomela iwo wokha nee kukumbukambo bzvinikomela Yesu klistu. ²² Imwepo munibzvidziwa makhalidwe yaTimoti yadawoneka khale kuti ndiya chadidi. Munibzvidziwa kuti adaphata basa lakulalikila mafala yabwino pabodzi naimwepo ninga bzviniyita mwana naapayi wake. ²³ Tsono ndilikumutumila kwaimwepo mwakukhulumiza kana ndadziwa kuti bzvinthu bzvilikuzandifambila tani. ²⁴ Inepo ndinikulupilila kuti inepo ndekha ndinizakwanisa kufikambo kwanuko tsapano-pano. ²⁵ Ndakhumbuka kuti ndizakutumileni mubale wathu Epafurodhitasi. Umweyu mudamutuma kuti azandithandize pabzvinthu bzvandinifuna, ndiye iye adaphata basa nakumenya nkondo yachiklistu pabodzi naimwepo. ²⁶ Iye ali kuyangana chayibzvo kuti akuwoneni mwentse, pomwe wakhalipa chaibzvo thangwe lakuti imwepo mudabva kuti iye akhaduwala. ²⁷ Chadidi adaduwala , ndiye akadafika pafupi naimpfa. Koma Mulungu adamumvela ntsisi. Alibe kumvelewa ntsisi iye yekha, komambo nainembo pomwe ndiye adchosa kusuwa kukulu. ²⁸ Ndilo thangwe lamweli likulu lilikundiyitisa kuti ndimutumile kwaimwepo, kuti muzakondwe pakumuwona, ndiye kusuwa kwangu kunizamalambo. ²⁹ Mutambileni namtima wentse thangwe ndimubale namfumu. Lemekezani wanthu wentse ninga umweyu. ³⁰ Pakuti umweyu adatopita mungozi yakufuna kutayikiliwa namoyo wake ndiye akatofuna kufa thangwe labasa laklistu, kutsungila kuti andipase tandizo ilo thandizo imwepo mukadandipasa lini.