¹ Amubone! Buzuba bwa Jehova buyosika zisalala zyenu niziyowabwa akkati kenu. ² Nkambo njobungania manyika manyika woonse kuzolwisya Jelusalemu kunkondo nkabela chisi chiyozundwa. Maanda ayomwayigwa abanakazi bayojatwa chibbalo. Chisela chachisi chiyotolwa mubuzike, pesi bamwi bantu tabakoyogwisigwa muchisi. ³ Pesi Jehova uyonyampula akuyolwisya kumanyika manyika mbuli mbwakali kuchita mubuzuba bwalumamba. ⁴ Nkabela mubuzuba oobo zituta zyamawulu akwe ziyoyimikila achilundu chama Olifa, chilikujwe lya Jelusalemu. Lino chilundu cha Olifa chiyowanduka akkati kuzwa kujwe kuyosika kumbo kukabe mumpata mupati loko nkabela chisela chimwi chachilundu chiyobweda musule kunyika achisela chimwi chiyoswena kumusanza. ⁵ Elyo uyozwa aansi amumpata akkatai ka Jehova azilundu, nkambo mumpata uli akkati kazilundu uyotana kumabbazu aayo ku Azeli. Nkabela uyozwa mbubonya mbumwakachija muzuzumo wanyika mumazuba a Uziya, mwami wa Juda. Mpawo Jehova Leza wangu uyosika abasalali boonse bayooba anguwe. ⁶ Lino mubuzuba oobo takukoyooba mumuni, impeyo nikuba chaanda. ⁷ Mubuzuba oobo, kuyooba sikati luzutu Jehova ulizi obo, takukoyoba isikati amansiku pe, nkambo chiindi chagoko kuyooba mumuni. ⁸ Mubuzuba obo kuyokunka maanzi mawumi kuzwa ku Jelusalemu. Chisela chimwi chawo chiyoya kulwizi lwakujwe achisela chimwi chiyoya kulwizi lwakumbo, mumayinza amuchilimo ⁹ Jehova uyooba mwami wanyika yoonse. Mubuzuba obo kuyooba Jehova alikke, Leza womwe, azina lyakwe lyomwe alilikke. ¹⁰ Inyika yoonse iyoba mbuli Alabba, kuzwa ku Gebba kuyosika ku Limoni kumusanza wa Jelusalemu. Jelusalemu uyoyinkilila anembo akunyampuka akusyala mubusena bwawo, kuzwa kumulyango wa Bbenjamini kubusena oko mulyango mutaanzi mpubede, kusika kumulyango wakuchooko, akuzwa kuchisanza cha Hananeli akuyosikila kudindi lyamwami lyakusinina wayini. ¹¹ Nkabela bantu bayokkala mu Jelusalemu alimwi takukoyooba lunyonyooko kuzwa kuli Jehova akubalwisya lwabo. Jelusalemu uyokkala chakulyiiba. ¹² Eechi nchechuumyo cha Jehova nchaati wumye bantu boonse baza kukuzolwisya nkondo yaku Jelusalemu: Uyobozeka nyama zyabo nibachimvwiamawulu aabo. Menso abo ayobola mumankolyo aabo andimi zyabo ziyobola mukanwa lyabo. ¹³ Mubuzuba obo bayosikilwa lupyopyongano lupati alimwi janza lyawumwi uyotambika kujulu chakumana umwi awumwi mwenzinyina. ¹⁴ Juda uyobusya inkondo akulwisya Jelusalemu. Nkambela lubono lwabamasi loonse lwengelede manyika--ingolida, nsiliva azyakusama zyiingi loko. ¹⁵ Alimwi lumyo lulimbubonya luyowida ambizi akumabbiza akunkamela ambong'olo abanyama boonse muzilawo abalabo bayoswanana epenzi likozyenie. ¹⁶ Lino ziyochitikila boonse basyeede mumanyika manyika aakasika kuzolwisya Jelusalemu bayelede kwinkilila kunembo munyaka amunyaka kukuyokkomba Mwami, Jehova wamakamu akuzoolya pobwe lyazilawo. ¹⁷ Chiyochitika kufumbwa nyika amanyika alansi abula kuyosika ku Jelusalemu kukuzokomba mwami, Jehova wamakamu, lino Jehova takoyoyeta mvula kuli mbabo. ¹⁸ Akulako luzubo lwabana ba Ijipita talwiinki kunembo, lino tabakoyotambula mvula pe. Chuumyo cha Jehova chiyowuma manyika woonse atiinki kuyobamba pobwe lyazilawo. ¹⁹ Eechi nchenchicho chisubulo chabana ba Ijipita achisubulo chanyika yoonse bakatiinka kukuyobamba Pobwe lya Zilawo. ²⁰ Mubuzuba obo, milangu yambizi iyoti, ''Salila Jehova,'' azilako zibikkilo zyamu ng'anda ya Jehova ziyooba mbubonya mbjuli mitiba ilikunembo lyachipayililo. ²¹ Nkambo zilongo zyoonse zili mu Jelusalemu amuchisi cha Juda ziyosalalila Jehova waakamu, boonse basika kuzopayila bayolida akujika muli nzizyo. Mubuzuba oobo takukoyoba limbi musambazi mung'anda ya Jehova wamakamu.