Mwanakazi uwambuula kumwalumi, ¹ Ndilidubaluba lya Syaloni, dubaluba lyamumupata. Mwalumi uwambula kumwanakazi ² Mbuli dubaluba akati kamaamvwa, mbwabede muyandwi wangu akati kabanakazi bachikula. ³ Mbuli musamu wa apilikkoti akati kaminsamu yamulusaka, mbwabede muyandwi wangu akati kabaalumi bachikula. Ndakkala munsi lyachenzule chakwe akukondwa kupati loko, alimwi muchelo wakwe ulanona kukulabila kwangu. ⁴ Wakandeta mung'anda yawayini, alimwi chilitondezyo chakwe kuli ndime lwali luyando. Mwanakazi kayobwambula kumwalumi ⁵ Ndibukulusye a chibunge alimwi nduumbulizye nkambo ndawizuuka aluyando. Mwanakazi uwambuula kalyambilila ⁶ Ijaanza lyakwe lyachimweensi lilikunsi kwamutwe wangu, alimwi ilyalulyo lwakwe lilandikumbata. ⁷ Mwanakazi uwambuula kulibamwi banakazi Njanda kukonka, bana basimbi ba Jelusalemu, aansya bana bamumyunda, kuti tamukoyobusya nikuba kukachizya luyando manedo lukakondelezye. ⁸ Mwanakazi kawambuula kalyambilila Ngoyo muzuzumo wamuyandwi wangu, swilila ngoyo uzobuza, ulasotoka muzilundu, ulasotoka mutulundu. ⁹ Muyandwi wangu ulimbuli nsya na mbuli mwana wanjelele; langa, uliimvwi kusule abulambo bwesu, ulayuna ampulunguzyo, ulalitondezya. ¹⁰ Muyandwi wangu waambula kati, ''Buka, muyandwi wangu; Mubotu wangu, koobola twinkamwi. ¹¹ Langa, impeyo yayinda; imvula yayinda alimwi yiinka. ¹² Maluba aboneka munyika; ichiindi chakukwezuula ntabi, achakulila kwatuyuni chasika, alimwi kulila kwanziba kwamvwigwa munyika yesu. ¹³ Mukuyu wabizisya inkuyu zyawo, alimwi masansa afulula; apa kununkilila kwawo. Buka, luyando lwangu, mubotu wangu alimwi sika kuli ndime. ¹⁴ Inziba yangu, mumajenga amabwe, mumajenga asisikene achilundu, leka ndibone busyu bwako. Ndimvwe ijwi lyako, nkambo ijwi lyako ndidono, busyu bwako buleebeka.'' Mwanakazi kayobwambula kumwalumi ¹⁵ Tujatile bawumpe, itwana twabawumpe tunyonyongania myunda yamasansa, nkambo myunda yesu yamasansa ili kufulula. ¹⁶ Muyandwi wangu nguwangu alimwi ndiwakwe; ulachela akkati kamaluba akukondwa. Mwanakazi uwambula kumwalumi. ¹⁷ Koya oko, muyandwi wangu, izuba kalitana yoya alimwi myenzule yachija. Koya oko; koba mbuli nsya na mwana wanjelele muzilundu.