³ Eezi nzintu ezyo nzitwakamvwa akwiiya, zintu eezyo basikale nzibakatwambila. ⁴ Tatukoyowasisa kulunyungu lwabo. Tuyowambilana zyalane kulunyungu lwabo. Tuyowambila zyalane liboola aatala akulumbayizya kweelede milimo ya Jehova, inguzu zyakwe, azigambyo zyakwe nzyakachita. ⁵ Nkambo wakabusya chizuminano chamilayizyo muli Jakkobbu akubikka milawo mu Izilayeli. Wakalayilila basikale besu kuti, bakaziyiisye bana babo. ⁶ Wakalayilila eechi kuti zyalani liboola lizibe lulayo lwakwe, bana batana kuzyalwa, aabo bayowambila bana babo. ⁷ Mpawo bayobika bulangizi bwabo muli Leza akutayoluba milimo yakwe pesi kubamba milayizyo yakwe. ⁸ Eelyo tabakoyokozyania aba sikale babo pe, bakali zyalane likatazya akupapila, zyalani lyakali amyoyo iitaluleme pe, alimwi myuuya yabo teyakali lipedelede pe akutasyomeka kuli Leza. ⁹ Ba Efulemu bakapakatide amatu, pesi bakabweeda musule mubuzuba bwankondo. ¹⁰ Tebakabamba chizuminano pe a Leza, alimwi bakakkaka kulemeka mulawo wakwe. ¹¹ Bakaluba milimu yakwe, zintu zigambya eezyo nzyakabatondezya. ¹² Bakaluba zintu zigambya ezyo nzyakachita kumenso abasikale babo munyika ya Ijiputi, munyika ya Zoyani. ¹³ Wakanduula lwizi akubazubusya; wakayimikizya maanzi mbuli bulambo. ¹⁴ Isikati waka beenzya ajoba mpawo busiku boonse amumuni wamulilo. ¹⁵ Wakandula indomba munkanda, alimwi wakabapa manzi miingi, alikuzutila kuzuzya bunike bwalwizi. ¹⁶ Wakeetya tulonga kuzwa kundomba akweetya manzi mbuli milonga. ¹⁷ Nekubaboobo bakinkilila kunembo kukumubisizya, kabapapila aatala aa Uusumpukide Loko munkanda. ¹⁸ Bakazundikizya Leza mumyoyo yabo kukukumbila zilyo kukuzulizya kusukama kwabo. ¹⁹ Bakakalalila Leza,; bakaamba kuti, ''Sena Leza ulakonzya kutubambila tebuli munkanda na? ²⁰ Bona, nakawuma indomba, maanzi akatuntumuka atulonga twakeeta. Pesi ulakonzya kupa chinkwa alubo na? Sena ulapa bantu bakwe nyama?'' ²¹ Jehova nakamvwa eechi, wakanyema aboobo mulilo wakayakila Jakkobbu, alimwi lunyemo lwakwe lwakabukila Izilayeli, ²² nkambo tebakazuminana muli Leza pe akutasyoma mulufutuko lwakwe. ²³ Nekuba boobo wakalayilila majulu akajula milyango yakujulu. ²⁴ Wakawisizya aansi imana kuti balye, akubapa zilyo kuzwa kujulu. ²⁵ Bantu bakalya chinkwa chabaangelo. Wakabatumina zilyo zyiingi. ²⁶ Wakawungya muuwo wakujwe mujulu, alimwi munguzu zyakwe wakeenzya muuwo wakumusanza. ²⁷ Wakabawisizya nyama, mbuli lusuko, bayuni biingi mbuli museele wakulwizi. ²⁸ Zyakawida aakati kamalabba aabo, kuzyunguluka mateente aabo. ²⁹ Mpawo bakalya akukkuta. Wakabapa eecho nchibaka sukeme. ³⁰ Pesi tebakalina zulila pe; zilyo zyabo zyakachili mumilomo yabo. ³¹ Eelyo lunyemo lwa Leza lwakababukila akujaya basinguzu babo. Wakaselusizya aansi bakubusi ba Izilayeli. ³² Nekuba kachili boobu, bakayinkilila anembo kukubisya akutazuminina milimu yakwe igambya. ³³ Nkiinkako Leza wakachesya mazuba aabo; myaaka yabo yakazuzigwa abuyoofu. ³⁴ Kufumbwa chiindi naalikubapenzya, alimwi bali kubweeda akulanguula changuzu. ³⁵ Bali kwibaluka kuti Leza wakali ndomba lyabo akuti Leza Usumpukide Loko wakali muvuni wabo. ³⁶ Pesi bali kumujata kumenso amilomo yabo akumubejela amajwi aabo. ³⁷ Nkambo myoyo yabo teyakaluleme pe kuli n guwe, alimwi tebakasyomekede pe kuchizuminano chakwe. ³⁸ Pesi lwakwe, mbakali siluzyalo, wakaba lekelela kundubizyo zyabo akutabanyonyoona. Mbombubo, chindi chiingi wakabwedezya lunyemo lwakwe akutabusya bukali bwakwe. ³⁹ Wakayibaluka kuti mbantu banyama, muuwo wiinda akutabweeda. ⁴⁰ Mbwiingi buti nkindakamupapila munkanda akumukalazya muchimpayuma! ⁴¹ Bakayindulula akwindulula kabasunka Leza akulebya Uusalala wa Izilayeli. ⁴² Tebakayeya atala anhuzu zyakwe, mbwakabavuna kuzwa kuli sinkondonyina ⁴³ muchindi nakachita zitondezyo ziyoosya mu Ijiputi azigambyo munyika ya Zowani. ⁴⁴ Wakasandula milonga yaba Ijiputi kuba bulowa kuti batakonzyi kunywa kuzwa kutulonga twabo. ⁴⁵ Wakatumina mazi kuti akabalume abasyachaande aabo bakanyoonyona nyika yabo. ⁴⁶ Zilyo zyabo wakakupa kuchisozi akubeleka kwabo wakakupa kuchisozi. ⁴⁷ Wakanyonyoona misansa yabo, achivulamabwe amisamu yamusikkamo. yabo achivulamabwe chiingi. ⁴⁸ Wakawisizya ng'ombe zyao chivulamabwe azivuubwa zyabo wakazyumya lulabi. ⁴⁹ Lunyemo lwakwe luyoosya lwakababukila. Wakatumina bukali, kukalala amapenzi mbuli batumwa baleta bubi. ⁵⁰ Wakababilila lunyemo lwakwe nzila; takabagwisya pe kuzwa kulufu pesi wakabapedekezya kumapenzi. ⁵¹ Wakajaya bana babo batanzi boonse mu Ijiputi, bana batanzi boonse banguzu zyabo mumatente aa Hamu. ⁵² Wakagwisya bantu bakwe mbuli mbelele akubazulwida munkanda mbuli butanga. ⁵³ Wakabeenzya chakukwabililwa akutayoowa, pesi lwizi lwakaumba basinkondonyina. ⁵⁴ Mpawo wakabasisya kumugaano wanyika yakwe isalala, kuchilundu eechi nchelyakavuba janza lyakwe lyalulyo. ⁵⁵ Wakatanda zisi kuzwa kunembo lyabo akubaabila lukono lwabo. Wakakkazika mikowa ya Izilayeli mumatente aabo. ⁵⁶ Nekubaboobo bakazundikizya akusunka Leza Uusumpukide Loko akutalondola milayizyo yakwe iluleme. ⁵⁷ Tebakalisyomekede pe akuchita Chalweeno mbuli bamawisi; bakapambuka mbuli buta bweena. ⁵⁸ Nkambo bakamukalazya amasena aabo atantukide mpawo bakamukalazya kubuzuba bwalunyemo azikozyano zyabo. ⁵⁹ Chiindi Leza nakamvwa eechi, wakakkalala akubakkaka chakumaninina ba Izilayeli. ⁶⁰ Wakasisya busena busalala ba Syilo, tente ndyakakkede aakati kabantu. ⁶¹ Wakazuminina nguzu zyakwe kubuzike akupa bulemu bwakwe mukuboko kwasinkondo. ⁶² Wakaaba bantu bakwe kupanga, alimwi wakanyema aalukono lwakwe. ⁶³ Mulilo wakasukutya bakubusi babo bachalumi, alimwi bakubusi babo abanakazi bachikulatebakali anyimbo zyanabwiinga. ⁶⁴ Bapayizi babo bakawida apanga, alimwi bamukabafu babo tebakalila pe. ⁶⁵ Mpawo Mwami wakabuka mbuli umwi uuzwa kung'onzi, mbuli muzundi woompolola nkambo kawayini. ⁶⁶ Wakabatandila musule basinkondonyina; wakababika kumasampu aalyonse. ⁶⁷ Wakakaka tente lya Jozefu, alimwi takwe pe wakasola mukowa wa Efulemu. ⁶⁸ Wakasala mukowa wa Juda a chilundu cha Ziyoni nchakali kuyanda. ⁶⁹ Wakayaka busena busalala mbuli majulu, mbuli nyika eeyo njakayimika kwalyoonse. ⁷⁰ Wakasala Devidi, mulanda wakwe, alimwi wakamugwisya muzyaata zyambelele. ⁷¹ Wakamugwisya kukwembela zinyonsya abana bazyo, alimwi wakamweeta kukuba mweembeli wa Jakkobbu, bantu bakwe, awa Izilayelu, lukono lwakwe. ⁷² Devidi wakabeembela akusyomeka kwa moyo wakwe, alimwi kubeenzya muluzibo bwamaboko aakwe.