¹ Pawulu a Timoti, ibabelesi ba Kkilisito Jesu, ibabelekela bantu ba Leza basalala muli Jesu Kkilisito ibali ku Filipi, abeendelezi bapati abadikoni. ² Iluzyalo alumuno luzwa kuli Leza taata wesu a Mwaami Jesu Kkilisito alube kulindinywe. ³ Ndilumba Leza wangu chindi choonse nindimuyeeya, ⁴ lyoonse, munkombyo zyangu zyonse nzindimuchitila, nkekkomba mukubotelwa ⁵ nkaambo kakujatisyania andinywe ijwi kuzwa kubuzuba butaanzi kuzosika lino. ⁶ Ndilakkutisika anchicho chintu eechi, chakuti oyo iwakatalika mulimo mubotu mulindinywe uyoyinkilila kunembo akuchita kuti akawumane ado kubuzuba bwa Jesu Kkilisito. ⁷ Chilikabotu kuti ndilimvwe kabotu aatala andinywe nkaambo muli mumoyo wangu. Moonse mwalijisini andime chaluzyalo nikuba mukujalilwa muntolongo akububotu bwangu amukusisikizigwa kwajwi. ⁸ Nkaambo Leza ngukamboni wangu, mukumuyandisya kwangu moonse alwetelelo lwa Kkilisito Jesu. ⁹ Aboobo njeyi inkombyo yangu: Kuti luyando lwanu lukomene mubwiingi lyoonse muluzibo akumvwisisisya koonse ¹⁰ kuchitila kuti mubotye eecho chibotu kwindilila, alimwi mukuti mube aabwini akutaba amulandu mane busike buzuba bwa Kkilisito, ¹¹ nkamuzwide muchelo wabululami ooyo uuza kubulemu akutembawulwa kwa Leza kwindila muli Jesu Kkilisito. ¹² Lino ndiyanda kuti muzibe, nobakwesu, kuti ezi zyakachitika kulindime zyagwasya loko kukunyampula kwendelela kwajwi. ¹³ Nkaambo kaako inketani zyangu muli Kkilisito zyaboneka kuli basikulinda muunzi wa Mwaami akubantu boonse. ¹⁴ Ibakwesu biingi bajana kumvwisisisya mu Mwaami akambo kanketani zyangu, alimwi baba abukozu bwakwambula ijwi kabatayoowi. ¹⁵ Nchonzyo bamwi bakonzya kukambawuka Kkilisito chakutangalilana abulwani na, alimwi bamwi bachita amoyo mubotu. ¹⁶ Ibamusule bachita aluyando, mukuziba kubi ndabikwa aano kuti ndikwabilile ijwi. ¹⁷ Pesi ibakayinda bakambawuka Kkilisito amizeezo yakulipa, pepe mubwini. Bayeeya kuti balandiinda mpuwo aawo nenchisungidwe. ¹⁸ Ani niinzi lino ? Ado kuti munzila zyoonse nikuba zyajungwe lyakubeja kana lyakasimpe - Kkilisito uli kukkambawukwa, alimwi eezi zilandibotezya. Iyii, alimwi ndiyobotelwa, ¹⁹ nkaambo ndilizi kuti eezi ziyondipa kwangununwa kwinda munkoombyo zyenu alugwasyo lwa Muuya wa Jesu Kkilisito. ²⁰ Kuzumana kwabulangizi alusyomo lwangu kuti taakwe mbundiyooba amawuse pesi ndiyoba aanguzu, lino mbuli kuti lyoonse, Kkilisito uyomemezegwa mumubili wangu, nikuba mukupona kana kulufu. ²¹ Nkaambo kuti ndipone ngu Kkilisito alimwi kufwa nimpindu. ²² Pesi aanoli kwali kuti ndipona munyama, eechi chaamba mulimu uzyala michelo kuli ndime. Pesi ndilasala chili ? Nsichizi pe. ²³ Nkaambo ndilimanikizigwe azintu zibili. Ikupeekezya kwangu nkuti ndizwe ndikabe aa Kkilisito, kachili nchechintu chibotu loko, ²⁴ Pesi kupona munyama mukubona kachili chintu chipati kuli ndinywe. ²⁵ Mukukkutisika acheechi, ndilizi kuti ndiyochala akwinkilila kunembo andinywe, kuchitila kuzwidilila akubotelwa kwenu mulusyomo. ²⁶ Kuchitila kuti muli ndime mukajane twaambo twingi tutakamupe kupakala muli Kkilisito Jesu aawo ndakuubola lubo kulindinywe. ²⁷ Inywe amulyendelezye biyomunzila iyendelana aajwi lya Kkilisito,kuchitila kuti ndaboola kuzomubona kana tendabola,ndikonzye kumvwa aatala andinywe, kuti muliimvwi njii mumuuya omwe, amuzeezo oomwe wakufundumanina lusyomo lyajwi kali antoomwe. ²⁸ Tamukongwi nikuba muli iili inzila abaabo mbimu suleene aabo. Eechi nchikozyanisyo kuli mbabo ichaamba kumwayika kwabo, pesi kuli ndinywe ndufutuko - alimwi luzwa kuli Leza. ²⁹ Nkaambo lwakapegwa biyo kuli ndinywe akambo ka Kkilisito kutali kuti biyo musyome mulinguwe, pesi akuti mumufwabile, ³⁰ kamuli ensandulo lukazyanio ndumwakabona mulindime, alimwi lino mulalumvwa muli ndime.