¹ Pawulu, mwaange waKkilisito Jesu, amukwesu Timoti kuliFilimoni, mweenzuma uyandika kali mubelesima, ² akuliAfia muchizi wesu, akuliAkkipasi silumambama, akumbungano iiswaanana mung'anda yenu. ³ Luzyalo alube kulindiwe aluumuno luzwa kuliLeza Taata wesu aMwami Jesu Kkilisito. ⁴ Ndikkala nkelumba Leza wangu aawo mpekwaamba munkombyo zyangu, ⁵ nkaambo ndimvwa aatala alusyomo ndojisi kuMwami Jesu aluyando ndojisi kubantu bakwe boonse basalala. ⁶ Ndikomba kuti kwaabana kwalusyomo lwako kuboneke akukupa kumvwisisisya kuzwide kwachintu choonse chibotu nchituli aacho muliKkilisito. ⁷ Ndakabotelwa akuumbulizigwa kupati nkaambo kaluyando lwako, akuti myoyo yabantu baLeza basalala yakakatalusigwa anduwe mukwesu. ⁸ Lino, nikuba kuti ndijisi boonse busichaamba muliKkilisito bwakukulayilila webo kuchita nzyooyelede kuchita, ⁹ pesi akaambo kaluyando, ndikumbila kulinduwe kwiinda kuti, mebo, ndePawulu, munene mpawo lino mwaange waKkilisito. ¹⁰ Mebo ndikukumbila nduwe aatala amwana wangu Onesimasi, ngundakazyala munketani zyangu. ¹¹ Nkaambo chiindi chamana taakalikwe mulimu kulindiwe, pesi lino wabamilimu koonse kulinduwe akulindime. ¹² Ndamutuma alimwi kulinduwe, uliinguwe moyo wangu. ¹³ Ndalikuyandisya kuti ndimubambe afwiifwi andime kuti andikutawukilile nduwe milimu kwachiindi chiniini nkechili munketani nkaambo kamakani mabotu. ¹⁴ Pesi teendalikuyanda kuchita chimwi chintu kanditakwe nzumizyo yako. Teendalikuyanda pe kuti nchito zyako mbotu zizwe kukusinikizigwa pesi kuzwa kububotu bwakuliyandila. ¹⁵ Chimwi chiindi wakaanzanisigwa anduwe kwakayindi, kuchitila kuti azooboololele limwi. ¹⁶ Tachizoobi muzike limbi pe, pesi kwiinda muzike, waba mwana wakwesu muyandisi. Uliyandikene, kapati kulindime, chakwindilila kulinduwe, kunyama amuMwami. ¹⁷ Na kondijisi mbuli similimunyokwe, mutambule mbuli ndime. ¹⁸ Na kali wakakubisizya nikuba ujisi chikweelete chamusyoboonzi, chibike kulindime. ¹⁹ Mebo, ndePawulu, ndalemba eezi akuboko kwangu. Mebo lwangu ndizooliya, kanditadomboli kuti webo abube bwako ulichikwelete kulindime! ²⁰ Mbombubo , mukwesu, ndigwasye muMwami, bukulusya moyo wangu muliKkilisito. ²¹ Akusyoma kwangu aatala akuswiilila kwako, ndakulembela. Ndizi kuti ulachita kwiinda nzindakumbila. ²² Mundibambile lubo ng'anda yabeenzu, nkaambo ndilangilila kuti kwiindila munkombyo zyenu ndizooba andinywe lubo. ²³ Epafulasi, mwaangema muliKkilisito Jesu, wamujuzya. ²⁴ AMakko alakwe, aAlisitakkasi aDemasi aLukka, babelesima. ²⁵ Luzyalo lwaMwami wesu Jesu Kkilisito lube amuuya wenu. Ameni.