¹ Aaya ngimatalikilo aamakani mabotu aaJesu Kkilisito, Mwana waLeza. ² Mbuli mbukulembedwe kuli Isaya musinsimi, ''Mulange, ndatuma mutumwa wangu kunembo lyako, ooyo uyoobambila nzila yako. ³ Ijwi lyayooyo woompolola munkanda, ''Mubambe inzila yaMwami; mululamike inzila zyakwe''. ⁴ Joni wakasika, kabbizya munkanda akukambawuka kweempwa kwakulekelelwa zibi. ⁵ Chisi choonse chaJudiya abantu boonse bamuJelusalemu bakayinka kulinguwe. Bakabbizigwa anguwe mumulonga utegwa Jodani, kabazumina zibi zyabo. ⁶ Joni wakalikuzwaata zizwaato zyaboya bwankamela alukumba lwachikumba muchibuno chakwe, nkabela wakali kulya insozi abuchi bwamulusaka. ⁷ Wakaambuula kati, ''Ooyo uza musule lyangu ulijisi nguzu kwiinda ndime, lukole lwansangu zyakwe nsyeeleli pe kulwaangununa. ⁸ Ndamubbizya amaanzi, pesi we uyoomubbizya aMuuya Usalala''. ^{11 9} Zyakachitika mumazuba aayo kuti Jesu wakazwa kuNazaleta yamuGalili, mpawo wakabbizigwa aJoni mumulonga utegwa Jodani. ¹⁰ Kachizwa biyo mumaanzi, Jeso wakabona julu kalijulika, alimwi Muuya kaselukila aalinguwe muchiimo chanziba. Lino kwakasika ijwi kuzwa kujulu, lyakati, ''Ulimwana wangu uuyandwa, ndikondwa kapati anduwe''. ¹² Mpawo Muuya wakamusungilizya kuya munkanda. ¹³ Wakali munkanda mazuba aalimakkumi aane, kaliikusunkwa aSatani. Wakali abanyama balusaka, alimwi bangelo bakamukutawukila. ¹⁴ Lino musule lyakwaangwa kwaJoni, Jesu wakasika muGalilaya kakambawuka makani mabotu aLeza. ¹⁵ Wakati, ''Chiindi chazuzikizigwa, alimwi bwami bwaLeza bwaba afwiifwi. Musanduke musyome makani mabotu''. ¹⁶ Naakalikuyobweenda kumbali aalwizi lwaGalili, wakabona Sayimoni aEndulu mwana wakwabo waSayimoni kabawala kanyandi mulwizi, nkaambo bakali bazubi babaswi. ¹⁷ Jesu wakabaambila kuti, ''Kamuza, munditobele, alimwi ndiyoomuchita bazubi babantu''. ¹⁸ Akufwambaana bakasiya tunyandi twabo mpawo bamutobela. ¹⁹ Eelyo Jesu naakachilikuyobweeda kuya kunembo, wakabona Jemusi mwana waZebbediya amwana wakwabo Joni; bakali mubwaato kabaluka tunyandi. ²⁰ Wakabayita alimwi bakasiya wisi Zebbediya antoomwe ababelesi mubwaato mpawo bamutobela. ²¹ Lino bakasika kuKkapenawume, alimwi kabuli buzuba butegwa Sabata, Jesu wakanjila muchikombelo wakuyiisya. ²² Bakagamba kunjiisyo yakwe, nkaambo wakali kuyiisya chamuntu ujisi nguzu, tali mbuli balembi pe. ²³ Mpawo aawo mwaalumi wakali aamuuya mubi wakakwiila muchikombelo, kati, ²⁴ ''Tulaanzi anduwe, Jesu waNazaleta? Waza kuzotunyonyoona na? Ndilikwizi kuti nduwe ni. Nduwe Usalala Mwana wa-Leza!''. ²⁵ Jesu wakakalalila muuya mubi kati, ''Wumuna, zwa mulinguwe!'' ²⁶ muuya mubi wakamuwaalila aansi mpawo wazwa mulinguwe akukwiila kupati. ²⁷ Bantu boonse bakagamba, akubuzyania, kabati ''Niinzi eechi? Ninjiisyo impya ilaanguzu! Ukonzya kutanda myuuba mibi imuswiilizye!'' ²⁸ Mpuwo yakwe yakazula muchisi choonse chaGalili. ³¹ Musule lyakuzwa muchikomelo, bakayinka kung'anda yaSayimoni a Endulu, kabali antoomwe aJemusi aJoni. ³⁰ Lino banyinazyala baSayimoni bakalikuchiswa ntuntumaanzi, alimwi bakamwaambila Jesu aatala amukayintu ooyu. ²⁹ Wakaza wamujata kuboko, wamubusya; intuntumaanzi yakazwa, mpawo watalika kubakutawukila. ³² Golezya ndileelyo, izuba kalili lyabbila, bakamweetela boonse balwazi bachiswa abakanjidwe myuuya mibi. ³³ Bantu boonse bamugunzi eeli bakabungana aamulyango. ³⁴ Wakaponia boonse bakali aamalwazi asiyenesiyene akutanda myuuya mibi myiingi, pesi takazumizya myuuya mibi kwaambuula nkaambo yakalimwizi. ³⁵ Wakabuka kuseni, kakuchisiyasiya; wakayinka kusisikene waakukomba. ³⁶ Sayimoni abaabo mbakali aabo bakamuyanduula. ³⁷ Bakamujana bamwaambila bati, ''Bantu boonse baliikukuyanduula''. ³⁸ Wakabaambila wati, '' Ngatuzwe tuye kumbi, kumadolopo aalaafwiifwi, kuti ndikakambawuke akulako. Nchindazidilide ookuno''. ³⁹ Wakayinka kuGalili yoonse, kakambawuka muzikombelo zyabo akutanda myuuya mibi. ⁴⁰ Sichipele wakasika kulinguwe. Wamumukumbila; wafugama wati, ''Na koyanda, ulakonzya kundisalazya''. ⁴¹ Mukuba aalweetelelo, Jesu wakatandabika kuboko kwakwe wamuguma, kaamba kuti, ''Ndilayanda . Kopona'' ⁴² Mpawo aawo chipele chakamana, waba kabotu. ⁴³ Jesu wakamulayilila changuzu mpawo wamuti koya. ⁴⁴ Wakamwaambila kuti, ''Ubone kuti towambili naba omwe muntu, pesi koya, ukalitondeezye kumupayizi, ukapayilile kusalazigwa kwako, mbuli Mozesi mbwaakalayilila, kuti bukabe bukamboni kuli mbabo''. ⁴⁵ Pesi wakiinka watalika kumwaaya makani koonse koonse zyakachitya kuti Jesu taakachili kukonzya kunjila dolopo kaangunukide pe, wakakkala kunze kumyuunzi. Nikuba boobo bantu bakachili kusika kulinguwe kabazwa kumasena asiyenesiyene.