¹ Eeli ndijwi lya Jehova lyakasika kuli Mikka waku Molesyeti mumazuba a Jotamu, Ahazi, a Hezekkiya, baami ba Juda, eelyo ndyakabona aatala a Samaliya a Jelusalemu. ² Muswilile, moonse nobantu. Teelela, yonyika, azyoonse zilimunduwe. Mulekele Mwami Jehova abekamboni wenu, Mwami kuzwa mubusena bwakwe busalalisya. ³ Langa, Jehova ulazwa mubusena bwakwe; uyoselela aansi akuzolyatuula masena asumpukide aanyika. ⁴ Zilundu ziyooba munsi lyakwe, amimpata iyowanzaana, mbuli nzuka ilikunembo lyamulilo, alimwi mbuuli maanzi aatilwa aabusena bunkuneeme. ⁵ Eezi zyoonse nkaambo kamulandu waJakkobbu, alimwi nkaambo kazibi zyang'anda yaIzilayeli. Milanduunzi yaJakkobbu? Takuli kuti niSamaliya? Ngaali masena aJuda asumpukide? Takuli kuti niJelusalemu? ⁶ Lino njochita Samaliya mulwi watongo mumuunda, busena bwakubyalila masansa, alimwi njomulundika mabwe aansi mumumpata mpawo nkamuvumbule intalisyo zyakwe. ⁷ Zyoonse zikozyanio zyakwe ziyootyolwa zikabe tumpanzi, alimwi njomwayuula zyonse zikozyanio zyakwe. Mbukunga wakabunganisya zipo zyakwe kuzwa mumpindu zyabumambi, ziyooba zyakufola zyabumambi alimwi.'' ⁸ Nkaambo kazeezi njowomoka akukwiila, njoyenda mumaano alimwi nkendichinkuna; ndiyowomoka mbuli bamwaaba akuyowomoka mbuli bapolo. ⁹ Nkaambo zilonda zyakwe tazisilikiki, nkambo zyasikila Juda. Zyasikila akumilyango yabantu bangu, kuJelusalemu. ¹⁰ Utakaambi aatala anzizyo muGati; mutakalili kwalyoonse. KuBbeti Liyafula ndiyobumbuluka mulusuko. ¹¹ Ukiinde mbali, bakkala kuSyafiya, muchinkuna amubweeme. Basikukkala muZanani mutakazwidi aanze. Beti Ezelu woomoka, nkambo lukwabililo lwabo lwatolegwa. ¹² Nkaambo basikukkala muMaloti balalindila chakwizuuka kumakani mabotu, nkaambo mapenzi asika aansi kuzwa kuli Jehova kumilyango yaJelusalemu. ¹³ Wanga nkalaki kunkamu yabasimbizi, bakkala kuLakkisyi. Webo, Lakkisyi, mwakali ntalisyo yazibi zyaZiyoni, nkaambo bubisyi bwaIzilayeli bwakajanikene mulinduwe. ¹⁴ Eelyo muyoopa zipo zyakwanzaana kuMolesyeti Gati; dolopo lyaAkkizibbu liyosulula baami baIzilayeli. ¹⁵ Ndiyomweetela lubo sikumuzunda, nobasikukkala kuMalesya, busongo bwaIzilayeli buyooza kuAdulamu. Nyoola mutwe wako akuyolinenguula masusu eenu nkambo kabana beenu aabo mbemukondelwa. ¹⁶ Amukalichite mabbuwa mbuli makubi, nkaambo bana benu bayooya kunyika zyabweenzu kuzwa kulindinywe.