¹ Jesu nakaseluka kulundu makamu mingi akamutobela. ² Eelyo, sichinsenda wakasika kulinguwe alimw wakamufugamina, wakati,''Mwami na kuzumina ulakonzya kundisalazya. ³ Jesu wakatambika kuboko kwakwe alimwi wakamwampa, wakati, ''Ndilazumina.Salala.'' Mpawawo wakasalazigwa kuchipele. ⁴ Jesu wakati kulinguwe, ''Kutakabi muntu ngowambila pe. Koya ukalitondeezye kumupayizi, alimwi ukape chipo kuli Mozesi nchakakulayilila, kuti bukabe bukamboni kulimbabo.'' ⁵ Jesu nakalikunjila muKapenawuma, silutwe wamwaanda wakaza kulinguwe wamukumbila, ⁶ alimwi wakati, ''Mwami, mubelesi wangu ulilede, ulilebukide akumvwa machise mapati.'' ⁷ Mpawo Jesu wakati kulinguwe, ''Ndilasika ndizoomuponie.'' ⁸ Silutwe wamwaanda wakasandula kati, ''Mwami, tandeeleli pe kuti unjile mung'anda yangu pesi. Wamba biyo jwi, mubelesi wangu ulapona. ⁹ Ambebo ndilimunsi aabweendelezi nkeendelezya, ndijisi basilumba munsi lyangu. Ngandati kuliyooyu, 'Koya' alimwi ulenda, alimwi akulumwi, ngandati, 'Sika' alimwi ngawaza,akulumbi mubelesi, ngandati, 'chita echi; alimwi ulachichita.'' ¹⁰ Jesu naakamvwa eezi, wakagamba alimwi wakati kuli aabo bakali kumutobela, ''Nchobeni ndamwaambila kuti takwe pe ngundakali ndajana uli aalusyomo luli boobu muIzilayeli. ¹¹ Ndamwaambila, biingi bayoozwa Kumbo aKujwe, alimwi bayoolya aatebuli aAbbulahamu, Ayizekki, aJakkobu, mubwami bwakujulu. ¹² Pesi bana babwami bayootandilwa aanze mumudima, kutakabe kulila akuluma ntwino.'' ¹³ Jesu wakati kulinguwe, ''Koya! akube mbuli mbuwasyoma.'' Alimwi wakapona. ¹⁴ Jesu naakasika mung'anda yaPita, wakabona banyinazyala baPita kabachisidwe ntuntumaanzi. ¹⁵ Jesu wakabaguma kuboko. Mpawo bakabuka bamukutawukila. ¹⁶ Eelyo nikwakaba golezya, bakeeta bantu kuli Jesu bakanjidwe amyuuya mibi. Wakiitanda myuuya mibi ajwi alimwi wakaponia boonse bakali kuchiswa. ¹⁷ Munzila eyi zyakazuzikizigwa eezyo zyakaambidwe amusinsimi Isaya, zyakati, ''Nguwelwakwe ubweza machise esu akunyampula malwazi esu oonse.'' ¹⁸ Lino Jesu nakabona makamu kamuzyungulukide, wakabalayilila kuti bazubukile mutala eliya lyalwizi lwa Galilaya. ¹⁹ Mpoonyawo mulembi wakasika kulinguwe alimwi wakati, ''Mwiiyi, Ndiyokutobela kufumbwa nkoya.'' ²⁰ Jesu wakati kulinguwe, ''Bamwaba balijisi mapako, alimwi tuyuni twakujulu tulazizumbo, pesi Mwana a Muntu takwe ampalazika mutwe wakwe.'' ²¹ Umwi wabasikwiiya wakati kulinguwe, ''Mwami, ndizumizye saansi kuti njiinke alimwi ndikavwikke ndeende.'' ²² Pesi Jesu wakati kulinguwe, ''Nditobele alimwi usiye bafwide bazikkane lwabo.'' ²³ Lino Jesu nakanjila mubwato, basikwiya bakwe bakamutobela alimwi. ²⁴ Elyo kwakaba iguwo ipati mulwizi, lumwi bwato bwavumbwa amayuwe. Pesi Jesu wakali winkilila koona. ²⁵ Basikwiya bakaza kulinguwe alimwi bakamubusya, bakati, ''Tugwasye, Mwami; twamba kumana kufwa !'' ²⁶ Jesu wakati kulimbabo, ''Nkamboonzi nomuyowa, inywe nobalusyomo lunini? Mpawo wakabuka alimwi wakawumuzya iguwo alimwi alwizi. Mpoonya kwakaba kumuuna kupati. ²⁷ Bantu bakagamba alimwi bakati, ''musyobonzi wamuntu ulibobu, kuti nikuba iguwo alimwi alwizi zilamulemeka?'' ²⁸ Lino Jesu nakasika kulubazu lumbi alimwi kubantu bakkala kuchisi chitegwa Gadala bantu babili bakanjidwe madimoni bakaswanana anguwe. Bakali kuzwa kuzibunda alimwi bakali abukali alubo tebakali kuyanda muntu winda munzila eyo. ²⁹ Elyo, bakoompolola bakati, ''uyandaanzi kulindiswe Mwana wa Leza? Wasika okuno kuti uzotufwabye nkachitanasika chiindi chibambidwe. ³⁰ Lino sikwembela wabutanga bwangulube wakaliwo kalikucheezya,katali kule loko ambabo. ³¹ Madimoni akaliswini kukombelezya Jesu alimwi kati, 'Na watutanda, tutumine kubutanga bwangulube.'' ³² Jesu wakati kulimbabo, ''Kamuya! Madimoni akazwa akiya mungulube, alimwi zyoonse ngulube zyakafwambana kukunkulikila mujenga zyanjila akufwida mumanzi. ³³ Abo bakali kwembela butanga bwengulube bakachija alimwi bakaya mudolopo alimwi bakamba zyoonse, kapati loko azyakachitika kumuntu wakanjidwe dimoni. ³⁴ Mpawo, Lyoonse dolopo lyakasika kuti baswanane a Jesu. Nibakamubona bakamukombelezya kuti azwe muchisi chabo.