¹ Jesu wakazwa aanze achikombelo weenda. Basikwiiya bakwe bakeza kulinguwe kuzomutondezya mayake achikombelo. ² Pesi wakabasandula wati kulimbabo, ''Tamuzibwene pe zintu eezi zyoonse? Nkasimpe ndamwambila, takukwe ibbwe liyochala atala alimwi litakwe kuyobwalwa aansi.'' ³ Nakachikkede atala lyechilundu cha Olivusi, basikwiiya bakamusikila kumbali bati, ''twambile, ndilili nikuyochitika zintu eezi? Ninzi chiyoba chitondezyo chakuboola kwaako alimwi amamanino anyika?'' ⁴ Jesu wakabasandula wati kulimbabo, ''Amuchenjele kuti kutabi umwi umusowa. ⁵ Nkaambo kuyozwa bayingi muzina lyangu. Bayowaamba kuti, 'ndindime Kkilisito, álimwi bayosowa bantu bayingi. ⁶ 'Muyomvwa nkondo azyaambo zyankondo. Amukalange kuti zitakamukatazyi pe, alimwi eezi zintu zyeelede zichitike; pesi mamanino katanakuba pe. ⁷ Nkambo inyika iyobukila nyikanyina, alimwi bwami abwaminyina. Kuyoba nzala alimwi amuzuzumina wenyika mumabazu asiyene siyene. ⁸ Pesi zintu ezi zyoonse matangunino biyo amachise amuntu sikutumbuka. ⁹ Elyo bayomutola kukwezegwa akuyomujaya. Muyosulwa enyika zyoonse akambo kezina lyangu. ¹⁰ Eelyo bantu bayingi bayobukilwa, alimwi akwaba umwi awumwi akusulana umwi awumwi. ¹¹ Basinsiimi bayingi babeji bayoza akuzosowa bayingi. ¹² Nkambo bupapi buyovula, luyando lwabayiongi luyotontola. ¹³ Pesi oyo uyokakatila kusikila kumamanino uyofutulwa. ¹⁴ Ayamakani mabotu abwami ayokawukwa munyika yoonse mbuli bukamboni kumanyika oonse. Eelyo mamanino ayosika. ¹⁵ ''Lino, nimuzobona chisesemyo chisisidwe, chaakambwa a Daniyele musinsiimi,, kayiimvwi mubusena busalala'' ( ooyo ubala amvwisisisye). ¹⁶ Amuchite kuti aabo balimuJudiya bachijile kuzilundu, ¹⁷ ooyo uli achiluli changanda ataseluki aansi kuzobweza nikuba chimwi chintu chilimungánda, ¹⁸ alimwi amuchite ooyo ulimumuunda aleke kujokela kuzobweza chakusama chakwe. ¹⁹ Pesi maawe kubabo bamintide akuli baabo banyonsya bana mumazuba aayo! ²⁰ Amukombe kuti kuchija kwenu kutakabi muchindi champeyo nikuba mubuzuba bwasabata. ²¹ Nkambo kuyoba mapenzi mapati loko, aayo atana kubonwa pe kuzwaida kumasangunino anyika kuzosikila lino, pe, takwe nikuzoba zili mbubobu pe. ²² Nakuti mazuba aayo pesi afwinsigwa, tekwali kunooba naba muntu walikuzofulwa. Pesi nkambo kabasale aayo mazuba ayofwinsigwa. ²³ Lino kuti umwi muntu wamba kulindinywe kuti, 'Langa, ngoyu Kkilisito!'mutakamuzuminini pe akuzisyoma. ²⁴ Nkambo baKkilisito bakubeja abasinsimi babeji bayosika akuchita malele mapati azigambyo, kuti baleesye, nikuba, aabo basale. ²⁵ Amubone, ndamwambila kazitana kuchitika pe. ²⁶ Lino kuti baamba kuti kulindinywe, 'Mulange, ulimunkanda, 'mutakayinki pe oko kunkanda. Nikuba kuti, 'mulange, mwali mungánda zyamukati, 'mutakasyomi pe. ²⁷ Mbuli lulabi mbulumweka kuzwa kubuzwezuba alimwi lulamvwikkila koonse kusikila kububbila, oko kuyoba nkuboola kwa Mwana Muntu. ²⁸ Oko kuli munyama ufwide, nkukubungene makubi. ²⁹ Pesi mpawawo kwakumana mazuba amapenzi aya izuba liyosiya, mweezi tuchiko kuyopa mumuni pe, inyenyezi ziyoowa kuzwa kujulu, alimwi manguzu ejulu ayotikinisigwa. ³⁰ Lino chitondezyo cha Mwan a Muntu chiyoboneka mujulu, alimwi misyobo yoonse iyolila. Bayomubona Mwana a Muntu kalikuza atala lyamayoba akujulu anguzu alimwi abulemu bupati. ³¹ Uyotuma baangelo bakwe akulila kwamweembo, alimwi bayobunganya antomwe basale bakwe kuzwa kumabazu aane, kuzwa kumpela imwi kuyosika kumpela yomwe yakujulu kusikila kuliimwi. ³² Amwiiye chiiyo kuzwa kumukuyu. Aawo mutabi nuuba muteete akusyuuka matu, ngamwaziba kuti mayiinza abafwifwi. ³³ Lino zilikozyenie, naa mwabona zintu ezi zyoonse, mweelede kuziba kuti waba afwifwi, amulyango loko. ³⁴ Nchobeni ndamwambila, izyalani eeli talikoyomana pe kazitanachitika pe zintu eezi. ³⁵ Ijulu anyika ziyomana, pesi majwi aangu takwe natakamane pe. ³⁶ Pesi takukwe uuzi buzuba nikuba chiindi niziyochitika eezi, nikuba baangelo bakujulu, nikuba Mwana a Muntu, pesi Taata alike. ³⁷ Mbuli kumazuba a Nowa, mbukuyooba kubola kwa Mwana a Muntu. ³⁸ Mbuli kumazuba kakutana boola zambangulwe bakali kulya alimwi akunywa, kabakwatana akukwatanisigwa kusikila kubuzuba Nowa mbwakanjila mubwato., ³⁹ alimwi takukwe anchibakalizi pe kusikila izambangulwe lyabatola - lino mbukuyoba kusika kwa Mwana a Muntu. ⁴⁰ Eelyo bantu babili banoli mumuunda - umwi akati kabo uyobwezegwa, alimwi umwi uyosiigwa. ⁴¹ Banakazi babili banoli kabaziiya aziiyo - umwi akati kabo uyobwezegwa, alimwi umwi uyosiigwa. ⁴² Nkinkaako amuchenjele, nkambo tamuzi pe buzuba Mwami wenu nayoboola. ⁴³ Pesi amuzizibe eezi, kuti kwanoli mwani ngánda walizi chindi akati kamansiku sikubba namusikila, walikuno lindide alimwi talikunoleka ngánda yakwe pe kuti itululwe. ⁴⁴ Nkinkaako anywebo mulelede kulibambila, nkambo Mwana Muntu uyobola muchiindi nchimutalangilide pe. ⁴⁵ ''Lino nguuli mulanda usyomekede alimwi kalimusongo ooyo wakabikwa asimalelo wakwenkuti abaambe ngánda yakwe kuchitila kuti abape chakulya kuchiindi cheelede? ⁴⁶ Uli achoolwe ooyo mulanda uyojanwa kachita oobo. ⁴⁷ Nkasimpe, ndamwambila kuti simalelaakwe uyomubika kuti akabambe zintu zyoonse. ⁴⁸ Pesi mulanda mubi kuti waamba eezi mumoyo wakwe, 'Simalelaangu wanonoka, ⁴⁹ alimwi akatangune kuuma balanda bakwe, alimwi kulya akunywa azidakwa, ⁵⁰ lino simalelaakwe ooyo mulanda uyosika mubuzuba ooyo mulanda mpatalibambilide pe alimwi achindi nchatazipe. ⁵¹ Simalelaakwe uzomugonkola goonkola akumwaaba kubusena kuti bakabe aamwi abasikuupawupa, ooko kuyoba kulila akuluma ntwino.