¹ Musule aachiindi Jesu wakeenda muzisi amumyuunzi kayabukambawuka akwaamba makani mabotu aatala abwaami bwa Leza. Balikumi ababili bakali antoomwe anguwe, ² alubo bakali aamwi awumwi mwanakazi wakaponesegwa kuzwa kumyuuya mibi akuzilwazi. Meli wakalikutegwa Magadalini ooyo wakaponesegwa kuzwa kuma dayimona ali musanu aabili; ³ Jowana, mukayintu wa Chuza, mubanzi wa Helodi, Susana abamwi biingi bakalikumusanina, kuzwa kulubono lwabo. ⁴ Lino makamu aabantu naakabungene, bakaza kulinguwe kabazwa mumadolopo asiyene siyene wakabaambila chikozyanisyo. ⁵ "Mulimi wakaya kukubyala mbuto zyakwe, awo kalikubyala imwi yakawida munzila yalyatwa aamawulu abantu atuyuni twakujulu twakiilya. ⁶ Imwi yakawida aabwe, yakamena chakufwambaana, mpawo yakanyana, nkaambo teyakalikwe kuteta aansi. ⁷ Imwi yakawida mumaamvwa, mpawo maamvwa akakomena aamwi ambuto mpawo akiiyasa mbuto. ⁸ Pesi imwi yakawida mumuse mubotu mpawo yakazyala michelo yakali abana biinda mwaanda." Jesu nakaamana kwamba eezi zintu, wakoompola wati, "Ooyo uulamatwi aakumvwa, ngamvwe." ⁹ Basikwiiya bakwe bakabuzya kuti chaambayi chikozyanisio eechi. ¹⁰ Wakati, "Luzibo lwansiswa zya Leza lulipedwe kulindinywe, pesi kulibamwi ndaambula muzikozyanisyo, nkaambo 'balabona pesi tababonesesyi, mpawo balamvwa pesi balakonzya kutamvwisisisya.' ¹¹ Lino nchechi chaamba chikomzyanisyo eechi: mbuto ndijwi lya Leza. ¹² Aabo bali munzila mbaabo bamvwa, pesi dyabbulosi wasika wabweza jwi kuzwa mumyoyo yabo, kuchitila kuti tabasyomi akufutulwa. ¹³ Mpawo aabo bali aabbwe mbaabo, banga balimvwa jwi, balalimvwa chakukondwa. Pesi tabakwe miyanda; balasyoma kwakayindi kaniini mpawo muchiindi chamasunko balawida aansi. ¹⁴ Mmbuto yakawida mumaamvwa mbantu banga balimvwa jwi, pesi nibeenda mnzila zyabo, balayaswa azintu zyenyika abuvubi antoomwe abubotu bwabuumi oobu, alimwi michelo yabo tiikomeni pe. ¹⁵ Pesi imbuto yakawida mumuse mubotu, aaba mbaabo, bamvwa jwi amoyo wachoonzyo alusyomo, balalijata akuzyala michelo kabali alukakatizyo ¹⁶ Lino, taakwe, uunga nadomeka lampi wali vumba achisuwo mna kulibika smuchinkuma. Ulalibika aachibikilo chalampi kuchitila kuti limunikile boonse banjila mung'anda, kuti babone mumuni. ¹⁷ Nkaambo tachiwo pe chisisikene chitakaleke kuzibwa, nikuba nsiswa iitakaleke kuzibwa mumuni wazoosika. ¹⁸ Aboobo amuswiilizye kabotu nkaambo ooyo uula nchajisi uyooyungizigwa, pesi ooyo uutakwe nchajisi nikuba eezyo nzyayeeya kuti ulijisi uyoonyanzigwa." ¹⁹ Mpawo banyina abakwabo bakasika kuli nguwe, pesi taakwe nibakamuswena afwiifwi pe nkaambo kamakamu miingi. ²⁰ Bakamwaambila kuti, "Banyoko abakwanu, baliimvwi aanze bayanda kukubona." ²¹ Pesi Jesu wakavwiila wati kuli mbabo, "Baamba abakwesu mbaabo bamvwa jwi lya Leza akulichita." ²² Lino bumwi buzuba wakanjila mubwaato abasikwiiya bakwe, mpawo wakati kulimbabo. "Atuye kulilimbi bbazu lya lwizi." Bakayamba. ²³ Kabachiyabuyamba, wakawona. Imvula mpati ilaaguwo yakasika aatala alwizi, bwaato bwabo bwakatalika kunjila maanzi alimwi bakali baba mubuyumuyumu. ²⁴ Mpawo basikwiiya ba Jesu bakaza kuli nguwe bamusinsimuna bati, "Mwami, Mwami, twaamba kufwa. Wakabuka mpawo wuumuzya guwo amaanzi mpawo kwabatama. ²⁵ Mpawo wakati kuli mbabo, "Luli kuli lusyomo lwanu?" Pesi bakayoowa akugamba, bakabuzyania umwi awumwi kabati, "Ngwani ooyu, iguwo amanzi eelyo zilamuswiilizya?" ²⁶ Bakayamba bakusika kuchisi cha Gelasensi, chili miutala eeliya alwizi lwa Galili. ²⁷ Lino Jesu naakalyata aanyika wakaswaana umwi mwaalumi wakali aama dimoni. Wakali waba achiindi chilamfu katakwe naakazwete zigogo pe, alubo teensi wakali kukkala mung'anda pesi wakali kukkala kuzyuumbwe. ²⁸ Aawo naakabona Jesu waka kwiila akuwida munsi lakwe wati kulinguwe ajwi pati, "Uli aamakanze nzi andime, Jesu mwana wa Leza uusumpukide loko? Ndakukumbila utandipenzyi." ²⁹ Nkaambo Jesu wakali walayilila muuya mubi kuti uzwe mumuntu. Nkaambo wakali wamupenzya kwachiindi chilamfu, nikuba wakuli kunoonga waangwa nsimbi anketani, wakalikuzidunsula alimwi wakalikunoonga wazulwidwa amuuya ooyo kuya mulusaka. ³⁰ Mpawo Jesu wakamubuzya wati, "Nduweni zina lyako?" Wakasandula wati, "Ligiyoni," nkaambo bakali biingi badayimona bakamunjide. ³¹ Aawo bakali kumukumbila kuti atabatandili mumulindi uutagoli. ³² Lino butanga bwa ngulube bwakali kuchela munsi aachilundu. Mpawo badayimona aabo bakakumbila kuti banjizigwe mungulube eezyo, mpawo Jesu wakaazumizya. ³³ Madayimona aayo akazwa mumuntu aakunjila mungulube, alimwi ingulube eezyo zyakachijaana zyankunukila mulwizi zyayinkila. ³⁴ Lino aabo bakali kweembela tanga lya ngulube nibakabona zyakachitika, bakachijanina muguzi bakuluula zakachitika. ³⁵ Mpawo bantu biingi bakasika kuti bazobone zyakachitika, mpawo bakasika kuli Jesu bazojana kuli mwaalumi ooyo kuli nguwe badyabbulosi nkubaka tandwa. Walkalikkede munsi lya Jesu, kazwete alimwi kali waba amaanu kalikabotu mpawo bakayoowa. ³⁶ Lino aabo bakazibona zyakachitika bakababuzya mbuzyakachitika zyakuponesegwa kwa mwaalumi wakali aaba dayimona mbaakaponesegwa. ³⁷ Lino bantu bamu Gerasensi bakakumbila Jesu kuti azwe kuli mbabo, nkaambo obakali baba aakuyowa kupati. Aboobo wakaknjila mubwaato kuti basangune kuyamba babweede. ³⁸ Mwaalumi ooyu wakagwisigwa ba dyabbulosi wakakumbila Jesu kuti bayinke aamwi, pesi Jesu wakamukakila wati, ³⁹ "Bweeda kumunzi wako ukabaambile zyoonse Leza nzyakuchitila." Ooyu mwaalumi wakayinka kayobwaamba mudolopo lyoomnse aatala anzyakamuchitila Jesu. ⁴⁰ Lino Jesu nakabweeda, makamu akamutambula nkaambo bakali kumulangila. ⁴¹ Amubone umwi mwaalumi uutegwa Jayilasi wakali uumwi wabeendelezi bachikombelo, wakasika wawida kumawulu aa Jesu mpawo wamukumbila kuti ayinke kung'anda yakwe, ⁴² nkaambo mwanakwe uzyedwe alikke, musimbi wakali amyaaka yakachibe kkumi ayibili wakali waamba kufwa. Awo Jesu nakali munzila kuya nkuko, makamu makamu aabantu akamuzyunguluka chaku syankana. ⁴³ Lino aawo kwakaliwo mwanakazi wakali kuzwa gazi kwamyaaka iilikumi ayibili mpawo wakabelesya mali yakwe yoonse kuzibbadela, pesi taakwe naakapona pe. ⁴⁴ Wakasika kusule lya Jesu mpawo wakajata lupipito lwa jansi lyakwe, mpawo aawo gazi lyakayimikila kuzwa. ⁴⁵ Jesu wakati, "Ngwani wandi guma?" Boonse nibakakazya Pita wakati, "Makamu makamu aabantu alikuzyungulukide alimwi akusyankania." ⁴⁶ Pesi Jesu wakati, "Mpali wandiguma nkaambo ndaziba kuti inguzu zyazwa mulindime." ⁴⁷ Lino mwanakazi ooyo naakabona kuti takuyubiki wakaza ulakankamba akuwida ansi kunembo lyakwe. Wakalungununa kunembo lyabantu boonse nchaakamugumina akuponesegwa nkwaakachita mpawo aawo. ⁴⁸ Mpawo wakati kuli nguwe "Mwanangu, lusyomo lwako lwakufutula. Yinka muluumuno." ⁴⁹ Naakachili kwaambula, umwi wakasika kuzwa kung'anda yamuzuluzi wachikombelo, wati, "Mwana wako wafwa kale. Utachimukatazyi pe muyiisyi." ⁵⁰ Pesi Jesu naakamvwa eezi wakasansula Jayilasi wati, "Utayoowi, syoma biyo, mpawo ulaponesegwa." ⁵¹ Naakasika kung'anda, taakwe muntu ngwaakazumizya kunjila aawe, kunze kwa Pita a Joni a Jemusi, awisi wamwana abanyina. ⁵² Lino boonse bakali kuusa akumulila, pesi wakati, "Mutalili pe; tafwide pe ulikoona biya." ⁵³ Pesi bakamuseka, nkaambo bakalizi kuti ulifwide. ⁵⁴ Mpawo wakamujata akuboko akoompolola, wakati, "Yo mwana buka!" ⁵⁵ Muuya wakwe waka boola, mpao aawo wakabuka. wakabalayilila kuti bamupe chakulya. ⁵⁶ Bazyali bakwe bakagamba pesi wakabalayilila kuti bataambili muntu achakachitika.