¹ Munzi wakazwide bantu lino wabatongo wabambuli mukamufu, nekuba wakali mupati kuzisi. Wakali namalelo kuzisi, pesi lino waba muzike. ² Ulalila chakutyoka mansiku, misozi yakwe ijala maseya aakwe. Tawope kubayandisi bakwe umumbulizya. Benzinyina bonse bakamusowa. Bakaba basinkondonyina. ³ Musule akufwaba akupenzegwa, Juda yakatolwa mubuzike musule lyakupenzegwa akubelesegwa kapati . Ukkede mukati kazisi pesi tijene kulyokezya pe. Basikumupenzya boonse bamwenzya akati kamafwabi akwe. ⁴ Migwagwa ya Ziyoni ilalila nkambo tawope usika kumapobwe abikidwe. Milyango yakwe yoonse yabula bantu. Bapayizi bakwe balangonga. Basimbi bakwe balimukupengana, akuli nguwe kwalula luu. ⁵ Basikumupenzya baba basimalelo bakwe; basinkondonyina balokuzwidilila Jehova wamupenzya akuvula kwazibi zyakwe. Bana bakwe batete batolwa mubuzike kunembo lyasikutanda. ⁶ Waswekelwa bulemu bwakwe boonse mwana musimbi wa Ziyoni. Basilutwe bakwe baba mbuli insya zyabula machelelo, akwinka kabatakwe manguzu kuli sikubatanda. ⁷ Mumazuba akwe akupenzegwa akubula munzi, Jelusalemu uyoyeeya zyonse zibotu nzyakalazyo mumazuba ayinda. Bantu bakwe nibakawida mujanza lyasikubatanda takwepe wakamugwasya. Basinkondonyina nibakamubona bakaseka kunyonyooka kwakwe. ⁸ Jelusalemu wakabisya loko, nkinkaako, wakanyansigwa mbuli chintu chisofweede. Bonse ibakali kumulemeka bamubawusya nkambo bakabona chinswe chakwe. ulang'onga akuyanda akuyanda kuchija. ⁹ Busofwi bwakwe buli muziwaalo zyakwe. Takayeeya janza lyakwe, kuwa kwakwe kwakali kugambya. Tawope wakamumbuulizya. Wakalila, ''Amulange kupengaana kwangu, Jehova, nkambo sinkondoma walisumpula!'' ¹⁰ Sinkondoma wabika janza lyakwe alizyonse zintu zyesu. Wababona bezisi kabanjila abusena bwakwe busalala, nikuba wakali wamba kuti batanjili pe muchikombelo chakwe. ¹¹ Bantu bakwe boonse bakang'onga kabayanduula chinkwa. Bakapa zipo zyabo kuti bajane kulya kuti bapone. Langa, Jehova, undiyeeye, nkambo ndasampawulwa. ¹² Tachili chintu chigambya, kuli ndinywe nimwinda? Amulange, mpali na upenzegwa mbuli ndime, mbuli kuti Jehova wandimvwisya machise muzuba bwakunyema kupati. ¹³ Wakatuma muulo wakanji akuakuwazunda mafuwa angu kuzwa kujulu. Wayalila mawulu angu kansabwe akundibwedezya kusule. Wandichita ndabula undigwasya mpawo wandimana manguzu. ¹⁴ Ijokwe lyazibi zyangu zyangiidwe ajanza lyakwe. Zilisuminwe zyasikubikwa mumukosi wangu. Wandibuzya manguzu. Leza wandipedekezya mumanza abo, mpawo nsichikonzyi kwimikila. ¹⁵ Leza watontela kumbali boonse balumi basinguzu bakali kundilwanina. Wandichitila kabunga kandilwanisya kuti azikizye baalumi bangu balamanguzu. Leza walyata nakalindu waku Juda abusena budininwa masansa. ¹⁶ Nkaambo kazezi zintu ndilalila, menso angu alikukkunka misozi; nkambo mumbulizi ulikule ambebo, ooyo ubusilizya buumi bwangu. Bana bangu babulide ubaswaya nkambo sinkondoma wandizunda. ¹⁷ Ziyoni watalamuna maboko akwe; tawope uyanda kumumbulizya. Jehova wambila aabo bakkede munsi lya Jakkobbu kuti babe basinkondonyina. Jelusalemu nchintu chisofweede kulimbabo. ¹⁸ Jelusalemu uliluleme, nkambo ndakakazya milawo yakwe. Muswilile nobantu bonse, mubone kufwaba kwangu.. Banakalindu abaalumi basinguzu bangu bakinka mubwange. ¹⁹ Ndabiita bayandwi bangu, pesi bandeena, Bapayizi abapati bangu bamana mumunzi kabachiyanduula chakulya kuti bapone. ²⁰ Ndilange, Jehova nkambo ndapeengana; mwida lyangu mwamyonga, amoyo wangu wakkatazika, nkambo tendakaswilila pe. Aanze, ipanga lilokulizya; mung'anda kuzwide lufu. ²¹ Bakuumwa kulila kwangu, pesi tawope undumbulizya. Basinkondoma boonse bamvwa mapenzi angu, alimwi balabotelwa anziwandichitila. Walyeeta izuba ndiwakaambide. ²² Lino bachite babe mbuli ndime. Bubi bwabo boonse ngabuze kubusyu bwako. Bachite mbuli mbuwakandichitila nkambo kazibi zyangu. Nkwiingi kulila kwangu amooyo wangu wizuuka.