¹ Jemusi, mubelesi waLeza aMwami Jesu Kkilisito, kumisyobo yabantu ilikkumi ayibili iisanseene munyika: Mwajuzigwa!. ² Muzibweze mbuli lukondo loonse, nobakwesu, aawo nimuswaanana amakataazyo asiyenesiyene. ³ Mulizi kuti kusunkwa kwalusyomo lwenu kuzyala banangatizi. ⁴ Amulekele bunangatizi, bumaninsye mulimu wabo kuchitila kuti mukonzye kukomena akumaninina, kamutachibuli chintu pe. ⁵ Pesi na umwi wenu kayanda busongo, ngabukumbile kuliLeza, ooyo uupa mubwiingi alimwi katakalalili pe kuli baabo bakumbila, mpawo uyoomupa. ⁶ Pesi ngakumbile mukusyoma, kakutakwe kudoneeka. Nkaambo kufumbwa muntu uudoneeka ulimbuli juwe mulwizi litontwa aluuwo alimwi kaliyumbwa kumabazu woonse. ⁷ Ooyo muntu atayeeyi kuti uyootambula chimwi chintu kuzwa kuMwami pe. ⁸ Muntu uli boobo ulaamizeezo iibili, takkalinkene pe munzila zyakwe zyoonse. ⁹ Ngapakale mukwesu muchete muchuuno chakwe chaajulu, ¹⁰ pesi muvubi muchuuno chakwe chilaansi, nkaambo uzooyinda mbuli dubaluba lyalusaka musokwe. ¹¹ Nkaambo zuba lizwa akupya akutenta alimwi akuyumya masokwe mpawo dubaluba lilaloka, alimwi bubotu bwalyo ngabwamana. Muli njiyeyi nzila, muntu muvubi uyooyangala aakati kalweendo lwakwe. ¹² Ulilongezezegwe ooyo unangatila muchiindi chamasunko, nkaambo aazunda masunko uyootambula musini wabuumi, eelyo lyakasyomezegwa aabo bayanda Leza. ¹³ Kutakabi muntu utakaambe kuti aakusunkwa, ''Ndasunkwa aaLeza.'' nkaambo Leza tasunkwi achibi pe, alimwi we lwakwe takwe ngwasunka pe. ¹⁴ Pesi umwi awumwi muntu usunkwa akupeekezya kwakwe, ikumukwelela kule akumweneena. ¹⁵ Impeekezyo niyamita ilatumbuka chibi mpawo nichakomena, chazyala lufu. ¹⁶ Tamweneenwi, nobakwesu bayandwa. ¹⁷ Choonse chipo chibotu achoonse chipo chimaninide chizwa kujulu. Chizwa kujulu kuli Wisi wamimuni. Leza tasanduki pe mbuli zilenge, zilimbuli mweenzule, mbuzisanduka. ¹⁸ Leza wakasala kuti tuzyalwe ajwi lyakasimpe, kuchitila kuti tube musyobo wamichelo mitaanzi kuzintu zyoonse nzyakalenga, eezyo zikonzya kupegwa luzutu aJesu. ¹⁹ Mulichizi eechi, nobakwesu bayandwa: amuchite kuti muntu woonse afwambaane kumvwa, atafwambaani kukwambuula, nikuba kunyema. ²⁰ Nkaambo kunyema kwamuntu takuzuzikizyi bululami bwaLeza pe. ²¹ Nkikaako amugwisye woonse mawunda mawunda aabulewusi busesemya bwazibi. Mukulifwiinsya amutambule ijwi lyakabyalwa, eelyo likonzya kuvuna myuuya yenu. ²² Amube bachiti bejwi peepe basikuswilizya biyo, kamuliikulyeena. ²³ Nkaambo na muntu kamvwa biyo ijwi pesi katalichiti, ulimbuli muntu uuleyeba busyu bwakwe mbububumbidwe muchiboniboni. ²⁴ Ulalyeeba, pesi aazwa biyo waliluuba mbabede. ²⁵ Pesi muntu uulanga kabotu mumulawu walwaangunuko, alimwi kayinkilila kunembo akuchita boobo, katali sikumvwa biyo uuluba, ooyu muntu ulalongezegwa munchito zyakwe. ²⁶ Na umwi muntu kaliyeeya kuti ngwabuna Leza, pesi katazyotololi lulimi lwakwe, weena moyo wakwe, alimwi nzyasyoma nzyabuyo. ²⁷ Lusyomo lusalala lutakwe kampenda kunembo lyaLeza aaTaata ndyakuti: kugwasya bamuchaala abamukabafu kulizibachisa, akuliyobola lwabo beni chakutaba akampenda nikaba komwe kamunyika.