¹ Jehova wakati kuli Nowa, ''Kweza iwebo ampuli yako, munjile mubwato, nkambo ndabona kuti muzyalane eeli ulasalala kunembo lyangu. ² Kubanyama boonse basalala uyoyeta bali musanu ababili beenze alimwi musanu ababili bazyazi. Kuzwa kubanyama basofwede, kuli mbabo ukabweze babili, mwenze amuzyazi wakwe. ³ Alimwi kubayuni bamumulengalenga, ukabweze musanu ababili beenze abazyazi bali musanu ababili, kuti kulondolwe buzyalane bwabo kubuyanza bwanyika yoonse. ⁴ Nkaambo mumazuba alimusanu aabili ndiyochita kuti imvula ikawe aanyika kwamazuba aali makumi oone amansiku aali makkumi aane. Ndiyolobya kuzwa abuyale bwenyika choonse chipona nchindakalenga.'' ⁵ Nowa wakachita zyoonse Jehova nzyakamulayilila. ⁶ Nowa wakali amyaka ili myanda musanu awumwi yakuzyalwa awo izambangulwe nilyakeza anyika. ⁷ Nowa, bana bakwe balombe, mukayintu wakwe, abamukabana bakwe bakanjila mubwaato boonse akambo kamanzi aazambangulwe. ⁸ Ibanyama ibasalala abanyama basofwede, bayuni, azyonse ziyavula aanyika, ⁹ zibili zibili, mwenze amuzyazi, zyakeza kuli Nowa akunjila mubwato, mbubonya mbuli Leza mbwakalayilila Nowa. ¹⁰ Zyakachitika kuti musule amazuba musanu aabili imanzi azambangulwe akazula enyiika. ¹¹ Mumwaka wakuzuzya myaka myanda musanu awumwi yabuumi bwa Nowa, mumwezi wabili, wabuzuba bwakkumi amusanu amazuba obile mumwezi ooyo, muzuba ndilyo elyo, imibanzo yoonse yabunike bupati bwakaanduka bwajulika, alimwi impulunguzyo zyajulu zyakajulika. ¹² Imvula yakatalika alimwi yakawa aanyika kwamazuba makkumi aane amansiku aali makkumi aane. ¹³ Mubuzuba mbubobo Nowa abana bakwe balombe, Shemu, Hamu, a Jafeti, amukaintu wa Nowa, abakayintu babana bakwe botatwe kabali antoomwe, bakanjila mubwaato. ¹⁴ Bakanjila boonse antomwe awumwi munyama mbuli mumisyobo yabo, alimwi awumwi musyobo wazivuubwa mbuli musyobo wazyo, alimwi achimwi chintu chiyavula chakali kuyavula anyika mbuli musyobo wazyo,awumwi musyobo wazyuuka chili amabaaba. ¹⁵ Izibili kulizyoonse zyenyama izyakali zyamuuya wabuumi zyakaza kuli Nowa alimwi zyakanjila mubwato. ¹⁶ Ibanyama bakanjila bakali beenze abazyazi bamisyobo yoonse; zyakanjila mbuli Leza mbwakali wamulayilila. Mpawo Jehova wakajala ikkoma musule lyabo. ¹⁷ Mpawo izambangulwe lyakasika anyika kwamazuba makumi oone, alimwi maanzi akavula alimwi akanyampula bwaato akubutola ajulu anyika. ¹⁸ Imaanzi akasinsinkania kuvumba nyika, alimwi bwaato bwakayibuka aatala lyamuyaba wamaanzi. ¹⁹ Imaanzi akatanta kuvulisya anyika chakuti zyoonse zilundu zilamfu zyakali munsi lyamulengalenga zyakavumbwa. ²⁰ Maanzi akatanta kwamakkiyubbiti kkumi amusanu aatala lyansonge yazilundu. ²¹ Zyoonse zintu zipona ezyo zyakali kweenda aanyika zyakafwa - bayuni, zivuubwa, banyama bamulusaka, zyoonse zinyamankala zipona izyakali kupona mubwiingi bwamweelo wanyika, aboonse bantu. ²² Boonse banyamankala bapona ibakali kupona anyika, aabo bakayoya muuya wabuumi, kuzwa mumpemo zyabo, bakafwa. ²³ Nkokwamba kuti choonse chintu chipona ichakali aatala anyika chakakukululwa chaloba, bantu abanyama ezintu ziyavula abayuni bamumulengalenga. Zyoonse zyakaloba kuzwa aanyika. Nowa biyo abaabo mbakali aabo mubwaato mbibakachaala. ²⁴ Imaanzi akakkala aanyika kwamazuba mwaanda amakkumi musanu