¹ Jozefu wakalayilila mulindi wanganda yakwe wati, " Zuzya abantu azilyo, mubwingi mbubakonzya kunyampula, alimwi bika mali aamuntu awumwi mumulomo wesaka lyakwe . ² Bika yangu nkomeki yasiliva mumulomo wesaka lyamunini, alimwi antomwe emali yakwe ya zilyo." Mulindi wanganda wakachita mbubonya Jozefu mbwaka mwambila. ³ Chindi chamafumina, elyo bantu bakategwa beende lwabo amadonki abo. ⁴ Nibakazwa kunze achisi pesi tebakali na bbilisya pe, Jozefu wakati kumupati wanganda yakwe, "Nyampuka tobela bantu aba, alimwi nuwakubezya ukabambile kuti, ' Nkambonzi nimubwedezya chibi kuchibotu? ⁵ Eyi tesi ninkomeki eyo mwami wangu njanywida alimwi njabelesya kukusondya? Mwachita chibi, eechi chintu nchimwachita."' ⁶ Mulindi wanganda yakwe wakababweza akwamba majwi aya kulimbabo. ⁷ Bakati kulinguwe, " Nkambonzi mwami wesu naamba majwi aya alibobu? Kuzwa kubalanda bako chilatondwa kuchita chintu chilobu. ⁸ Langa, mali njitwajana mumulomo yamasaka, twayibozya lubo kuli nduwe kuzwa kunyika yaKkenani. Mbubuli lino mbutunga tulabba munganda yamwami wako isiliva na ingolida? ⁹ Na kulumwi wabalanda utajanwe ayo, ngakafwe, alimwi aswebo tuyoba bazike bamwami." ¹⁰ Mulindi wanganda wakati " Lino aboobo akube mbubonya mbulimajwi enu. Oyo uyojanwa enkomeki uyoba muzike wangu, alimwi nobamwi munoli tamujisi mulandu." ¹¹ Mpawo awumwi muntu wakafwambana kweta saka lyakwe akulitula ansi, alimwi awumwi wakajula saka lyakwe. ¹² Mulindi wanganda wakalangula. Wakatalikila kumupati akuyosyalizya kumunini, alimwi inkomeki yakajanwa musaka lyaBbenjamini. ¹³ Lino bakadelula zyakusama zyabo. Awumwi muntu wakanga donki lyakwe akubweda kudolopo. ¹⁴ Juda abakulana bakwe bakaza kuliJozefu kunganda. Wakachiliwo alimwi bakavundama kunembo lyakwe ansi. ¹⁵ Jozefu wakati kulimbabo, nchinzi eechi nchimwachita? Sa tamuzi kuti muntu ulimbuli ndime ulachita zyakusonda?" ¹⁶ Juda wakati, " Tulambanzi kumwami wesu? Tulambulanzi? Nanka tulalipandulula byeni lwesu tubeni? Leza wajana buubi abalanda bako. Langa tulibazike bamwami, toonse ayooyo wajanwa ankomesi." ¹⁷ Jozefu wakati, " Azibe kule ambebo, kulatondwa kuchita obo. Mwalumi oyu uli amaboko ajanwa ankomeki, oyo muntu uyoba muzike wangu pesi nywebo nobamwi amwinke mulumuno kuliwuso." ¹⁸ Mpawo Juda wakaza afwifwi kulinguwe wakati," Mwami wangu, ince leka mulanda wako awambule ijwi mumatwi aMwami wangu, alimwi utalekeli bukali bwako amulanda wako, nkaambo uli mbuli Falo. ¹⁹ Mwami wangu wakabuzya balanda bakwe, wati mulawuso na naanka mukulana?' ²⁰ Twakati kumwami wesu, ' Tuli ataata munene amwana wabunene bwakwe, munini loko. Pesi mukulana wakafwa, alimwi we lwakwe nguwe wasyala abanyina, awisi ulamuyandisya.' ²¹ Mpawo wakati kubalanda , 'Mumwete kulindime kuti ndimubone.' ²² Musule lyaya, twakati kumwami, 'Mulombe takonzyi kusiya wisi. Nkaambo ayosiya wisi oyo wisi uyofwa.' ²³ Mpawo wakatu kubalanda bako, ' Kuti temwaza amwanike wanu mulombe tamukozobona busyu bwangu limbi.' ²⁴ Mpawo chakasika chindi nchitwakabweda kumulandako ndendesu, twakamwambila majwi amwami. ²⁵ Taatesu wakati, "Amubwede lubo mukawule chakulya." ²⁶ Mpawo twakati, "Tatuko bweda pe. Kuti mwanike wesu nkaali aswe, alimwi tulinka, swebo tatukuyonkonzya kubona busyu muntu oyu ado kuti mwanike wesu twiinke awe.' ²⁷ Mulanda wako taatesu wakati kulindiswe, "Mulizi kuti mwanakazi wangu wakandizyalila bana balombe bobile. ²⁸ Omwe wabo wakenda kuzwa kulindime alimwi ndakati, " Nchobeni ndakati ulikwamwidwe mutumpanzimpanzi, alimwi tandichimubwene kuzwa lili." ²⁹ Lino na mwandibwezela oyu kuzwa kulindime, alimwi kuchisa kwasikila nguwe muyoselezya imvwi zyangu kuzwa mukabanda.' ³⁰ Lino na, ndakusika kumulanda wako taatesu alimwi mulombe katutakwawe pe, kuzwa buumi bwakwe ulabutula kubumi bwamulombe, ³¹ ziyochitika nzyakuti, nayobona mulombe taliaswebo uyofwa. Balanda bako bayoselezya imvwi zyamulanda wako taatesu mukabanda.' ³² Nkaambo mulanda wako waba musimyi nkaambo kamulombe kulitaatesu alimwi wakati, " Ikuti tendamweta kulinduwe, njoba amulandu kulitaatesu lyoonse.' ³³ Lino na, ince mundileke nsyale ndemulanda wako achibbaka chamulombe muzike kumwami wangu, alimwi alekwe mulombe ayinke abakulanabakwe. ³⁴ Nkambo nsikonzyi kwinka kuli taatesu na mulomb katutali awe. Ndayowa kubona bubi obo buyosika kuli taatesu."