¹ Nikwakamana eezi zintu jwi lya Jehova lyakasika kuli Abbulamu muchilengano kaliti, "Utayoowi Abbulamu! Ndime ntobo yako abulumbu bwako bupati." ² Abbulamu wakati, "Mwami Jehova, uyoondipaanzi, mbukunga nsijisi mwana, asimulya zina lyang'anda yangu ngooyu Eliyeza waku Damasikko?" ³ Abbulamu wakati, "Lino mbotandipede lunyungu, bona, simuzyalwa aalikke mung'anda yangu nguyoondilida zina." ⁴ Lino amubone, jwi lya Jehova lyakasika kulinguwe, lyakati, "Ooyu mwaalumi takoyoolya zina lyako pe; pesi oomwe uyoozwa kumubili wako nguyoolya zina lyako." ⁵ Lino wakamutola aanze, alimwi wakati, "Langa kujulu, ubale nyenyeezi, na ulakonzya kuzibala." Mpawo wakati kuli nguwe , "Alimwi mbuluyooba lunyungu lwako." ⁶ Wakasyoma Jehova, mpawo wakamubala mbuli mululami. ⁷ Wakati kulinguwe, "Ndime Jehova, wakakugwisya kuzwa ku Uli wamuchisi chaba Kkaludi, akukupa eeyi nyika kuti uyoyikone." ⁸ Wakati, Mwami Jehova, mbobuli mbunkonzya kuziba kuti njoyikona?" ⁹ Elyo wakati kulinguwe, "Undiletele ng'ombe nzyazi yamwaaka itatu, ampwizi yampongo ili amyaaka itatu, ambelele zyamyaaka itatu, anziba, amwana wankwilimba." ¹⁰ Wakamuletela eezi zyoonse, wazyaandula aakati, mpawo wakabika chipanzi chimwi achimwi kuchipanzinyina, pesi takaandula bayuni pe. ¹¹ Lino bayuni nibakaseluka kuzoolya nyama, Abbulamu wakabatanda ¹² Lino zuba nilyakabbila, Abbulamu wakoona ng'onzi mpati alimwi, bona, mudima mupati usiya mbii uyoosya wakamuwida. ¹³ Mpawo Jehova wakati kuli Abbulamu, "koziba chalusinizyo kuti basilunyungu bako bayooba banasinakooma munyika itali yabo, ooko bayooba bazike akupenzegwa kwamyaaka ili myaanda yone. ¹⁴ Ndiyoochibeteka chisi eecho nchibayoobelekela, lino kusule lyacheechi bayoozwa ambono zyiingi. ¹⁵ Pesi muyoyinka kuli bamawuso muluumuno, alimwi muyozikkwa muziimo zibotu. ¹⁶ Mumukowa wane bayooboola ookuno, nkaambo milandu yaba Amoli tina kuzula." ¹⁷ Zuba nilyakabbila mpawo kwakasiya mbii, amubone, chilongo chamulilo chisuka busi abbalabala lyalampi zyakayinda aakati kazipanzi. ¹⁸ Muleelyo zuba Jehova wakatanguna chizuminano a Abbulamu, wakati, "Kulunyungu lwako ndiliwo kumupa eeyi nyika, kuzwa kumulonga wa Ijiputi kuya kumulonga mupati, mulonga Yufuleti. ¹⁹ Ba Kkeni, ba Kkenizi, ba kkadimoni, ²⁰ ba Hiti, ba Pelizi, ba Lifayiti, ²¹ ba Amoli, ba Kkenani, Gegasiti, aba Jebbusi."