¹ Lino Abbulamu wakayinka ku Ijiputi alimwi wakayinka ku Negevi amwanakazi wakwe, azyoonse nzyakalaazyo. Loti alakwe wakayinka aamwi ambabo. ² Lino Abbulamu wakali zwidilide mubanyama, siliva, angolida. ³ Wakayinkila aanembo alwendo kuzwa ku Negevi kuya ku Bbeteli, kubusena ooko tende lyakwe nkulyakabede kale, akati ka Bbeteli a Ayi. ⁴ Wakayiinka kubusena oobo kwakali chipayililo nchakali wayaka musule. Aawa wakayita zina lya Jehova. ⁵ Lino Loti ooyo wakali kweenda a Abbulam, lungundu amatende. ⁶ Busena tebwakali kukonzya pe kubagwasizya boonse kupona aafwifwi antoomwe, nkaambo buvubi bwabo bwakali bwiingi loko, zyakapa kuti batakonzyi pe kukkala antoomwe. ⁷ Alubo kwakaba kutamvwanaana aakati kabeembeli bazivuubwa zya Abbulamu abeembeli bazivuubwa zya Loti. Ba Kkenani aba Pelezi bakali kupona mubusena eecho chiindi. ⁸ Lino Abbulamu wakaambila Loti kuti, "Kutabi nkondo aakati kako andime,aakati kabeembeli bako abeembeli bangu; kumamanino tuli mpuli. ⁹ Nyika yoonse tayili kunembo lyako na? Inkila kunembo akulyanzyaania lwako kuli ndime. Kuti wiinka kuchimwesi ime ndilinka kuchilisyo. Nikuba kuti iwe wayiinka kuchilisyo, ime ndilayinka kuchimwesi." ¹⁰ Lino Loti wakalanga, mpawo wabona ntandabale yoonse ya Jodani yakali yamasena yoonse kuyoosika ku Zowa, mbuli chilili cha Jehova, mbuli nyika yaku Ijiputi. Eezi zyakachitika Jehova katana mwaya Sodomu a Gomola. ¹¹ Lino Loti wakalisalila ntandabale ya Jodani alimwi kwenda kuya kunembo kujwe, mpawo nzubo zyakanzaana kuluumwi awumwi. ¹² Abbulamu wakapona kubesena bwaku Kkenani, alimwi Loti wakapna aakati kamyuunzi yantandabale.Wakabika matende aakwe kule kule mbuli ku Sodomu. ¹³ Lino bantu baku Sodomu bakali basizibi babi loko kuli Jehova. ¹⁴ Jehova wakati kuli Abbulamu musule Loti kali wazwa kuli nguwe, "Langa kuzwa mubusena mbwiimvwi kuya kunyika, kumusanza, akumbo. ¹⁵ Yoonse eeyi nyika njwaabona ndiyoyipa kuli nduwe akulunyungu lwako loonse. ¹⁶ Ndiyoochita lunyungu lwako lukavule mbuli lusuko lwanyika, Lino kuti muntu kakonzya kukkala lusuko lwanyika, mpawo lunyungu lulakonzya kubalwa ¹⁷ yenda utobele bulamfu abusasa bwanyika nkaambo ndiyookupa njiyo." ¹⁸ Lino Abbulamu wakabweza tende, akusika, mpawo wakkala mumweenya wa Mamule, eeyo ili mu Hebbuloni, mpawo wakayaka chipayizyo kuli Jehova.