¹ Lino kuzwa mubwami bwa Atakizasi mwami wa Peziya, Ezila wakazwa ku Bbabbiloni. Balunyungu lwa Ezila bakali Selayiya, Azaliya, Hilukkiya, ² Syalumu, Zadokku, Ahitubbu, ³ Amaliya, Azaliya, Melayoti, ⁴ Zelahiya, Uzi, Bbukki, ⁵ Abbishuwa, Finiyasi, Eliyeza, oyo wakali mwana mulombe wa Aaloni mupayizi. ⁶ Ezila wakasika kuzwa ku Bbabbiloni alimwi wakali mulembi uchenjede kumulawu wa Mozesi oyo Yahuwe, Leza wa Izilayeli, ngwakapede. Nkabela mwami wakamupa zyoonse nzyakakumbila nkambo nkamo mbokunga janza lya Jehova lyakali anguwe. ⁷ Bamwi balunyungu lwa Izilayeli abapayizi, ba Levi aba sikwimba bamuchikombelo, alimwi abaabo bakali basikubamba milyango, abalabo bakasalilidwe kugwasizya muchikombelo bakinka ku Jelusalemu mumunyaka wamusanu ayibili ya Mwami Atakizasi ⁸ Wakasika mu Jelusalemu mumwezi wasanu, nguwakali munyaka wasanu ayibili wa mwami. ⁹ Wakasiya Bbabbiloni muzuba taanzi lyamwezi mutanzi. Mwakali muzuba itanzi lyamwezi mutanzi wasanu kasikide mu Jelusalemu, awo janza bbotu lya Leza kalili anguwe. ¹⁰ Ezila wakapeda moyo wakwe kukwiiya mulawu wa Jehova akuuchita akuyisya zyambwa ambeta amalayilile ayo amulawu wa Yahuwe. ¹¹ Olu ndulwakali lugwalo mwami Atakizasi ndwakapa Ezila mupayizi kali mulembi wamulawu wa Jehova alimwi ambeta nzyakabikkila ba Izilayeli. ¹² ''Mwami wabaami Atakizasi, kumupayizi Ezila, kali mulembi wamulawu wa Leza wakujulu: ¹³ Ndikulayilila kuti kufumbwa uzwa mu Izilayeli mubwami bwangu kazyendelana abapayizi babo antomwe aba Levi abo bayanda kwinka ku Jelusalemu, bakonzya kwinka ayebo. ¹⁴ Imebo, ndemwami, alimwi abasinkuta bangu bali musanu ababili, ndamutuma moonse kuyobaguntania ba Juda antomwe a Jelusalemu bwendelana amulawu wa Leza, oyo uli mujanza lyanu. ¹⁵ Mulelede kweta nsiliva angolida eyo njimwakapegwa katakwe muulo kuli Leza wa Izilayeli, oyo ulabukkalo buli mu Jelusalemu. ¹⁶ Mupe chakwangunuka zyonse nsiliva angolide njimujana muchilikiti cha Bbabbiloni antomwe azipo zyakwangunuka ezyo bantu abapayizi nzyobakapa kabayandide kung'anda ya Leza mu Jelusalemu. ¹⁷ Aboobo mubelesye mali eyi kukuula basune, bagutu abana bembelele, alimwi azipo zyamayila azyakunywa. Mukazipe achipayililo chili mung'anda ya Leza wenu mu Jelusalemu. ¹⁸ Mubelesye nsiliva angolide itakasyale kufumbwa nchimubona kachili chibotu kuli ndinwe abana bakwenu, kuti mubotezye Leza wenu. ¹⁹ Mubikke zibelesyo nzimwakapegwa chakwangunuka kunembo lyakwe zyakubelesya mung'anda ya Leza mu Jelusalemu. ²⁰ Kufumbwa echo nchimuyoyanda chang'anda ya Leza echo chiyandikana, amubweze muulo wacho muchiyobwedo changu. ²¹ Imebo, nde Mwami Atakizasi, ndalayilila boonse basikulondola bali mutala mulonga, echo kufumbwa Ezila mupayizi, kali mulembi wamulawu wa Leza wakujulu, nzyakumbila kuli ndinywe uyelede kupegwa chizwide, ²² kuyosika ku mwanda womwe wamatalenta ansiliva, mwanda womwe wanseke zya wiiti, mwanda wanongo zyawayini, alimwi amwanda womwe wanongo zyamafuta, alimwi amwinyo mwiingi loko. ²³ Kufumbwa chizwa kumalayilile a Leza wakujulu, amuchichite achabusungu kujatikizya ng'anda yakwe. Nkambonzi bukkali butasikili munyika yamwami alimwi abana babo bachaalumi? ²⁴ Tulokubalayilila kuti tachizumizidwe kubweza zipo na mutelo nikuba umwi wabapayizi, ba Levi, bayimbi, balindizi bamilyango na kubantu bakalayililwa kumbungano yantempele alimwi ababelesi bamung'anda ya Leza. ²⁵ Ezila, kwindila mubusongo obo Leza mbwakakupede lwako, uyelede kuyosala babetesi abasilutwe benkuta kuti babeteke bonseni bantu ba Muchisi Chakusule lya Mulonga, akuyobelekela boonse abo bakazi mulawu wa Leza wenu. ²⁶ Akusubula kufumbwa oyo utatobelezyi mukuzuzikizya mulawu wa Leza nikuba mulawu wa mwami, zikonzya kuchitwa akumujaya, nikuba kumutanda, nakutio wabbadalisigwa imbono zyakwe, nakuti wabikwa muntolongo. ²⁷ Ngatembawulwe Jehova, Leza wabasikale besu, oyo wakabikka zyonse ezi mumoyo wamwami kuti alumbayizye ng'anda ya Jehova mu Jelusalemu, ²⁸ alimwi wakayungizya chizuminano chakusyomekana kuli ndime kunembo lya mwami, bendelezi bakwe, alimwi abasilutwe bakwe balamanguzu. Ndakasimisigwa ajanza lya Jehova Leza wangu, alimwi ndakabunganisya bazuluzi kuzwa mu Izilayeli kuti binke ambebo.