¹ Elyo Ezila nakakomba alimwi wakalyamba zibi zyakwe, wakakwila alimwi wakali walila ansi kunembo lyang'anda ya Leza. Imbungano mpati loko ya Izilayeli yabalumi, banakazi, abana bakabungana antomwe, nkambo bantu bakali kukwila kapati loko. ² Syekkaniya mwana mulombe wa Jehiyelu walunyungu lwa Elamu wakati kuli Ezila, ''Tetwakasyomekana pe kuli Leza alimwi twakakwata banakazi bazwakule kuzwa kubantu bakuli zimwi inyika. Pesi nikuba kakuli boobu, mpobuchili bulangizi ku Izilayeli. ³ Aboobo kwaino atube achizuminano cha Leza wesu tutume banakazi boonse abana mbuli malayilile a Leza mbwalayilila alimwi amalayilile ababo bayoowa kumilawu ya Leza wesu, alimwi echi ngachichitwe kazyendelana amulawu. ⁴ Amubuke, nkambo echi chintu nchichenu kuti muchendelezye, alimwi tunoli anywebo. Amulisimye alimwi muchichite echi.'' ⁵ Aboobo Ezila wakabuka, wakasungilizya bapati, bapayizi, ba Levi, aba Izilayeli boonse basyomezya kuchita mbubo munzila eyi, aboobo bonse bakasyomezya. ⁶ Mpawo Ezila wakabuka kuzwa kunembo lyang'anda ya Leza alimwi wakayinka kumaanda a Jehohanani mwana mulombe wa Eliyasibbu. Takalya nikuba chinkwa nakunywa manzi, nkambo wakali kuyeeya lusyomo lwababo ibakali mubuzike. ⁷ Aboobo bakatumizya ijwi mu Juda amu Jelusalemu kubantu boonse bakazwa mubuzike kuya kukubungana mu Jelusalemu. ⁸ Kufumbwa utaleke kusika mumazuba aatatu mbuli mumalayilile akazwa kubaami bapati-boonse buvubi bwakwe uyonyanzigwa, alimwi lwakwe uyogusigwa mumbungano yabantu bakaboola kuzwa mubuzike. ⁹ Aboobo balumi bamu Juda aba Mu Bbenjamini bakabungana mu Jelusalemu mumazuba atatu. Wakali mwezi wasanu ayine alimwi amazuba alikkumi aabili amwezi. Boonse bantu bakkala mumugwagwa wang'anda kunembo lyang'anda ya Leza, balakankama nkambo kamakani aya alimwi akambo kamvula. ¹⁰ Ezila mupayizi wakabuka alimwi wakati, ''Inywe lwenu mwabisya. Mwakakkala abanakazi bazwakule mukuyungizya kubisya kwa Izilayeli. ¹¹ Pesi kwalino mulyambe zibi zyenu kuli Jehova, Leeza waba mawuso, alimwi muchite luyando lwakwe. Mupambuke kuzwa kubantu benyika alimwi akubanakazi benzu.'' ¹² Yonse imbungano yakasandula mujwi pati, ''Tulachita mbubonya mbuli mbuwaamba. ¹³ Nikubabobo, kuli bantu biingi, alimwi chaba chiindi chakuwa kwamvula. Tatukwepe inguzu kuti twimikile anze, alimwi oyu tensi mulimo wazuba lyomwe kana abili pe, mbukunga twakabisya kapati mubwingi kutwambo otu. ¹⁴ Aboobo banyampule basilutwe besu bimikilila imbungano yoonse. Eelyo boonse bamumyunzi yesu bakwelete beenzu banakazi basike kuchindi chibikidwe babe abapati bamunzi ababetesi bawo mane buleke bukali bwa Leza wesu bwinke kule andiswe.'' ¹⁵ Johanani mwana mulombe wa Asahelu antomwe a Jazeyiya mwana mulombe wa Tikkiva wakazikaka ezi, antomwe a Mesyulamu a Syabbetayi mu Levayiti wakaba kumwi ambabo. ¹⁶ Aboobo bantu bakazwa mubuzike bakachita eezi. Ezila mupayizi wakasala balumi, bapati banzubo - boonse balembedwe mazina aabo, alimwi bakanzanisigwa muzuba tanzi lyamwezi wakkumi. ¹⁷ Elyo muzuba tanzi lyamwezi wakutanguna bakamana kulanga balumi abo bakali kukkala abanakazi beenzu. ¹⁸ Akkati kabalunyungu lwaba payizi kwakaliko abo bakali kukkala abanakazi bazwakule. Akati kalunyungu lwa Jeshuwa mwana mulombe wa Jozadaki antomwe abakulana bakwe kwakali Maseyiya, Eliyeza, Jalibbu, a Gedaliya. ¹⁹ Aboobo bakabamba kulekana abanakazi babo. Nkambo mpubakali amulandu, bakapayila imbelele kuzwa mubutanga kuti imane milandu yabo. ²⁰ Akkati kalunyungu lwa Imma: Hanani a Zebbadiya. ²¹ Akkati kalunyungu lwa Halimu: Maseyiya, Elija, Syemayiya, Jehiyelu, a Uziya. ²² Akkati kalunyungu lwa Pasyuwa: Eliyonayi, Maseyiya, Isyumayelu, Nataniyelu, Jozabbadi, a Elasa. ²³ Akkati kaba Levayiti: Jozabbadi, Syimeyi, Kkelayiya - chamba kuti, Kkelita, Petahiya, Juda, a Eliyeza. ²⁴ Akkati kabayimbi: Eliyasyibbu. Akkati kabasikulinda mulyango: Syalumu, Telemu, antomwe a Uli. ²⁵ Akkati kabamwi boonse ba Izilayeli - akati kalunyungu lwa Palosyi: Lamiya, Iziya, Malukkija, Mijamini, Eliyeza, Malukkija, a Bbenayiya. ²⁶ Akkati kalunyungu lwa Elamu: Mataniya, Zekkaliya, Jehiyelu, Abbidi, Jelemoti, a Elija. ²⁷ Akkati kalunyungu lwa Zatu: Eliyonelu, Eliyasyibbu, Mataniya, Jelemoti, Zabbadi, antomwe a Aziza. ²⁸ Akkati kalunyungu lwa Bbebbayi: Jehohanani, Hananiya, Zabbayi, a Atilayi. ²⁹ Akkati kalunyungu lwa Bbani: Mesyulamu, Malukku, Adaniya, Jasyubbu, a Syiyalu Jelemoti. ³⁰ Akkati kalunyungu lwa Pahati-Mowabbu: Adina, Kkelalu, Bbenayiya, Maseyiya, Mataniya, Bbezalelu, Bbinuyi, a Manase. ³¹ Akkati kalunyungu lwa Halimu: Eliyeza, Isyija, Malukija, Syemayiya, Syimiyoni, ³² Bbenjamini, Malukku, antomwe a Syemaliya. ³³ Akkati kalunyungu lwa Hasyumu: Matenayi, Matata, Zabbadi, Elifeleti, Jelemayi, Manase, antomwe a Syimeyi. ³⁴ Akkati kalunyungu lwa Bbani: Madayi, Amulamu, Uwelu, ³⁵ Bbenayiya, Bbedeyiya, Kkeluhi, ³⁶ Vaniya, Melemoti, Eliyasyibbu, ³⁷ Mataniya, Matenayi, a Jaasu. ³⁸ Akkati kalunyungu lwa Bbinuyi: Syimeyi, ³⁹ Syelemiya, Natani, Adayiya, ⁴⁰ Makkinadebbayi, Syasayi, Syalayi, ⁴¹ Azalelu, Syelemiya, Syemaliya, ⁴² Syalumu, Amaliya, a Jozefu. ⁴³ Akkati kalunyungu lwa Nebbo: Jeyiyelu, Matitiya, Zabbadi, Zebbina, Jadayi, Lowelu, a Bbenayiya. ⁴⁴ Aba boonse bakali kwatilide banakazi bazwakule alimwi bakali abana abamwi babo.