¹ Mumwaka wakusanguna wa Sayilasi mwaami wa Peziya , mwaami Leza wakazuzikizya majwi akwe akwambula kuzwa mumulomo wa Jelemiya mpawo akakopakopa muya wa Sayilasi. Ijwi lya Sayilasi lyakasika kubusena boonse bwabuleli bwakwe ino nzeezi zyakalembedwe akwaambulwa: ² ''Sayilasi, mwaami wa Peziya, wati: Jehova, Leza wakujulu, wandipa boonse bwami bwaansi, alimwi wakandisala kuti ndimuyakile ng'anda yakwe mu Jelusalema muchisi cha Judiya. ³ Kufumbwa uzwa kubantu bakwe (akube kuti Leza wakwe abanguwe) ulakonzya kutansya kuuya ku Jelusalema ili muchisi cha Juda, akuyakila Jehova Leza wa Izilayeli, Leza ujanika mu Jelusalema. ⁴ Bantu bali mumasena aayo mukkede aabo aasyede ba mwaami Leza beelede kubapa nsiliva angolida, zintu zibotu azivubwa, alimwi mbuli zipo zyakuliyandila zyang'anda ya Leza ilimu Jelusalema.'' ⁵ Eelyo bapati bamikowa yakale ya Juda aya Bbenjamini, bapayizi aba Levi abaabo boonse Leza mbakakopakopa mumyoyo kuti bayinke kuyoyaka ng'anda ya mwaami Leza ku Jelusalema bakanyampuka. ⁶ Basimayakilane bakabagwasizya mukubapa zintu ezi: nsiliva, ngolida, zintu zibotu, zivuubwa azimwi ziyandisi, azipo zyakuliyandila. ⁷ Sayilasi mwaami wa Peziya alakwe wakababoozya zibelesyo zyamung'nda ya mwaami Leza, eezyo Nebbukkadineza nzyaaketede kuzwa ku Jelusalema akuzibikka mung'anda yamizimu yakwe. ⁸ Sayilasi mwaami wa Peziya wakazipa mumanza a Mitiledati mulondozi wachiyobwedo, wakazibalila Sheshibbaza, mwendelezi wa Judiya. ⁹ Oyu nguwakali mweelwe wazyo: makumi aatatu amitiba, chuulu chomwe chamitiba yansiliva, makumi abili amusanu amitiba yone, ¹⁰ makkumi atatu amitiba yangolide, 410 mitiba minini yansiliva, alimwi echuulu chomwe chazimwi zintu zyakayungizigwa. ¹¹ Kwakali 5,400 zilongo zya ngolida azyansiliva mubwingi bwazyo zyonse. Sesibbaza wakazyeeta zyoonse eelyo bakali munyika zyabantu nibakazwa mu Bbabbiloni kuyaku Jelusalema.