¹ Kuzwaawo Yahuwe wakambuula kuli Mozesi, wakati, ² ''Kondibikila ambali bonse bana balombe batanzi - nkambo kufumbwa chitaanzi kukujula izyalilo akati kaba Izilayeli unoli nguwangu, nibaba bantu neziba zinyamankala.'' ³ Mozesi wakati kubantu, ''Elizuba kamunoliyeeya mumizezo yenu, buzuba mbomwakazwa anze lya Ijiputi, kamuzwa anze mung'anda yabuzike, kwinda kujanza ijumu lya Yahuwe ndyakamugwisya alyo kuzwa mubusena obu. Takwe chibunge chilabumena chelede kulyigwa. ⁴ Mulazwa anze a Ijiputi obuno ibuzuba , mumwezi wa Abbibbi. ⁵ Elyo Yahuwe nayomweeta munyika yaba Kkenanayiti, Hititisi, Hivanayitisi, alimwi aba Jebbusayisi, inyika njakakonkezya basikale kuti uyomupa, inyika ikunka malili abuchi - mpawo mwelede kubamba eyiinzila yabukombi mumwezi oyu. ⁶ Kwamazuba musanu awabili mwelede kulya chibunge chitakwe bumena; mubuzuba bwamusanu aabili kuyoba ipobwe lyakulemeka Yahuwe. ⁷ Chibunge chitakwe bumena chelede chikalyigwe mumazuba musanu aabili; takwepe chibunge chila bumena chelede kuyobonwa akati kamigaano kenu. ⁸ Mubuzuba obo mwelede kuyoti kubana benu, 'Echi chilibobu nkambo kazezyo Yahuwe nzyakandichitila elyo nindakazwa anze lya Ijiputi.' ⁹ Echi chiyoba chibalusyo chako kujanza lyako, alimwi nchibalusyo ankumu yako. Echi chilibobu kuti mulawu wa Yahuwe ukakkale mumulomo wako, nkambo nkujanza ijumu elyo Yahuwe ndyakakugwisya alyo kunze lya Ijiputi. ¹⁰ Nkenkaako mwelede kubamba mulawu oyu mbuli mbubambilidwe chindi kuzwa kumunyaka akumunyaka. ¹¹ Eelyo Yahuwe akumusisya munyika yaba Kkenani, mbuli mbwakasyomezya ndinywe abasikale kuti uyozichita, alimwi akwaba nyika kulindinywe, ¹² mwelede kuyobika kumbali kuli Yahuwe izitanzi kukuzyalwa kumazyalilo woonse. Zyonse zitanzi kuzyalwa kumbono zyenu zyonse ezyo zyeenze, ziyoba zya Yahuwe. ¹³ Bonse bana batanzi bama donki mwelede kubaliya amwana wambelele. Kuti kotakonzyi kuzokawula lubo, elyo uyelede kukatyola insingo yako. Pesi bonse bana batanzi kubawula kuti bajoke. ¹⁴ Elyo mwana wako ayokubuzya, ''Echi chambaanzi?'elyo uyelede kuyomwambila, ''Kwakali kujanza ijumu Yahuwe ndyakatugwisya alyo anze kuzwa mu Ijiputi, kuzwa mung'anda yabuzike. ¹⁵ Elyo Falo wakaka chakuyumya moyo kuti atuleke twende, Yahuwe wakajaya zyonseni zyakali zitanzi kukuzyalwa mu Ijiputi, zyonse zitanzi kubantu ezitanzi kubanyama. Nchenchicho nchendimukupayila kuli Yahuwe zyonse zyenze ezyo zitanguna kujula izyalilo pesi bonse batanzi bana balombe ndilababoozya.' ¹⁶ Echi chiyoba chiyeezyo kumaanza enu, alimwi nchiyeezyo ankumu zyenu, nkambo kwakali kujanza jumu lya Yahuwe ndyakatugusya alyo iswebo aanze lyaku Ijiputi.'' ¹⁷ Elyo Falo nakazumizya bantu kuti binke, Leza takabazulwida enzila iyinda kuba Filisitina, nekuba kuti eyi njiyakali mfwifwi. Nkambo Leza wakati, ''Ambweni ulabona bantu bakachinche mizezo yabo elyo bakuswanana enkondo alimwi bakajokele lubo ku Ijiputi. ¹⁸ Nkinkaako Leza wakazulwida bantu chakubanzemusya kwindila munkanda manedo ku Lwizi lwa Matete. Bana ba Izilayeli bakeenda chakuzwa anze kanyika yaba Ijiputi bakali bambilide inkondo. ¹⁹ Mozesi wakabweza zifuwa zya Jozefu, nkambo Jozefu wakali wakonkezya ku bana ba Izilayeli wakati, ,''Leza chakasimpe uyomuvuna, alimwi mwelede kubweza zifuwa zyangu akwinka azyo.'' ²⁰ Ibana ba Izilayeli bakalonga beenda kuzwa ku Sakkoti alimwi bakakukkala ku Etamu kumagolelo enkanda. ²¹ Yahuwe wakayo bwenda kunembo lyabo kalimujoba lyamulilo kuti abape mumuuni. Mansika wakali kubazulwida kali mumusumpululu wamulilo kuti abape mumuuni. Muleeyi nzila bakeenda mansiku esikati. ²² Yahuwe takwepe nakabanyanzya kuzwa kumatalikilo ibantu musumpululu wejoba wamubuzuba niliba ejoba lyamansiku kuli musumpululu wamulilo.