¹ Pita, mutumwa waJesu Kkilisito, kubeenzu bamwayikilide kumanyika, basalidwe koonse, kuPontasi, Galatiya, Kkapadosiya, Eziya, akuBbitiniya. ² Eechi chilimumabambe amumakanze aaLeza Taata, mukwiindila mumulimu waMuuya uusalala wakusala, kuti muswiilile amukwindila mukusansayilwa kwabulowa bwaJesu Kkilisito. Luzyalo ngalube alindinywe, aluumuuno ngaluyungizigwe mulindinywe. ³ Leza awisi waMwami Jesu Kkilisito ngalumbayizigwe! Muluzyalo lwakwe lupati, wakatupa kuzyalwa kupya swebo bulaabulangilizi bwabuponi kwiinda mububuke bwaJesu Kkilisito kuzwa kubafu. ⁴ Eechi nchalukono lutakabule kumana pe, lutakabule kaninanisigwa pe, nikuba kuyookulumpala. Lulibambidwe kujulu kalulinda nduwe. ⁵ Webo ulikwabilidwe anguzu zyaLeza kwiindila mulusyomo lwalufutuko, oolo lwiimvwilidi kuyooyubununwa muzyiindi zyamamanino. ⁶ Ulikondedwe aatala acheechi, nekuba kuti kwalino kuleelede mube akuusa mumakataazyo miingi. ⁷ Ooku nkusunkwa kwalusyomo lwenu, oolo lweebesi kwiinda ngolide imana, nekuba kuti yakawumpwa mumulilo. Eechi chilachitika kuti lusyomo lwenu lukajanike kaluleentembawuzyo, abulemu, akulemeka ayooyubununwa Jesu Kkilisito. ⁸ Tamunakumubona pe, pesi mulamuyanda. Tamumuboni pe kwalino, pesi mulasyoma mulinguwe akukondwa alukondo lutaambiiki luzwide bulemu. ⁹ Lino mulikulitambwida nobeni, lusyomo lwenu, lufutuko lwamyuuya yenu. ¹⁰ Aatala alufutuko oolu, basiinsimi aabo bakasinsima aatala aluzyalo oolo lwakeelede kuza kulindinywe, bakayanduulisya akulangisisya chamaanu, ¹¹ kabayanduula kuti kuzibinkanwe kuti ooyo muntu unoolibiyeni na chiindi eecho Muuya waKkilisito wakalimulimbabo nchaakalikwaamba aawo mpakabaambila, chiindi kachitanaasika aatala akoomba kwaKkilisito abulemu buyootobela. ¹² Chakayubununwa kulimbabo kuti tebakali kulikutawukila beni pe, pesi nywebo, aawo mpubakalikwaamba aatala azintu eezyo zyakaambwa kulindinywe abaabo bamukambawukila makani mabotu kulindinywe kwiinda kuMuuya Uusalala wakatumwa kuzwa kujulu, zintu baangelo nzibalakamizya kubona. ¹³ Nkikaako amulyaange muzibuno zyenu zyakuyeeya kwenu. Amulondoke. Amubike bulangilizi bwenu chakumaninina kuluzyalo oolo luyooyetwa kulindinywe ayooyubununwa Jesu Kkilisito. ¹⁴ Mbuli bana baswiilila, mutakabweedululi kunkosya zyenu nkumwakali kuponena chiindi nimwakachili mukutaziba. ¹⁵ Akaambo kakuti ooyo wakamwiita ulasalala, anywebo, mweelede, kusalala mumachitilo eenu woonse. ¹⁶ Nkaambo kulilembedwe kuti, "Amusalale, nkaambo Mebo ndilasalala.'' ¹⁷ Na kamumwiita kuti ''Taata'' ooyo ubeteka chakutalanga chiimo chamuntu alimwi kazyeendelana amulimu wawumwi awumwi, amweende lweendo oolu muchiindi chenu chakumuyoowa. ¹⁸ Mulizi kuti kunununwa kwenu tekwakachitwa ansiliva na ngolide zikulumpala pe, kuzwa kukweenda kwenu kwabuyo nkumwakayiya kuli bamawuso. ¹⁹ Anukuti, nywebo mwakanununwa abulowa bweebesi bwaKkilisito, ooyo wakali mbuli Mwana wambelele uutakwe kampenda nikaba kabata. ²⁰ Kkilisito wakasalwa kiitanaatalika nyika, pesi kwalino wakazooyubununwa kulindinywe muzyiindi zyamamanino. ²¹ Kwiindila mulinguwe mulazumina muliLeza, ooyo wakamubusya kuzwa kubafu akumupa bulemu, zyakuti lusyomo lwenu abulangilizi bwenu zili muliLeza. ²² Mwakasalazya myoyo yenu kwiindila mukuswiilila kasimpe. Eeezi zyakali kuchitilwa kuti muyandane chabunyina, aboobo muyandane chalusinizyo kuzwa mumoyo. ²³ Mwakazyalwa bupya, peepe ambuto iibola, pesi kuzwa kumbuto itaboli, kwiindila mujwi lyaLeza gumi litamani. ²⁴ Nkaambo, ''Nyama yoonse ilimbuli bwizu, abulemu bwayo boonse bulimbuli malubaluba aabwizu bwamusokwe. Bwizu ngabwayuma, awalawo malubaluba nga anyana mpawo awidaansi, ²⁵ pesi ijwi lyaMwami linooliwo kwalyoonse.'' Eeli jwi makani mabotu aayo ngimwakakambawukilwa.