¹ Ora Jesús bi'ya ca xtale bini que, Laabe gudxiba be lu ti dáni; ora laabe gurí be, ca discipulu xtibe beeda ca ra nu be. ² Laabe bixhale rua be ne bisiidi be laaca; Laabe guní be: ³ "Chona tiru guieche ca ni pobre laaca lu espiritu, ti purti xti cabe nga guenda runi mandar xti Diuxhi. ⁴ Chona tiru guieche ca ni cayu'na, ti purti sara' nisa lu' cabe. ⁵ Chona tiru guieche ca ni nado', ti purti laacabe za'de cabe guidxilyu'. ⁶ Chona tiru guieche ca ni canda'na ne ca ni caya'ti justicia, ti purti laacabe sadxa cabe. ⁷ Chona tiru guiche ca ni ria', ti purti laca siá Diuxi laa. ⁸ Chona tiru guieche ca ni naya ladxido', ti purti laacabe zuuya cabe Diuxhi. ⁹ Chona tiru guieche ca ni runi ca guenda ratadxi, ti purti saabi cabe laaca xhiiñi Diuxhi. ¹⁰ Chona tiru guieche ca ni risabinanda cabe laaca gúni Justicia, ti purti xti cabe nga guenda runi mandar xti ca guiba'. ¹¹ Chona tiru guieche tu ora binni cu'dí laatu ne sabinanda cabe laatu, o ora guní cabe guira tipu cosa dxaba ni cadi dxandi luguiatu gúni naa. ¹² La gului guenda nayeche, ne laguieche xtale, ti purti naroba nga ni chi guiaxha tu guiba'. Ti purti sacá binni usabinanda ca profeta guza níru que laatu. ¹³ Laatu nga nacatu sidi ndani guidxilayu di; peru pa sidi di gunitini guenda naxhi xtini, ¿xhi modo sanda gacani naxhi xti tiru? Ma que saquiñeru ni para gaxti, huaxha para gusabi cabe ni ne guxata ñee binni ni. ¹⁴ Laatu nga nacatu biani xti guidxilayu. ti guidxi ni dxiba lu Dani que sanda igachi. ¹⁵ Ninca binni que ruca gui ti biani ne rugu ni xhana ti dxumi, laga rugu cani ndani ti ra randa biani, ne rusaani ni para guira ni nu ndani yoo que'. ¹⁶ lagudi biaani xtitu guzaani neza lu de guira binni para ganda guya cabe ca ni nachahui ni runitu ne gusisaca cabe bixhoze cabe ni nu' guiba'. ¹⁷ Cadi sacaxha tu de que naa beda guxhiaya ley o ni guni' ca profeta; cadi beda guxhiaya dia', laga beeda gune ni ca' lu cani. ¹⁸ Ti purti dxandipe cayabe laatu dede dxi guiba' ne guidxilayu tiidi ca, nin tu jota ne ninti acentu de nin ti modo que sadiidi ca de lu ley, dede dxi ca ndi ma guizaa ca. ¹⁹ Nga runi tutiica ni guinda neca ni jma nahuini de ca guendaruni mandar di, ne guziidi xcadxi guni ca ni, laabe sacabe casi ni jma huaxhie risaca ndani guenda runi mandar xti guiba'. Peru tutiica ni gúni ni naa ni ne gusiidi ní, sabi cabe laa naro'ba xdani guenda runi mandar xti guiba'. ²⁰ Ti purti naa cayabe laatu de que pa ni jneza xtitu que tiidi ni lu ni jneza xti ca escriba ne ca fariseu, laatu que sanda di chu tu ndani guenda runi mandar xti guiba'. ²¹ Laatu ma binadiagatu de que dede jma atra ma gudxi cabe laatu: 'CADI GÚTILU', ne 'tutiica ni guuti nu naxhoo de juiciu.' ²² Peru naa cayabe laatu de que guira ni nadxichi ne biichi nu lu naxho xti Juiciu; ne tutiica ni gabi biichi: 'Lii naca lu ti binni ni que risaca.' Ziu lu ti guenda naxho xti Conciliu; ne tutiica ni guini': 'lii binihuati.' Ziu lu guenda naxho xti bele xti gabia. ²³ Nga runi pa lii cudii lu ni cusigade lu lu altar, ne raca guietenaladxi lu de que bichi lu napa xhixha lugia lu, ²⁴ bisaana raca ni chi gusigade lu ca neza lu altar, ne guye neza xtilu. Niru bisaana de tinde neu bichi lu, neoraca guda' ne bidii ni chi gusigade lu. ²⁵ Bitagu didxa ne ni cudxiba donda ique lu naguenda laga seetu neza ra nu justicia, o sanda ca ni cudxiba donda ique lu sudii lii juez, ne juez gudi lii xhaique ca huaachu, ne sanda ca cu'bii cabe lii ndani lidxiguiba. ²⁶ Dxandipe cayabe laatu, que siu dxi guire'lu de raca dede que lii quixhe lu dede ultimu nda bidxichi ni nuzaabilu ²⁷ Laatu huayunadiaga tu ma guni' cabe: 'CADI CHU' NEU NI CADI XHEELU.' ²⁸ Peru naa cayabe tutiica ni guyadxi ti guna para guluíladxi laabe mapeca huayuni be guenda riu ne ni cadi xheela ndani ladxido'. ²⁹ Ne pa ladu derechu xti guie'lu lu cayuni guirenda ñee lu, guxhani ne bisaabi ni zitu de lii; ti purti jma galan para lii de que tindaa de lii gati, que idubi naca lu' chee gabia. ³⁰ Ne pa ladu derechu de ná lu cayuni guirenda ñee lu, bichuugu ni ne bisaabi ni zitu de lii, ti purti jma galan para lii gati ti nda ladi lu, que idubi naca lu' che gabia. ³¹ Laaca maca guni' cabe: 'TUTIICA NI GUZEENDA XHEELA ZITU, LA GUDI DE QUE LAABE GUDI BE LAA TI GUI'CHI NI GUINI' DE QUE MA GULA' XQUENDA XHEELA CA.' ³² Peru naa cayabe latu de que guira ni guila' ne xheela la, pa laacabe cadi cala' ca be pur guyu ne be xtobi ni cadi xheela be la?, laa cayuni laabe ti guna ni ma guyu ne ni cadi xheela; ne tutiica ni guichagana laabe tiidi si de ma gula' ne be xheelabe cayu'ne ni cadi xheela. ³³ Xti tiru, laatu ma bina diaga tu deque dede jma xhadxi guni' cabe: 'CADI GUDI XTIDXALU NI CADI DXANDI, PERU BIINI NI MA BIDI XTIDXA LU SEÑOR.' ³⁴ Peru naa cayabe laatu, cadi gudi xtidxalu pur gaxti; ni pur guiba', ti purti naca ni ra ribi Diuxhi para guni mandar; ³⁵ nin ca pur guidxilayu', purti raca nga bangu'huiini ra ribaqui ñee be; nin ca pur Jerusalen, ti purti ngá nga GUIDXI XTI REY NI NARO'BA. ³⁶ Nin ca que gudi xtidxa lu pur ique lu, pur ti que zanda guni lu ti guicha ique naquiichi o nayase. ³⁷ Peru bidi de que ni rini lu ca gacani, 'pa ya' la? ya' o 'pa co' la? co'.Guira ni naca jma que ndi la? zeeda ni de ni binidxaba. ³⁸ Ma binadiagalu guni' cabe: 'TI GUIE LU PUR TI GUIE LU, NE TI LAYA PUR TI LAYA.' ³⁹ Peru naa cayabe lii cadi guca lulu ni nadxaba; laga nga la?, tutiica capa xhaga lu ladu derchu, laaca bidii laabe xtobi ca'. ⁴⁰ Ne pa tuuxha gacagaladxi chine' lii ra lu justicia, ne gaxha lii lari dxaa xtiilu', bidii ca laabe chinebe' lari nexhe xhique lu. ⁴¹ Ne pa laabe guca be lii chineu laabe ti kilometru, llene laabe chupa. ⁴² Bidii guira binni ni guinaba lii xhiixha, ne cadi gudxii deche lu' ni gacaladxi qui'ñe lii. ⁴³ Ma binadiagatu guni cabe: 'SANAXHII LU NI DXA'GA LU, NE SACA NANALADXI LU NI RUCA LU LII.' ⁴⁴ Peru naa cayabe laatu, laganaxhi ni ruca lu laatu ne laguini' ne Diuxhi pur ca ni rizabinanda laatu, ⁴⁵ para ganda gaca tu xhiiñi bixhozenu ni nu guiba'. Ti purti laabe nga runi be guire gubidxa luguia ca ni nadxaba ne ca ni nachaui, ne ruseenda be nisaguie lugui ca ni runi jneza ne ca ni que runi jneza. ⁴⁶ Pa ranaxhii tu ca ni nadxii laatu, ¿xhi ga nga guica' tu ya? ¿cadi sacaca nga runi ca ni ruquixhe impuestu la? ⁴⁷ Ne pa ca biichi si tu gugapadiuxhi tu ¿xhi runi tu jma que xcadxi ya? ¿cadi sacaca nga runi ca ni cadi Judiu la? ⁴⁸ Nga runi cadi gapa tu nin ti guenda ruche' casi ca bixhoze tu ni nuu guiba'que gapa nin ti ra ruche'.