¹ Xtale nga tu laa ma huayacala'dxi' cuaquichaahuui' guirá' ca ni ma huazaaca ladenu, ² ne casica laacabe ma bitiidicabeni laadu la? laacabe nga nacacabe ca ni dxandi' biiya' guirá' ca ni bizaacaca ne laacabe nga canacaacabe ca diidxaca'. ³ Ngue runi laca biquiinde naa, ra ma birá guzaya' canabadidxa chaahue' xi modo nga bedaguizaca guirá' ca ni ma nannanu dxandi' bizaacaca, cuaquechaahue' cani ne gucaa cani xneza para lii, binni risaca xtale nacalu' Teofilu. ⁴ Ti zaca gannachaahuilu' xi modo nga dxandi' bedaguizaca guirá' ni ma huasiidicabe liica. ⁵ Lu ca dxi bibani Herodes, xa ique xti' guidxi Judea, guyuu ti sacerdote la Zacarías, ni zeeda lade ca xpinni Abías. Xheelabe Elisabet la? zeeda lade ca xiiñi' Aarón. ⁶ Guiropacabe nacha'hui' gucacabe, bizuubacabe xtiidxa Diuxi ne zaqueca bi'nicabe guirá' ni gudxi Diuxi laacabe gunicabe. ⁷ Huaxa que gapadicabe nin ti xiiñicabe, ti que ñandadi ñapa Elisabet ti ba'du' ne bia' nuucabeque la? ma nagolacabe ne guiza' ma nagana ngue ñedagapacabe ti xiiñicabe. ⁸ Yanna bedagaca ca dxique ra Zacarías bidxiña nezalu' Diuxi cayuni ca dxiiña' ni ma nexhe' guni casica biseenda ca sacerdote ra zeedabeque gunibe. ⁹ Ne casica ma biaacabe cuicabe ti sacerdote guni xhiiña' Diuxi la? xtale tu guli laabe ti zaca chuube ndaani' yu'du' xti Diuxi ne cuube gu'xhu'. ¹⁰ Ne guiraxixe binni ni nuu fuera de yu'du'que la? cani'neca Diuxi laga caguube guxhu' ndaani' yudu'que. ¹¹ Yanna bedandá ti ángel xti' Diuxi ne bizuhuaa ladu derechu xti mexa ra ruguucabe gu'xhuque. ¹² Ra biiya' Zacarías laabe la? bidxibi ne bianane dxiibique. ¹³ Huaxa ángelque rabi laabe sicari', cadi guidxibilu' Zacarías, ti ma bicaadiaga Diuxi ni canabu' laaque, xheelalu' Elisabet la? chigapabe ti xiiñilu', ne lii chindeelalu' laabe Juan. ¹⁴ Li ziechelu ne stale ziechenecabe li ora galebe. labe zacabe naroba neza lu señor. ¹⁵ Labe queziudi dxi guebe nisa uva ninca nisa ni ruxhudxi, ne zadxatipabe de espiritu santu dede ndani jñaa'. ¹⁶ Ne xtale de ca xiiñi Israel la? zabiguetaca' ra nuu Diuxi xtica'. ¹⁷ Laabe ziebe nezalu' Diuxi ne espíritu ne guendanandxo' xti' Elías. Ne zaca zunibe la? ti ganda binni gaca tobisi ne ca xiiñi', ti ganda cani que runa saca' lu guendabiaani' xti' cani runi xneza ne zaca quixhechaahuibe ca binnique para ora ma guendandá Diuxi. ¹⁸ Zacarías la? gudxibe ángelque sicari', ¿xi modo zanda ganna pa dxandi' nga ca ni caya'bu' naaca ya'? ti naa ne xheela' la? ma bio'xhodu. ¹⁹ Bicabica ángelque laabe sicari', naa nga Gabriel, ni ruzuhuaa neza lú Diuxi, ne naa nga biseendabe guedania' ca diidxa' sicarúdi ra nuulu'. ²⁰ Ne yanna la? zadeegu ruaalu', ma que zandadi guini'lu' de ra guedandá dxi guizaaca guirá' ni ma gudxe' liica. Zacani zaca la? ti lii que ñunicrédiou' ca diidxa', ne guirá ni gunie' ca la? zazaaca cani ra ma guedandá dxi guizaacacani. ²¹ Ca binnique la? cabezacabe Zacarías. Cadxagayaacabe xiñee guiza' candaabe ndaani' yu'du'que. ²² Huaxa ra laabe bireebe la? ma que ñandadi' nini'nebe laaca. Raqué gunnacabe guyuu xi bilui' Diuxi laabe laga nuube ndaani' yu'du'que. Laabe nisi cayunibe seña luca' ne zaqué biaanabe ma que nini'dibe gaxti'. ²³ Ra bedaguiluxe ca dxi nexhe' gunibe dxiiña' ra yu'du' xti' Diuxique la? bireebe zebe ra lidxibe. ²⁴ Gudidi' si ca dxique, bedagaca xiiñi' Elisabet. Laabe bianabe yoo bia'si gaayu' beeu, ne guni'be, ²⁵ Ndi nga ni bi'ni' Diuxi pur naa ra laabe biyadxibe naa ti ma que guituidilua' neza lú binni. ²⁶ Ra ma gudidi' xhoopa' beeu la? biseenda' Diuxi ángel Gabriel che' ra ti guidxi nuu Galilea la Nazaret ²⁷ ra nuu ti binnidxaapa ni ma yenaba' ti badunguiiu la José laa. José la? zeedabe de ca lisaa xti' David, ne María nga la dxa binnidxaapaque. ²⁸ Ángel Gabriel beeda' ra nuube ne gudxi laabe, padiuxi, lii nga ni jmá casacalu' lade guirá', nuune Diuxi lii. ²⁹ Huaxa laabe que ñenedibe ca diidxa' gudxi ángelque laabe ne candaa iquenebe padé zeeda guendarugapadiuxique. ³⁰ Ángelque gudxi laabe, cadi guidxibidiou' María, ti ma guluu ndaaya Diuxi lii. ³¹ Chigacaxiiñilu' la? ne zapalu' ti xiiñilu'. Lii chindeelalu' laabe Jesús. ³² Guiza' nandxo' chigacabe ne zaree labe xiiñi' ni jmá nandxo'. Diuxi la? zudii laabe bangu' ra gurí bixhozegolabe David. ³³ Zacabe xa ique xti' lidxi Jacob ne qui ziuudi dxi guiluxe guendaraca xa ique xtibe'. ³⁴ Para ná María rabi laabe, ¿xi modo zanga gaca ca nga ya'? pa naa qui huayuaanidia' guiruti'. ³⁵ Bicabica ángelque laabe sicari', zedandá Espíritu Santu luguialu' ne zaqueca guendanandxo' xti' Diuxi. Ngue runi baduhuiini' guyuu ndaaya chigaledi' zaree labe xiiñi' Diuxi. ³⁶ ne biya dxi, binii lidxilu elizabeth, laca gupabe xhiñii be ra ma nagolabe. ndiga xhopa beu para labe, labe nga gudxicabe ni que zapa xhiñii. ³⁷ gastidi ni nagana para Diuxi. ³⁸ MARIA guni: "biya, nanga rune xhiiña' xhaique. ne gacani casi ninaa' xtidxa lu. ne angel que bisaana labe. ³⁹ Gueruni Maria biasa ca dxi que' ne naguenda guyube lade danihuini' ndani guidxi Judea. ⁴⁰ Labe guyube ralidxi Zacarías ne bigapadiuxhi be' Elisabeth. ⁴¹ Ne yana guca que Elizabeth guyu diagabe diuxhi xti maria, baduhuini que guyubibe ndani nguiabe ne elizabeth bidxatipabe de espiritu santu. ⁴² Labe gundizabe ridxi' xtibe nadipa ne gunibe: "ndaya li lade ca gunaca' ne ndaya ni caroba ndani lucaa'. ⁴³ ¿Ne xhiñee nga naa cazacani que jñia' xhaique xtine zeda ra nua? ⁴⁴ Yanala biya, ora li bigapadiuxhilu ridxi xtiluca vedani ra diaga, baduhuini ni nu ndane bicheza de guenda nayeche. ⁴⁵ Ne gacabe ndaya, labe ni bini creebe' zaca guira cani xhaique gudxi labe." ⁴⁶ Maria guni: "alma stine rusisaca xhaique stine ⁴⁷ Ne espiritu stine riecheneni diuxi ni rulana'. ⁴⁸ Purti labe ma biyabe xhi modo nu ni runi xiñabe' ne biya, de nagasi ne de guiraa xixhe dxi, guira cani guedaruca' zabica na ni nu ndaya. ⁴⁹ Labe nga ni nandxoo, ne jma binibe xtale pur naa ne laabe' nga santo. ⁵⁰ Xhilase xtibe nga zee' ne zeda' para cani ridxichi labe. Labe biluibe naabe nadipa; ⁵¹ labe nga bichechendasebe guiraa ni rudxiba laca la, guni guira ni rini xpiani ni rire ndani ladxido. ⁵² Labe bisababe ca principe de lu bangu ni runi mandar, ma gundisabe ca ni que gapadica gasti. ⁵³ Bitidibe guenda rindana xtica ne bidíbe laca ni sicaru, neca ni napa bidxichi bisaanabe laca sin gasti. ⁵⁴ labe ma bidibe guenda racane siervu xtibe israel, ti napabe gana chindabe de gusiete naladxibe xhi modo biluibe xhilase xtibe, ⁵⁵ ( ne zaca gudxibe ca bixhozebe.") Abraham ne ca ni zedaa de laa dede guira'dxi." ⁵⁶ Maria biananebe' Elisabet gaxha de chona'beu ne deraque' bibiguetabe ra lidxibe'. ⁵⁷ Yanala ma beda'nda dxí xti elisabet de gapabe xhiñiibe' ne labe gupabe ti xhiñii'be. ⁵⁸ Cani nu gaxha de labe ne ca binii'lidxibe guyudiaga'ca ni xhaique biluii laca pabia naroba xhilase xti ne labee' ne biechene cabe labee'. ⁵⁹ Gucasi lu xhonoo gubidxa lacabe bedanecabe baduhuinica guirugu' tindaa'. gulecabe laabe "Zacarías", casi laa' bixhozebe. ⁶⁰ Peru jñiabe bicabi ne guni: "co labe chiguire' labe juan." ⁶¹ Lacabe gudxi cabe labe: gastidi' de binii lidxilu ni laa' zacaca'." ⁶² Ne lacabe binicabe seña lu bixhoze'be ti ma guinabaadidxa' cabe xhi modo napabe gana guiré laabe. ⁶³ Bixhozebe gunaba ti ra guca ne bicabe: "laabe nga juan." de guiraa cabe bidxaga' yacabe. ⁶⁴ Ne ora queca bidxele ruabe ne bilaa' ludxibe. labe gunibe ne bizizacabe diuxhi. ⁶⁵ Guendaa ridxibi beda ranú guiraa ni nabeza gaxha de lacabe. ne guirandí laa bireche' cani lade caa danii xti Judea. ⁶⁶ Ne guira ni guyudia ndi la gupa cabe cani ndani ladxidocabe ne guni cabe' ¿yana ya xhi zaca baduhuini di? ne naa' diuxi nune Labe. ⁶⁷ Bixhozebe Zacarías bidxa tipabe' de espiritu santu ne gunibe xhi chi gaca de la: ⁶⁸ "Gusisaca cabe xhaique, Diuxi xti Israel, ti purti labe beda gacanebe ne labe bedaa gulabe xpinibe. ⁶⁹ De ndani lidxi David ni bini xhiñabe bixhidxi be ti cachu para gulabe binii. ⁷⁰ Casi ca laabe gunibe de rua ca Santos profetas xtibe, ca ni guyu de dxique'. ⁷¹ Laabe zedanebe ' guenda ru laa' de xti ca ni que riegu lanu ne de lu naa' de guira' ni nana ladxi lanu'. ⁷² Labe zunibe ndi para guluibe xhilase xtinu ca bixhozenu ne para gusiete naladxibe didxa nandxoo ni bitacunanebe latu, ⁷³ didxa ni gaca ni gudxibe Abraham bixhozenu. ⁷⁴ Labe bidixtidxabe ne lanu bilasibe lanu de luna ni nanaladxilanu, ne zuninu xhiñabe sin guenda ridxibi, ⁷⁵ ni naya ne ni nu jneza neza lube de guira dxi nabaninu. ⁷⁶ Ya, ne li,xcuidi, zare' lalu ti profeta de ni ma luguia, ne li zielu neza' lu xhaique xtinu para cuaquichahuilu ca jnezabe, para cuaquichahui binii de dxi guedabe, ⁷⁷ ti gudiee guenda biani ni rulaa guidxi pur guenda rixhia dondaa'. ⁷⁸ Ndi zaca, purti guizaa' sicaru xhilase xti Diuxi xtinu, pur ti biani ni rihuini xha guiba zeeda ne zedagaca ne lanu', ⁷⁹ Ti guzani ra nu cani ribica ra nacahui ne lu bandaa' xti guenda guti. Labe zunibendi ti ganda' gacanebe ñenu zaa lu jneza xti lu guenda ratadxi ladxidoo." ⁸⁰ Yana xcuidica binisi ne gucabe nadipa lu espiritu, ne labe nube ndani yude' nda dede dxi labe guihuinibe neza lu guidxi xti Israel.