الفصل 5
1
كِكَانْ الْنَّاسْ يَدَّامْرُو عْلِيه بَاهْ يَسَمْعُوا كْلَام الْلَّه، كَانْ يَسُوعْ وَاڤَفْ عَنْدْ بُحَيْرَة جَنِّسَارَتَ .
2
و شَافْ زُوجْ فْلَايَكْ حَابْسِينْ حْدَا الْبُحْيْرَة وْ خَرْجُوا مَنْهُم الْبَحَّارَة بَاشْ يَغَّسْلُوا شَبَّاكْهُم .
3
دْخَلْ لْوَحْدَة مَنْهُمْ نْتَاعْ سَمْعَانْ و طْلَبْ مَنَّه بَاهْ يْبَعَّدْ شْوِيَة عْلَى الْبَّر ومْبَّعْد جَمَّع و بْدَا يْعَلَّم فَالْنَّاسْ مَنْ الْفْلُوكَة .
4
و كِكَمَّلْ كْلَامَه ڤًالْ لْسِمْعَانْ :" رُوحُوا لَلِعُمْقْ و قِيسُوا الْشَبَّاكْ الْتَّاعْكُمْ بَاهْ تْصَيْدُوا ".
5
جَاوْبَه سَمْعَانْ و ڤَالْ : " تْمَرْمَدْنَا ڤَاعْ الْلِّيلْ يَاسِيدِي و حْنَا أَنْصَيْدُوا و مَلْقِينَا حَتَّى حَاجَة . بَصَّحْ عْلَى كَلْمَتَّكْ غَادِي نْقِيسْ الْشَّبْكَة ".
6
كِدَارُوا هَادْ الْشِّي صَيْدُوا بَزَّافْ الْحُوتْ حَتَّى بْدَاتْ شَبْكَتْهُم تَتْڤَطَّعْ .
7
و رَيَّشْ لْهَادُوكْ لِكَانُوا فَالْفْلُوكَة أُحْدُخْرَى بَاهْ يْجُوا وَيْعَوْنُهُمْ . جَاوْ عَمْرُوا الْفْلَايَكْ نْتَاعْهُمْ حَتَّى ڤَرْبُوا يَغَّرْقُوا .
8
كِشَافْ سِمْعَانْ بُطْرُسْ هَادْ الْشِّي رْكَعْ عَنْدْ رَجْلِينْ يَسُوعْ و ڤَالَه: "أُخْرُجْ مَنْ فْلُوكْتِي يَاسِيدِي عْلَى خَاطَرْ أَنَا رَاجَلْ خَاطِي".
9
عْلَى خَطَرْشْ تْعَجَّبْ هُوَ و ڤَاعْ هَادُوكْ لِمْعَاه مَنْ الْحُوتْ لِصَيْدُوهْ .
10
وتَانِي يَعْقُوبْ و يُوحَنَّا و وْلَادْ زَبَدِي لِكَانُوا شُرْكَا مْعَ سِمْعَانْ. و ڤَالْ يَسُوعْ لْسِمْعَانْ : " مَتْخَافْشْ مَنْ الْيُومْ تْوَلِّي تْصَيَّدْ فَالْنَّاسْ !".
11
مَمْبَعْدْ رَدُّوا فْلَايَكْهُم و خَلُّوا كُلْشِي و تَبْعُوا يَسُوع . يَسُوعْ يَشْفِي لَبْرَسْ
12
كِكَانْ فِي وَحْدْ الْمْدِينَة ، كَانْ وَاحَدْ الْرَّجُلْ مْعَمَّر بْرَصْ. كِشَافْ يَسُوعْ طَاحْ رْكَعْ عْلَى وَجْهَه و طَلْبَه و ڤَالَه :" يَاسِيدِي، إِذَا بْغِيتْ تَقْدَرْ اطَهَّرْنِي".
13
مَدْ يَدَّه و تْلَمْسَه و ڤَالَه : " بْغِيتْ ، تْنَقَّى ". تَمتَمء بْرَى .
14
وَصَّاه يَسُوع بَاه مَيْڤُول حَتَّى وَاحَد . و ڤَالَه :" رُوحْ وَرِّي رُوحَكْ لَكَّاهَنْ ، و قَدَّم تَقْدِيمَة عْلَى نْقَاوَة تَاعَكْ كِيمَا وَصَّى مُوسَى بَاشْ يْكُونْ شْهَادَة لِيهُم".
15
زَادْ شَاعْ خَبْرَه . و تْلَايْمُوا بَزَّافْ الْنَّاسْ بَاه يَسَّمْعُوا و شْفَاوْ مَنْ مَرْضْهُمْ .
16
بَصَّحْ كَانْ يَعْتَزِلْ فالْبْلَايَصْ الْخَوْيَا و يْصَلِّي . شِفَاء مَشْلُولْ
17
و فْوَاحَدْ نْهَارْ كَانْ يَسُوعْ يْعَلَّمْ ، و كَانُوا فَارِسْيِّينْ مْعَلْمِينْ الْشَّرِيعَة قَاعْدِينْ و هُمَا جَاوْ مَنْ ڤَاعْ دْوَاوِيرْ لِفَالْجَلِيلْ الْيَهُودِيَة و أُورُشَلِيمْ . و بْقُوَّة الْرَّبْ لِكَانَتْ مْعَاهْ بْرَاوْ ڤَاعْ .
18
وْ جَاوْ نَاسْ رَافْدِينْ عْلَى الْفْرَاشْ وَاحَدْ مَشْلُولْ ، و كَانُوا احَوْسُوا كِيفَاشْ يْدِيرُوا بَاهْ يْدَخْلُوه و يْحَطُّوهْ فَالْوَسْطْ ڤُدَّامْ يَسُوعْ .
19
و كِيمَا لْقَوْشْ كِيفَاهْ يْدَخْلُوه طَلْعُوا لَسْطَحْ و هَوْدُوه بَفْرَاشَه مَنْ بِينْ الْقَرْمُودْ و حَطُّوهْ فَالْوَسْطْ قُدَّامْ يَسُوعْ .
20
و كِيشَافْ يَسُوعْ إِيمَانْهُمْ ڤَالْ لَلْمَشْلُولْ :" يَارَجَلْ ، مَغْفُورَة ذْنُوبَكْ ".
21
و بْدَاوْ الْكَتَبَة و الْفَرِّسِيُّونْ يْفَكْرُوا فِي ڤْلُوبْهُمْ و يْڤُولُوا " شْكُونْ هُوَ هَذَا لِيَكْفَرْ عْلَى رَبِّي ؟ شْكُونْ يْنَجَّمْ يَغْفَرْ ذْنُوبْ مَنْ غِيرْ رَبِّي وَحْدَه؟".
22
و عْرَفْ يَسُوعْ شَيْخَمَّمُوا ، و جَاوَبْهُمْ و ڤَالْهُمْ : " عْلَاشْ تْخَمَمُوا كِيمَا هَكَا فِي ڤْلُوبْكُمْ ؟
23
شْكُونْ لِي سَاهَلْ: نْڤُولْ مَغْفُورَة ذْنُوبَكْ ، وَلَّا نْڤُولْ : نُوظْ اُومْشِي؟
24
و بَاهْ تَعَّرْفُوا بَلِّي لِإِبْن الْإِنْسَانْ سُلْطَة عْلَى الْأَرْضْ بَاه يَغْفَرْ الْذْنُوبْ "، ڤَالْ لَلْمَشْلُولْ : " لِيكْ نْڤُولْ : نُوضْ وَرْفَدْ فْرَاشَكْ و رُوحْ لْدَارَكْ ! ".
25
تَمْتَمْ نَاضْ مَنْ ڤدَّامْهُمْ ، رْفَدْ فْرَاشَه ، و رَاحْ لْدَارَه و هُوَ يْمَجَّدْ الْلَّه.
26
و ڤَاعْ نْخَلْعُوا و مَجْدُوا الْلَّه، و خَافُوا بَزَّافْ و ڤَالُوا : " الْيُومْ شَفْنَا لَعْجَبْ !".
27
و مَمْبَعْدْ ڤَاعْ هَادْ الْشِّي خْرَجْ يَسُوعْ و شَافْ وَاحَدْ مَنْ جَبَّايِينْ الْضَّرَائِبْ يْسَمُّوهْ لَاوِي مْجَمَّعْ فِي دَار الْضْرِيبَة، و ڤَالَّه : "تَبَّعْنِي ".
28
نَاضْ و خَلَّا كُلْشِي و اتَّبْعَه .
29
و دَارْلَه لَاوِي ولِيمَة فِي دَارَه . و لِي كَانُوا حَاضْرِينْ مَتَّكْيِينْ مْعَاهُمْ كَانُوا ڤَاعْ عَشَّارِينْ وْوَحْدُخْرِينْ .
30
زَعْفُوا الْكَتَبَة و الْفَرِّسِيُونْ عْلَى تَلَامِيذْ يَسُوعْ و ڤَالُوا : "عْلَاشْ تَاكْلُوا و تَشَّرْبُوا مْعَ الْخُطَاة و الْعَشَّارِينْ؟".
31
جَاوَبْهُمْ يَسُوعْ و ڤَالْهُمْ : " مَشِّي الْصْحَاحْ لِيَسَّتْحَقُّوا الْطْبِيبْ ، بَصَّحْ الْمَرْضَى لِيَسَّتْحَقُّوا .
32
مَجِيتْشْ بَاه نْعَيَّطْ لَنَّاسْ لِتَتَّقِي الْلَّه بَصَّح لَلْمَذْنُوبِينْ بَاه يْتُوبُوا ".
33
الْبَعْضْ مَنْهُمْ ڤَالْ لْيَسُوعْ : "عْلَاشْ تَلَامِيذْ يُوحَنَّا يْصُومُوا و ايْصَلُّوا بَزَّافْ ، و تَانِي تَلَامِيذ الْفَرِّسِييِّنْ ، بَصَّحْ تَلَامِيذْ نْتَاعَكْ يَاكْلُوا و يَشَّرْبُوا ؟ ".
34
و جَاوَبْهُمْ يَسُوعْ : " تْنَجَّمْ تْخَلِّي الْمَعْرُوضِينْ يْصُومُوا و لَعْرِيسْ مَعَاهُم ؟
35
بَصَّحْ غَادِي تْجِي يَمَاتْ وِينْ لَعْرِيسْ يَتَّرْفَعْ ، فْهَادَاكْ الْوَقْتْ غَادِي يْصُومُوا ".
36
و ڤَالْهُم تَانِي "مَكَانْ حَتَّى وَاحَدْ يْڤَطَّعْ لْبَاسْ جْدِيدْ و يْرَقَّعْ بِيه لْبَاسْ قْدِيم ، و إلَا دَارْ هَدَاكْ الْشِّي غَدِي يَتْڤَطَّعْ الْجْدِيدْ، و الْطَّرْف لَمْرَقَّعْ نْتَاعْ لْبَاسْ جْدِيدْ مَيْجِيشْ مْعَ لَقْدِيمْ .
37
حَتَّى وَاحَدْ مَيْنَجَّم يْدِيرْ شْرَابْ جْدِيدْ فِي ڤَرْبَاتْ قْدُمْ بَاشْ الْشْرَابْ الْجْدِيدْ، مَايْشَقَّقْشْ الْڤَرْبَاتْ .
38
و يْضِيعْ الْشْرَابْ بَصَّح الْشْرَابْ الْجْدِيدْ يَنْدَارْ فِي ڤَرْبَاتْ جْدُدْ .
39
و حَتَّى وَاحَد مَايُشْرُبْ لَشْرَابْ لَقْدِيمْ فَالْلَّوَّلْ و يَبْغِي يُشْرُبْ مَنْ مُورَاه شْرَابْ جْدِيدْ عْلَى خَاطَرْشْ يْڤُولْ : الْشْرَابْ لَجْدِيدْ ".