فصل 2
1
وْفْدِيكْ لِيَامْ اَمَرَ القَيْصَرْ اُوغِسْطُسْ بَاشْ يَكَتْبُوا الاِحْصَاءْ تَاعْ ڤَاعْ سُكَانْ الامْبْرَاطُرِيَة.
2
وْكَانْ هَدَا اوَّل احْصَاءْ نْدَارْ مَلِّي كَانْ كِيرِينْيُوسْ وَالِي عَلَى سُورْيَا.
3
وْ رَاحْ كُل وَاحَدْ لَمْدِينْتَهْ بَاشْ يَكْتَبْ فِيهَا.
4
وْخْرَجْ يُوسَفْ حَتَى هُوَ مَنْ النَاصِرَة الِّلي في الجَليلْ وْ رَاحْ لْمَدِينَة دَاوَدْ ، بَيْتْ لَحْمْ عْلَى خَاطَرْشْ مَنْ عَايْلَة دَاودْ وْ قَبِيلْتَهْ.
5
بَاشْ يَكْتَبْ معَ مَرْيَمْ خَطِيبْتَهْ الِّلي كَانَتْ بالْكَرْشْ .
6
وْكِكَانوا فِي بَيْتْ لَحْمْ وْصَلْ وَقْتْ الوِلَادَة تَاعْهَا .
7
زَيْدَتْ وَلْدْهَا البِكَر وْ ڤمْطَاتَهْ وْ رَڤْدَاتَهْ فِي المدْوَدْ ، عْلَى خَاطَرْشْ مَاكَانْشْ عَنْدْهُمْ بْلَاصَة في الدَّارْ .
8
وْكَانُوا فْدِيكْ الجِهَة سُرَّاحْ يْبَاتوا بَرَّا وْ يتْنَاوْبُوا عْلَى العَسَّة تَاعْ لَغْنَمْ تَاعْهُمْ بالِيلْ .
9
وْ بَانلْهُمْ مَلَاكْ مَنْ عَنْدْ الرَّبْ وْ مَجْدْ الرَّبْ ضَوَّا عْلِيهُمْ وْ نْخَلْعُوا بَزَّافْ .
10
وْڤَالْهُمْ : "مَاتْخَافُوشْ عْلَى خَطَرْشْ رَانِي جَايَبَلْكُمْ خْبَارْ مْلِيحْ يْفَرَّحْ ڤَاعْ الشَعْبْ .
11
رَاهْ اليُومْ تَوْلَدَلْكُمْ فِي مَدِينَة دَاودْ مُنَجِّي الِّلي هُوَ المَسِيحْ الرَبْ .
12
وْهَادِي هِي العَلَامَة لِغَادِي نَعْطِيكُمْ : غَادي تْلْڤَاوْ وَلْدْ مْڤَمَطْ وْ رَاقَدْ فِي مَدْوَدْ .
13
وْعْلَى غَفْلَة بَانْ مْعَ المَلاكْ جْمَاعَة من الجَيْشْ تَاعْ السْمَا يْسَبْحُوا الرَبْ وْيْڤُولُوا :
14
" العِزْ لِلّهْ في السَمَاءْ العَالِيَة وْعْلَى الارْضْ لَهْنَا لْهَادُوكْ لِيرَاضي عْلِيهُمْ " .
15
وْمَلِّي خَلَّاوْهُمْ المَلَايْكَة وْرَجْعُوا لْسْمَا ، قَالُوا السُّرَاحْ لْبَعْضَاهُمْ :"اَيَا نْرُحُوا دَرْوَكْ لْبَيْتْ لَحْمْ وْنْشُوفُوا هَادَاكْ الشِي لِي عْلَمْنَا بِيهْ الرَبْ " .
16
وْرَاحُوا بَلْخُفْ وْلْڤَاوْ مَرْيَمْ وْ يُوسَفْ وْ الطْفَلْ رَاقَدْ فْالْمَدْوَدْ
17
وْكِيشَافُوهْ عَاوْدُوا وَاشْ ڤَالْهُمْ المَلَاكْ عْلَى هَادَاكْ الطْفَلْ .
18
وْڤَاعْ هَادُوكْ لِسَمْعُوا كْلَامْ السُّرَاحْ تْعَجْبُوا مَنْ هَادَاكْ الشِي .
19
بصَّحْ مَرْيَمْ كَانَتْ تْخَلي ڤَاعْ هَادْ الاُمُورْ فِي خَاطَرْهَا وْتَتْمَعَّنْ فِيهُمْ فِي قَلْبْهَا .
20
وْوَلَاوْ السُّراحْ وْهُمَا يْعَيْطُوا العِزْ لِلّهْ وْ يْسَبْحُوهْ عْلَى ڤَاعْ لِسَمْعُوهْ وْشَافُوهْ عْلَىخَاطَرْشْ ڤَاعْ دَاكْ الشِي لِي صْرَا كَانْ كِيمَا ڤَالهُمْ المَلَاكْ .
21
وْمَلِّي كَمْلُوا تْمَنيَامْ جَا الوَقْتْ بَاشْ يَتَخْتَنْ الطْفَلْ وْتْسَمَى يَسُوعْ ،كيمَا سمَاهْ المَلَاكْ قْبَلْ مَا تَرْفَدْ مَرْيَمْ في كَرْشْهَا .
22
و مَلِي كَمْلَتْ لِيَامْ تَاعْ التَطْهِيرْ نْتَاعْهُمْ كِمَا كَايَنْ فِي شْرَعْ مُوسى، دَاوْ يَسُوعْ لأُرْشَلِيمْ بَاشْ يْقَدْمُوهْ للرَبْ،
23
كِمَا مَكْتُوبْ فِي شْرَعْ الرَبْ: اللِي يْقُولْ بَلِي كُلْ ذْكَرْ بْكَرْ هُوَ تَاعْ الرَبْ.
24
وبَاشْ يْقَدْمُوا الدْبِيحَة كِمَا تْقَالْ فِي شْرَعْ الرَبْ: زُوجْ طْيُورْنْتَاع اليَمَامْ و زُوجْ فْرَاخْ نْتَاعْ الحْمَامْ.
25
وكَانْ فأُرْشَلِيم وَاحدْ الرَاجَلْ صَالَحْ و مُتَقِي الله إِسِمِوَه سِمْعَانْ، يَسَّنَى السْلاَكْ (الخَلاَصْ) نْتَاعْ شَعْبْ إِسْرَائِيلْ ،و كَانْ الروح القُدُسْ عْلِيهْ .
26
وعْرَفْ مَنْ الروح القُدُسْ بَلِي مَا غَادِيشْ إيمُوتْ حَتَّى يْشُوفْ مَسِيحْ الرب.
27
و بَالروح القُدُسْ جَا لْهَيْكَلْ الله. و مَلِي جَابُوا الوالْدِينْ وَلْدْهُمْ يَسُوعْ، بَاشْ يَعْطِيوعْلِيهْ كِمَا يْقولْ فَشْرَعْ.
28
رَفْدَه سَمْعَانْ فِدْرَاعََه وبَارَكْ الله وڤَالْ :
29
"و دْرَوَكْ يَاربِي طْلَقْ سْرَاحْ العَبْدْ نْتَاعَكْ عْلَى خِيرْ كِمَا فَاتْ ووْعَدْتْ.
30
عَلَى خَاطَرْ عِينِيَّ شَافُوا السْلاَكْ (الخَلاَصْ)نْتَاعَكْ.
31
اللِي وَجّدْتَهْ قُدَامْ الشُعُوبْ كُلْهُمْ.
32
نُورْ يَهْدِي الشُعُوبْ أَللِي مَا يَعْبْدُوشْ الله، و العَّزْ لْشَعْبَكْ إِسْرَائِيلْ".
33
وتْعَجَّبْ يُوسَفْ وامَّه مَنْ دَاكْ الشِي لِتْڤَالْ فِيه.
34
وبَارَكْهُمْ سَمْعَانْ وڤَالْ لْمَرْيَمْ مُّه :" هَادْ الوَلْدْ تَخْتَارْ بَاشْ يْكُونْ سْبَابْ لْبَزَافْ نْتَاعْ النَاسْ فْإِسْرَائِيلْ إِيطِيحُوُا و نَاسْ أُخْرِينْ بَاشْ إِينُضُوا،بَاشْ يْكُونْ عَلاَمَة إِخُوذُوهَا النَاسْ.
35
و هَاكَا غَادِي تْبَانْ أَفْكَارْ لَمْخَيْبَة نْتَاعْ النَاسْ ، حَتَى أَنْتِي يَامَرْيَمْ غَادِي يَدْخَلْ سِيفْ فِي نَفْسَكْ.
36
وكَانَتْ تَمَّ وَاحَدْ النَبِيَّة، كْبِيرَة فْلَعْمَرْ إِسِمِوْهَا حَنَّة بَنْتْ فنُوئِيلْ مَنْ قَبِيلَة أَشِيرْ، تْزَوْجَتْ و عأشَتْ مْعَ رَاجَلْهَا سَبْعْ سْنِينْ.
37
وْڤَعْدَتْ هَجَالَة حَتَّى ولَّى فِي عْمَرْهَا رَبْعَة وثْمَانْيِينْ عَامْ، وهِيَ دَايَمْ فِي لْهَيْكَلْ تَعْبَدْ الله بَالصُومْ و الصْلاَة لِيلْ و نْهَارْ.
38
و تَمْ تَمْ جَاتْ و ڤَرْبَتْ لْعَنْدْهُمْ و شَكْرَتْ الله يْسَلَّكْ و يَفْدِي أُورْشَلِيمْ.
39
و مَلِي كَمَّلْ يُوسَفْ و مَرْيَمْ ڤَاعْ دَاكْ الشِي لِمَفْرُوضْ عْلِهُمْ فِي شَرْعْ الرب، وَلاَوْ لَمْدِينَتْهُمْ النَاصِرَة فَالجَلِيلْ.
40
و كَانْ الوَلْدْ يَكْبَرْ و يَتْقَوَى بالروح، ومْعَمَرْ حِكْمَة، وكَانَتْ نِعْمَة الله عْلِيه.
41
و كَانُوا وَلْدِينْ يَسُوعْ يْرُوحُوا كُلْ عَامْ لأُرْشَلِيمْ فِي عِيدْ الفِصْحْ.
42
و كِوَّلاَ عَنْدْ يَسُوعْ طْنَاشْ نْعَامْ، طَلْعُوُا لِأُرْشَلِيمْ كِمَا كَانَتْ العَادَة فالعِيدْ. وكِكَمْلَتْ لِيَامْ تَاعْ العِيدْ،
43
و كِكَمْلَتْ لِيَامْ تَاعْ العِيدْ، وَلاَوْ وَالْدِينْ يَسُوعْ وبْقَى هُوَ فِي أُورْشَلِيمْ ، بَّلاَ مَا يَعَرْفُوا وَالْدِيهْ.
44
حَسْبُوا بَّلِي رَاهْ مْعَ النَاسْ المَسَفْرِينْ مْعَاهُمْ، و كِي مْشَاوْ نْهَارْ كَامَلْ، بْدَاوْ يْحَوْسُوُا عْلِيه عَنْدْ العَايْلَة و المَعَارَفْ الِي كَانُوا مْعَاهُمْ.
45
و كِمَا لْقَاوَهْشْ وَلاَوْ لأُورْشَلِيمْ يْحَوْسُوا عْلِيه.
46
و بَعْدْ ثَلْثْ إِيَامْ لْڤَاوَه فِي هَيْكَلْ الله، جَالَسْ فِي وَسْطْ عُلَمَاء الشْرَعْ، يَصَنَتْ و يْسَقْسِيهُمْ.
47
و ڤَاعْ الِي كَانُوا يَسَمْعُوهْ تْعَجْبُوا مضنْ الذَكَاء تَعَهْ و مَنْ أَجْوِبْتَهْ.
48
و مَّلِي شَافُوهْ وَالْدِيه تْعَجْبُوا، ڤَالَتْ لَهْ مَّهْ :"عْلاَشْ يَاوَلْدِي دَرْتْنَا هَكْدَا؟ أَنَا و بُوكْ كُّنَا نْحَوْسُوا عْلِيكْ و حْنَا مَخْلُوعِينْ!"
49
جَاوْبْهُومْ يَسُوعْ وڤَالْ:" عْلاَشْ تْحَوْسُوا عْلِيَّا ؟ مَاتَعَرْفُوشْ بَلِي خَاصْنِي فِي دَارْ بُويَا؟".
50
بَصَحْ مَا فَهْمُوشْ وَاشْ ڤَلْلْهُمْ.
51
وْوَلَّى مْعَاهُمْ للنَاصِرَة وْكَانْ يْطِيعْهُمْ وْدَسَّتْ مُهْ ڤَاعْ هَدِيكْ الاُمُورْ فِي ڤَلْبْهَا .
52
وْكَانْ يَسُوعْ يَكْبَرْ وْيْزِيدْ فالْحِكْمَة والقُبُولْ عَنْدْ النَاسْ وْاللَّهْ .