الفصل 10
1
وْمْبَعدْ هَذَاكْ الشِيْ خَيَر الْرَّبْ سْبعِينْ وَاحْد خْرِينْ وَرْسلهُمْ زُوجْ زُوجْ لْكُلْ مْدِينَةْ وْمُوضَعْ وِينْ كَانْ هُوَ مْعول بَاشْ إِيْرُوحْ.
2
ڤَالْهُمْ : " الغْلَةْ بْزَافْ بْصَح الخْدَامَة قْلاَلْ، طْلْبُوْا مْنْ رَّبْ الغْلَة بَاشْ يْرسْل خْدَامَةْ لْلْغَلَةْ تَاعَهْ.
3
رُوْحُوا أَنَا نَرْسلْكُمْ كِيمَا لَّغْنَمْ بِينْ الدْيُوبَا.
4
مَا تْدُوا مْعَكُمْ ڤُفَةْ وْلاَ نْعَايْل وْمَاتْسلُمُوا عْلَى حْتَى وَاحدْ فْي الطَرِيڤْ.
5
وْكِيْ تْدْخلْ لْكَاشْ دَارّْ سْلْمٌو عْلٍيهُمْ فْي لّْوُلْ.
6
إِذَا كَانْ فِيهَا تْمَا إِبْنْ السَلاَمْ غَادِيْ يْردْ عْلِيكُمْ سَلَامْ، إِذَا مَكَنْشْ يْرجَعْ لِيْكُمْ سْلَامْكُمْ.
7
وْبَاتُو فِيْ هَاذِيْكْ الدَّارّْ كُلُو وْشَرّْبُو مْن لِيْ يَعْطَلْكُمْ ، خَاطَرْ الخْدَامْ يْسْحَقْ أَجْرْ تَاعَهْ وْمَا تْرُوحُوشْ لْدَارّ لْدَارّْ.
8
كُلْ مْدِينَة دْخْلْتُوهَا وْقْبلُوكُمْ فِيهَا، كُلُوْا مْنْ شِيْ لِتْمْدْ لْكُمْ،
9
اشْفُوْا لْمَرّْضَى لِيْ فِيهَا وْ ڤُولُو لِيهُمْ رَاهْ ڤْرَبْ مْنْكُمْ مَلَكُوتْ الله.
10
وْكُلْ مْدِينَة دْخلْتُوهَا مَقْبلُوكُومْشْ خَرْجُو لْزنقهَا وْڤُولُو :
11
حْتَى ْالغْبَارّْ لِيْ لْصَق فِينَا مْنْ مْدِينَتكُمْ نْنْفضُوهْ، بْصَحْ عَرْفُوا هَذاَ : رَاهْ ڤرْبْ مَنكُمْ مَلَكُوتْ اللَه .
12
أْنْڤُولْكُم: غَادِيْ تْصْرّا لْهَذِي لْمْدِينَة كْثَرْ مْلِي صْرَا لْسُدُومْ.
13
يَاوِيْلَكْ يَاكُورَزِينْ! يَاوِيلَكْ يَابِيتْ صَيْدَا ! عْلَى خَاطَرْ لُوكَانْ أْصْرَاتْ المُعْجٍزاَتْ لِيْ صْرَاتْ فِيْ صُورْ وصَيدَا ، لُوكَانْ رَاهُمْ تَابُوْا مْنْ بْكرِيْ وْرَجعُوا لْلرَّبْ .
14
بْصَّحْ صُورّْ وْصِيدَا غَادِي يْكُونْ لِيهُمْ حْسَابْ قْلْ مْنْكُمْ.
15
وْنْتِيْ يَاكَفَرْنَاحُوْمْ لِي رَاكِيْ تْرفْدِيْ رُوحَكْ لْسْمَا، غَادِيْ أَتْهَوْدِي لْلجَحِيمْ.
16
أْلِيْ يَسْمَعْ مْنْ عَنْدْكُمْ كْلِيْ يْسْمَعْ مْنِي، وْلِي مَا قْبْلْكُومْشْ مَاقْبْلْنِيشْ ، وْلِي مَايْقبْلْنِيشْ مَايْقْبْلْشْ أْلِيْ يَرْسْلْنٍيْ".
17
كِيْ وْلاَوْ هَذُوكْ السْبْعِينْ لِيْ رْسْلهُمْ فَرْحَنِينْ، ڤَالُوْ لَهْ:" يَارَّبْ حْتَى الأَرْوَاحْ النَجِسَة تْخْضَعْ لِينَا بْإِسْمَكْ!".
18
ڤَالْهُمْ : "شْفْت الشِيْطَانْ طَايْحْ كِيْ البَرّْقْ مْن السْمَا.
19
غَادِيْ نَعْطِيكُمْ السُلْطَانْ بَاشْ تْعفْسُو عْلَىْ لَحْنُوشَى وْلَعْقَاربْ وْڤَاعْ قُوَة لَعْدُو وْمَا يْضركُمْ حْتَى شِيْ.
20
بْصَحْ مَا تَفَرحُوشْ بْهَذَا: بلِيْ الأَرْوَاحْ رَاهِي تَخْضَعْ لِيكُمْ ، بْصَحْ فَرّْحُوا بْلِي سْمَاوَاتكُمْ رَاهِي مَكْتُوبَة فْي السْمَا".
21
وْفِي دِيْكْ السَاعَةْ سّْبَحْ يَسُوعْ بْالرُوحْ وْڤَالْ :" نْحَمْدَكْ يَابُويَا، رَّبْ السْمَا والأَرْضْ ،خَاطَرْ دْسِيْتْ هَذَا الشِيْ عْلَى الحُكَمَاءْ وْالعُلَمَاءْ ، وْبيْنتهَا لْصْغَارْ. وَاهْ يَابُويَا، عْلَى خَاطَرْ هَذِيْ هِيَ مَشِيئَة نْتَعكْ لْمْلِيحَةْ".
22
وْدَارّْ عْنْد التَلاَمِيذْ نْتَاعَه وْڤَالْهُمْ: " كُلْ شِي تَعْطَا لِيْ مْنْ بُوْيَا وْمَكَانْ حْتَى وَاحْد يَعْرفْ الإِبْنْ مْن غِيْرْ الأَبْ، وْلاَ شْكُونْ هُوَ الأَبْ منْ غِيْرْ الإِبْنْ".
23
وْداَرّْ عْندْ التَلاَمِيْذْ نْتَاعَهْ وْڤَالْهمُ: "يَاسَعْدَاتْ العْينَينْ الَلْي تْشُوْفْ الِلْي رَاكُمْ تْشُوفُوُهْ !
24
عْلَى خَاطَرْ رَانِيْ نْڤُولْكُمْ كَاينْ أَنْبِيَاءْ وْمُلُوكْ بْزَافْ أْبْغَاوْ إِشُوفُوا آْشِيْ لِيْ رَاكُمْ تْشُوفُوهْ وْمَاشَفُوهْشْ ، آْشِي لِيْ رَاكُمْ تْسْمْعُوُهْ وْمَا سْمعُوهْشْ".
25
وَاحَدْ مْنْ مُعَلِمِيْ الشَرِيعَةْ نَاضْ وْبْغَى يْجَرّْبَه وْڤالَهْ: " يَاسِيْدِي وَاشْ نْدِيرْ بَاشْ نْورَثْ الحَيَاة الأَبَدٍيَة؟".
26
جَاوْبَه يَسُوعْ وْڤالَه: " شَا رَاهْ مَكْتُوبْ في الشَرِيعَة؟ كِيفَاشْ تْفَهمَهْ؟".
27
جَاوْبَهْ وْڤالَ:" تْحْبْ الرَّبْ إِلَاهَكْ مِنْ كُلْ قَلْبَكْ، وْمِنْ كُلْ نَفْسَكْ وْكُلْ قُوْتَكْ وْمْن كُلْ فِكْرَكْ، وْتْحبْ غِيْرَكْ كِمَا نْفسَكْ".
28
وْڤالَهْ يَسُوعْ " جَاوُبْتْ بْالصْوَابْ ، دِيْر كِمَا هَاكْ وْغَادِيْ تْحيَا لِلأَبْدْ ".
29
بْصَحْ هُوَ بْغَا يْمدْ الحَق لْرُوحَهْ وْڤالْ لْيَسُوعْ: " شْكُونْ هُوَ غِيْري؟ ".
30
جَاوْبَهْ يَسُوعْ وْڤَالْ:" كَايْنْ وَاحَدْ رَاجْلْ مْهودْ مْن أُوْرْشَالِيمْ لأَرِيْحَا، طَاحْ بِيْنْ يْدِينْ الْخْيَانْ ، عْرَاوْهْ وْضَرْبُوهْ وْرَاحُوْا وْخْلَاوْهْ بِيْنْ الْحْيَا وْالمُوتْ.
31
تْمْ تْمْ فَاتْ وَاحدْ رَاجْلْ دِيْنْ مِنْ دِيْك ْالطْرِيْڤْ شَافْهْ، وْ مْمْبَعْدْ كْمْل طْرِيْڤَهْ.
32
وْفَاتْ تَانِيْ وَاحْد مْن لاَوِيْينْ مْنْ دِيْكْ الطْرِيڤْ، ڤَرْبْ عْنْدَهْ وْشَافْ فِيْهْ، رَاحْ وْخْلاَهَ.
33
وْبْصَحْ وَاحْد بْرَانِيْ مْنْ بْلاَدْ السَامِرَةْ مْسَافْر جَا لْعَنْدَهْ، كِيْ شَافَهْ تْحْنَنَ عْلِيْهْ،
34
ڤْدْمْ عَنْدَهْ دَاواَ جُرْحَهْ بْالزِيْتْ وْالخَمْرَة، رْكْبَهْ عْلَى الدَابَة تَاعَهْ وْدَاهْ لْوَاحْدْ الفُنْدُقْ وْتْهّْلَّىْ فِيْهْ .
35
دِيْكْ الغْدْوَا كِيْ بْغَا إِرُوْحْ، خْرْجْ دْرَاهمْ وْعَطَاهُمْ لْمُولْ الفُنْدُقْ وْڤَالَهْ تْهلَّى فِيهْ، وْڤْدْ مَا صْرفْتْ عْلِيْهْ كِيْ نْولِيْ نْردْهُمْلَكْ.
36
شْكُونْ مْنْ هَادْ الثْلاَثَةْ ڤِرِيْبْ مْنْ هَادْ الإِنْسَانْ الِلِيْ طاَحْ بِيْنْ يْدِيْنْ الخْيَانْ؟".
37
ڤَالْ:" الِلِي دَارْ مْعَاهْ الخِيْرْ". ڤَالَهْ يَسُوعْ :"رُوحْ أْنْتَ تَانِيْ وْدِيرْ كِيْمَا هَاكْ".
38
مْلِيْ كَانُو غَادْيِيِنْ دَخْلُوْا لْوَاحْدْ الدْ شْرَةْ، رَاحْبَتْ بِيْهْ وَاحْد لْمْرَّا كِيْسْمُوْهَا مَرْثَا فِيْ دَارّْهَا.
39
وْكَانْ عْندْهَا خْتْهَا إِسْمُوهَا مَرْيَمْ، اللِي جْمْعَتْ عْنْد رْجْلِيْن يَسُوعْ تَسْمَعْ كْلاَمَهْ.
40
وْبْصَحْ مَرْثَا كَانْتْ لاَهْيَةْ فْشْغلْ نْتَاعْ الدَارّْ ، وْڤْفتْ وْڤَالتْ:" يَارّْبِ مَايْهمكشْ بْلِي خْتِيْ خْلَتْنِي نْخدْم وَحْدِيْ، ڤُوْلْهَا تْعَاوُنِيْ!".
41
وْجَاوُبْهَا يَسُوعْ وْڤَالْهَا:" مَارْثَا، مَاْرْثَا رَاكِيْ مْقلْقَةْ وْتحْمقِيْ عْلَى بْزَافْ صْوَالَحْ،
42
بْصَحْ الإِحْتِيَاجْ لْوَاحْدْ بَرّْكْ. وْمَريمْ خْيرَتْ النَصِيْبْ الصَالِحْ لِمَيْتنْڤْلَعْلْهَاشْ".