الْفَصَلْ الْأَوَلْ
1
بُولُسْ، رَسُولْ مَاشِي مَنْ عَنْدْ الَنَّاسْ وْلَا مَرَّسُولْ مْنْ عَنْد شِي بْنَادَمْ، بَصَّحْ مَرَسُولْ بْيَسُوعْ لْمَسِيْحْ وْالله بُّوْنَا الَلِّي حْيَاهْ مَنْ بِيْنْ لْمُوتَ،
2
وْڤَاعْ لْخُوتْ الَلِّي مْعَايَا، لَلْكَنَائِسْ الَلِّي فِيْ غَلَاْطِيَةْ:
3
نِعْمَة لِيْكُمْ وَسْلَامْ مَنْ عَنْدْ الله بُّوْنَا، وْمَنْ عَنْدْ رَّبْنَا يْسُوْعْ لْمَسِيْحْ،
4
الَلِّي فْدَا بْرُّوْحَهْ عْلَى جَاْل دْنُوْبْنَا، بَاشْ يْنَجِيْنَا مَنْ هَادْ الَدَنْيَا الَلِّي مْعَمْرَّة شَرّْ، عْلَى حْسَابْ مْشِيئَةْ الله الَلِّي هُوَ بْونَا،
5
لِيهْ الْمَجْدْ لَلْبْدَا. آمِيْنْ
6
رَانِي نَتْعَجَبْ كِيْفَاشْ خْلِيتُو بْالْخَفْ طْرِيْڤْ الله الَلِّي دْعَاكُمْ بْنَعْمَةْ لْمَسِيحْ بَاشْ تْكُونُو شَعْبَهْ، وْبَدَلْتُوهْ بْإِنْجِيلْ وَاحَدْ آخَرْ!
7
لَحَقِيقَة مْكَاشْ إِنِجِيلْ وَاحَدْ آخَرْ، بَصَّحْ كَايْنِينْ شِي نَاسْ حَابِينْ يْهَلْكُوكُمْ وَيْحَوْسُوا يْحَرْفُوا كْلَامْ لْمَسِيحْ.
8
بْصَّحْ إِلاَ جَا وَاحَدْ وْخَبَرْكُمْ بْإِنْجِيلْ مَنْ غِيرْ الْإِنْجِيلْ الَلِّي سْمَعْتُوهْ مَنْ عَنْدْنَا، يْكُوْنْ لْمَصِّيرْ نْتَاعَهْ جَهَنَمْ، وْحْتَّى وِإِلاَ دَرْنَا حْنَّا هَدَا وْلَا مَلِكْ مَنْ الْسْمَا، غَادِيْ يْكُونْ «مَلْعُونْ»!
9
كِيمَا سْبَقْ وْڤُولْنَا نْعَاوَدْ نْڤُولْ دَرْوَكْ: إِلاَّ جَاوَاحَدْ وْخَبَّرْكُمْ بْإِنْجِيلْ مَنْ غِيرْ الْإِنْجِيلْ الَلِّي قْبَلْتُوهْ مَنْ عَنْدْنَا غَادِي يْكُونْ«مَلْعُونْ»!
10
نْحَوَسْ نَرْبَحْ الَنَّاسْ وْلاَ الله؟ وْلاَ نْحَوَسْ نَعْجَبْ الَنَّاسْ؟ لُكَانْ رَّانِي نْحَوَسْ نَعْجَبْ الْنَاسْ، مَعَنْتْهَا مَارَّانِيشْ عَبَدْ لَلْمَسِيحْ.
11
وْبْغِيتْ نْفَكَرْكُمْ يَاخُوْتِي بَلِّي الْإِنْجِيلْ الَلِّي خْبَرْتْ بِيهْ مَاجَاشْ مَنْ عَنْدْ بْنَادَمْ.
12
عْلَى خَاطَرْ مَاتْعَلَمْتَهْشْ وْلاَ سْمَعْتَهْ مَنْ عَنْدْ شِي بْنَادَمْ، بْصَّحْ تَعْلَنْ لِي مَنْ عَنْدْ لْمَسِيحْ.
13
رَاكُمْ سْمَعْتُو بْلَحْيَاةْ نْتَاعِي كِي كُنَتْ مَتْدَيَنْ بَالْيَهُوْدِيَة، وْكُنْتْ نَضْطَهَدْ كْنِيسَة الله الَلِّي كُنَتْ بَاغِي نَمْحِيهَا.
14
وْكُنَتْ خِيْرْمَنْ لَكْثِيرِينْ فَي الَدِينْ لْيَهُوْدِي فْي الْجِيلْ نْتَاعِي، وْكِيْفَاشْ كُنَتْ نْغِيرْعْلَى الَتَّقَالِيدْ الَلِّي خَلَاوْهُمْ جْدُودْنَا.
15
بْصَّحْ الله الَلِّي خَيَرْنِي وْأَنَا مَازَلْتْ مَاتَوْلَدْتْشْ، وْدْعَانِي بَالَنِّعْمَةْ نْتَاعَه.
16
بَاشْ يْتَعْلَنْ وَلْدَهْ فِي حْيَاتِي وَنْخَبَرْ بِيهْ بِينْ لَجْنَاسْ، وْمَانْقَارَعْشْ بَاشْ نْشَاوَرْ الَنَّاسْ
17
وْمَا طْلَعْتَشْ لْأُورُشَلِيمْ بَاشْ نْشُوفْ الَرُسُلْ الَلِّي قَبْلِي، بْصَّحْ رَوَحْتْ لَبْلاَدْ عْرَبْ، وْمَنْهَا وَلِيتْ لْدِمَشْقْ.
18
وْكِي فَاتُو ثْلَاثْ سْنِينْ طْلَعْتْ لْأُورُشَلِيمْ بَاشْ نَتْعَرَّفْ عْلَى بُطْرُسْ، وْڤْعَدْتْ عَنْدَهْ خَمْسْطَاشْ نْيُوْمْ.
19
بْصَّحْ مَاشَفْتْشْ الرُسُلْ لَخْرِيْنْ مَنْ غِيرْ يَعْقُوبْ خُوْ لْمَسِيحْوْ
20
هَادْ الَشِّي لِرَّانِي نْكَتْبَهْ لْكُمْ رَّبِي رَّاهْ شَاهَدْ بَلِّي مَا نَكْذَبْ فِيهْ.
21
وْمَنْبَعْدْ دَاكْ الَشِّي جِيتْ لَجْوَايَهْ سُورِيَة وْكِيلِيكْيَة.
22
وْبْصَّحْ الْكَنَائِسْ نْتَاعْ الْمَسِيحْ الَلِّي كَانُو فِي جْوَايَهْ الْيَهُودِيَةْ مَايْعَرْفُوشْ وَجْهِي.
23
وْكَانْ غِيرْ سْمْعُوا: «بَلِّي الَلِّي كَانْ يْقَهَرْ فِيْهُمْ مَنْ قْبَلْ، وَلَى يْخَبَرْ بْالْإِيمَانْ الَلِّي فَالْمَسِيحْ».
24
وْكَانُوا يْحَمْدُوا الله عْلِيَّا.