الفصل 1
1
بُولُسْ، رَسُولْ يَسُوعْ الْمَسِيحْ بْمَشِيئَة الله، و تِيمُوثَاوْسْ الأَخْ،
2
لَلْقِدِّيسِينْ فِي كُولُوسِّي، والْخُوتْ الْمُومْنِينْ فَالْمَسِيحْ: نِعْمَة لِيكُمْ وْسَلاَمْ مَنْ الله بُونَا وَالْرَّبْ يَسُوعْ الْمَسِيحْ
3
نَشْكَرُوا الله أَبُونَا وَرَبْنَّا يَسُوعْ الْمَسِيحْ كُلْ وَقْتْ، فِي صْلاَتْنَا مَنْ أَجْلْكُمْ،
4
سْمَعْنَا بَالْإِيمَانْ تَاعْكُمْ بَالْمَسِيحْ يَسُوعْ، وَمْحَبَّتْكُمْ لْڤَاعْ الْقِدِيسِّينْ،
5
عْلَى جَالْ الْرَّجَاءْ الَلِّي رَاهْ يَسْتَنَاكُمْ فَالْسْمَا، الَلِّي سْمَعْتُوا بِهْ مَا قْبْلْ فْكَلَمَة الْحَقْ الَلِّي فَالْإِنْجِيلْ،
6
الَلِّي وَصْلَتْ لْكُمْ كِمَا رَاهِي تَوْصَلْ لْڤَاعْ الْعَالَمْ تَانِي، وْرَاهِي تْمَّدْ الْثَمْرَة كِمَا رَاهِي تْبَانْ فِيكُمْ نْتُمَ تَانِي مَنْ يُومْ سْمَعْتُوا بنِعْمَه الله وَعْرَفْتُوهَا بَالْحَقْ.
7
كِمَا تْعَلَمْتُوا تَانِي مَنْ عَنْدْ أَبَفْرَاسْ الْعَبْدْ الْحَبِيبْ مْعَنَا، الَلِّي هُوَ خَادَمْ أَمِينْ لَلْمَسِيحْ عْلَى جَالْكُمْ،
8
الَلِّي خَبَرْنَا تَانِي بْمَحَبَّتْكُمْ فَالْرُّوحْ.
9
عْلَى جَالْ هَادْ الْشِّي حْنَا تَانِي مَنْهَارْ سْمَعْنَا، رَانَا نْصَلُوا وَنَطَالْبُوا مَنْ أَجْلْكُمْ بَاشْ تَكَبْرُوا فَالمَعْرِفَة مَشِيئَة الله، فْكُلْ حِكْمَة وْفَهْمْ رُوحِي،
10
بَاشْ تَتْمَشُوا كِمَا لاَزَمْ بالْرَّبْ، وْفالَرْضَى فِي كُلْ شِي، مُثْمِرِينْ فْكُلْ عَمَلْ صَالَحْ، وْتَكَبْرُوا فْمَعْرِفَة الله،
11
وْتَتْقَوَاوْ بْكُلْ قُوَّة عْلَى حْسَابْ قُوَّة الْمَجْدْ تَاعَهْ، بَاشْ تَقَدْرُوا تَتْحَمْلُوا وْ تَصَبْرُوا بَالْفَرْحْ،
12
شَاكْرِينْ الأَبْ الَلِّي أَهَّلْنَا لْشَرْكَة وْرثْ الْقِدِّيسِينْ فَالْنُّورْ،
13
الَلِّي سَلَكْنَا مَنْ سُلْطَانْ الْظَّلْمَة، وَدَانَا لْمَلَكُوتْ إِبَنْ الْمَحَبَّة تَاعَهْ،
14
الَلِّي عَنْدْنَا فِيهْ الْفِيدَاءْ، بْدَمَّهْ تَغَفْرَتْ ذْنُوبْنَا.
15
الَلِّي هُوَ صُورَة الله لِمَتْنَجَمَشْ تْشُوفَهْ، وْ الَلَّوَلْ فِي كُلْ الْخلِيقَة.
16
فِيهْ تَخْلَقْ كُلْ شِي: الَلِّي فَالْسْمَا وَ الَلِّي فَالْلَرْضْ، الَلِّي يْبَانْ وَ الَلِّي مَا يْبَانْشْ، كَانْ عُرُوشًا وَلاَ مَالسِيَادَاتْ وَلاَ مَالْرِيَاسَاتْ وَلاَ مَالْسْلاَطَينْ. الْكُلْ بِهْ وْلِهْ تَخْلَقْ.
17
هُوَ كَانْ قْبَلْ كُلْ شِي، وفِيهْ يْدُومْ كُلْ شِي،
18
وْهُوَ رَاسْ الْجَسَدْ: الْكَنِيسَة. هُوَالْبَدْيَة ، وَالَلَّوَلْ الَلِّي قَامْ مَالْمُوتْ، بَاشْ يْكُونْ هُوَ الَلَّوَلْ فِي كُلْ شِي.
19
عْلَى خَاطَرْالله بْغَى بَاشْ ڤَاعْ الْمَلاَءْ يَسْكَنْ فِيهْ ،
20
وَيْصَالَحْ بِهْ الْكُلْ مْعَ نَفْسَهْ، دَارْ الَصُّلْحْ بْدَمْهْ عْلَى الَصَلِيبْ، بِيهْ يْصَالَحْ كُلْ شِي عْلَى الْلَرْضْ، وَفَالْسْمَا.
21
وَنْتُمَ الَلِّي كُونْتُوا قْبْلْ بْعَادْ عْلَى الله وْعَدْيَانَهْ فَالتَّخْمَامْ تَاعْكُمْ ، وْأَعْمَالْكُمْ الَلِّي فِيهَا الَشَّرْ، رَاهْ تْصَالَحْ مْعَكُمْ دُورْكْ .
22
بَالْمُوتْ تَاعْ وَلْدَهْ ، بَاشْ يْوَجْدْكُمْ قِدِّيسِينْ وَبْلاَعِيبْ ڤُدَامَهْ،
23
إِلاَ ثْبَتُوا فَالْإِيمَانْ، وْرَسَخْتُو فِيهْ وْمَا تَتْبَدْلُوشْ عْلَى رَجَاءْ الْإِنْجِيلْ الَلِّي سْمَعْتُوهْ، بَشْرُوا بِهْ لْڤَاعْ الْخَلِيقَة الَلِّي تَحْتْ الَسْمَا، الَلِّي وَلِيتْ أَنَا بُولُسْ خَادَمْ لِهْ.
24
وْرَانِي دُورْكْ فَرْحَانْ فَالْأَلَمْ تَاعِي عْلَى جَالْكُمْ، نْكَمَلْ فَالْجَسَدْ تَاعِي الَشِّي الَنَّاقَصْ مَالْضِيقَاتْ الْمَسِيحْ عْلَى جَالْ الْجَسَدْ تَاعَهْ الَلِّي هُوَ الْكَنِيسَة،
25
الَلِّي وَلِيتْ أَنَا خَادَمْ لِهَا، عْلَى حْسَابْ تَدْبِيرْ الله الَلِّي نَعْطَى لِي عْلَى جَالْكُمْ بَاشْ نْكَمَّلْ كَلِمَة الله.
26
الَسَّرْ لَمْخَبِي مَالَزْمَانْ وْمَنْ جِيلْ بْعِيدْ، بَصَّحْ دُورْكْ رَاهْ بَيْنَاهْ لَلْقِدِّيسِينْ تَاعَهْ،
27
الَلِّي بْغَى الله يْعَرَّفْهُمْ شْحَالْ غَالِي الْمَجْدْ تَاعْ هَادْ الَسَّرْ فَالْأُمَمْ، هُوَ الْمَسِيحْ فِيكُمْ رَجَاء الْمَجْدْ.
28
هَادْ الْسَّرْ رَانَا نْبَّشْرُوا بِهْ كُلْ إِنْسَانْ، وْنْعَلْمُوا كُلْ إِنْسَانْ، بْكُلْ حِكْمَة، بَاشْ نْوَجْدُوا كُلْ إِنْسَانْ كَامَلْ فَالْمَسِيحْ يَسُوعْ.
29
الَشِّي الَلِّي رَانِي عْلَى جَالَهْ نَتْعَبْ وَنْجَاهَدْ، بْالْقُدْرَة تَاعَهْ الَلِّي رَاهِي تَخْدَمْ فِيَا بَالقُّوَة.