الإصحاح 1
1
مِنْ بُولُسْ رَسُولْ يَسُوعْ اَلْمَسِيحْ بِمَشِيئَةْ اَلرَبْ، وُمَنْ سُوسْتَانِيسْ خُونَا فَي الْإِيمَانْ،
2
لِكَنِيسَةْ اَللهْ فِي كُورَنْتُوسْ، لْهَاذُوكْ لِقَدَسْهُمْ اَللهْ فَي الْمَسِيحْ يَسُوعْ وَاخْتَارْهُمْ مَنْ كُلْ مَوْضِعْ بَاشْ يْكُونْ مْقَدْسِينْ مْعَ ڤَاعْ هَاذُوكْ اَلْلِي يْعَبْدُو اِسْمْ رَبْنَا يَسُوعْ الْمَسِيحْ اَلْلِي هُوَ تَاعْهُمْ وُتَعْنَا
3
نِعْمَةْ مَنْ اَللهْ بُونَا وُمَنْ اَلرَبْ يَسُوعْ الْمَسِيحْ لِيكُمْ
4
نَشْكُرْ اَللهْ مَنْ جِهَتْكُمْ فْكُلْ وَقْتْ عْلَى اَلنِعْمَةْ نْتَاعَهْ اَلْلِي عْطَاكُمْ فَي الْمَسِيحْ يَسُوعْ
5
اَلِي بِيهْ وَلِيتُوا مْرَفْهِينْ فْي كُلْ شِيء، فْالَكْلاَمْ وُفَالْمَعْرِفَةْ،
6
كِمَا ثَبْتَتْ فِيكُمْ شْهَادَةْ اَلْمَسِيحْ
7
وُهَكَا مَا رَاهْ مَا نَاقَصْكُمْ حَتَى مَوْهِبَةْ رُوحِيَةْ وَنْتُمْ تْقَارْعُو الْمَجِيءْ تَاعْ رَبْنَا يَسُوعْ الْمَسِيحْ
8
اَلْلِي غَادِي يْخَلِيكُمْ ثَابْتِينْ حَتَى لَخَرْ بَاشْ تْكُونُو بْلاَ عِيبْ نْهَارْ الْمَجِيءْ تَاعَهْ
9
وُاللهْ أَمِينْ اَلِي عَيَطْ لِيكُمْ بَاشْ تْكُونُو فَالشَرِكَة مْعَ وَلْدَهْ يَسُوعْ الْمَسِيحْ رَبْنَا.
10
وُرَانِي خَاوْتِي نَطْلَبْ مَنْكُمْ فْاِسْمْ رَبْنَا يَسُوعْ الْمَسِيحْ، بَاشْ تْكُونُو كُلْكُمْ مَتْفَاهْمِينْ عْلَى كَلْمَةْ وَحْدَةْ. وُمَا تْخَلُوشْ الْمَشَاكَلْ تْفَرَقْكُمْ، وُ بَصَحْ تْكُونُو مَتَحْدِينْ بْفِكْرْ وَاحَدْ وُرَايْ وَاحَدْ.
11
جَانِي خْبَارْكُمْ خُوتِي مَنْ اَلنَاسْ تَاعْ خُلُوِي بَلِي كَايْنِينْ مَشَاكَلْ بِينَاتْكُمْ.
12
وُعْلَى خَاطَرْ كُلْ وَاحَدْ مَنْكُمْ إِڤُولْ أَنَا تَاعْ بُولُسْ، وُلاَخَرْ أَنَا تَاعْ أَبُولُوسْ، وُلاَخَرْ أَنَا تَاعْ صَفَا، وُلاَخَرْ أَنَا تَاعْ الْمَسِيحْ.
13
وَاشْ الْمَسِيحْ لِتَصْلَبْ عْلَى جَالْكُمْ؟ وَلاَ بَاسْمْ بُولُسْ تْعَمَدْتُو؟
14
أَنَا نَشْكَرْ رَبِي مَا عَمَدْتْ حَتَى وَاحَدْ مَنْكُمْ مَنْ غِيرْ كِرِيسْبُسَ وُغَايُوسْ
15
بَاشْ حَتَى وَاحَدْ مَنْكُمْ مَا يَقْدَرْ يْقُولْ بَلِي رَاكُمْ تْغَطَسْتُوا بَسْمِي.
16
وُعَمَدْتْ عَايْلَةْ اِسْتِفَانُوسْ. وُمَنْ غِيرْهُمْ مَا غْطَسْتْ حَتَى وَاحَدْ اَخَرْ.
17
لِأَنُو عْلَى خَاطَرْ الْمَسِيحْ مَارْسَلْنِيشْ بَاشْ نَغْطَسْ، بَصَحْ بَاشْ نْخَبَرْ بَخْبَرْ الْخِيرْ، بْلَمَا نَتْكَلْ عْلَى كْلاَمْ الْحِكْمَة تَاعْ بْنَادَمْ بَاشْ مَايْكُونْشْ صَلِيبْ الْمَسِيحْ بْلاَ فَاْيَدْة.
18
اَلْبِشَارَةْ بْمُوتْ تَاعْ الْمَسِيحْ عَنْدْ اَلنَاسْ اَلْلِي مَاشِي مُوْمِنِينْ جَاهْلِينْ، وُعَنْدْنَا حْنَا اَلْلِي تَسْلَكْنَا رَاهْ هِيَ قُوَةْ اَللهْ.
19
مَكْتُوبْ فَكْتَابْ اَللهْ "غَادِي نَمْحِي الْحِكْمَة تَاعْ الْحُكَمَاءْ وُمَا نَقْبَلْشْ لَفْهَامَةْ تَاعْ الْفُهَمَاءْ".
20
وِينْ هُوَ الْحَكِيمْ؟ وُوِينْ هُوَ الْعَالَمْ؟ وُوِينْ هُوَ الْفَيْلَسُوفْ تَاعْ هَاذَا اَلزْمَانْ؟ وَاشْ مَا رَدَشْ اَللهْ اَلْحِكْمَةْ تَاعْ هَادْ اَلدَنْيَا جْهَالَةْ؟
21
نَاسْ اَلدَنْيَا مَا قَدْرُوشْ يْعَرْفُو الْحِكْمَةْ تَاعْ اَللهْ بَالْحِكْمَةْ تَاعْهُمْ ،وُهَكَا بْغَا اَللهْ يَسْلَكْ اَلنَاسْ لِيَامْنُوا بِهْ بَالْبِشَارَةْ اَلْلِي يْحَسْبُوهْ اَلنَاسْ جْهَالَةْ.
22
عْلَى هَادَشِي لِيهُودْ بْغَاوْ الْمُعْجِزَاتْ وُ الْيُونَانِيِينْ يْحَوْسُو عْلَى الْحِكْمَة
23
وُبَصَحْ حْنَا نْبَخْبْرُو بَالْمَسِيحْ اَلْلِي تَصْلَبْ اَلْلِي هُوَ عَثْرَةْ لَلْيَهُودْ وُجْهَالَةْ لَلْيُونَانَيِينْ
24
وُاَلْلِي اَخْتَارْهُمْ اَللهْ كَانُوا يْهُودْ وَ لاَ يُوَنَانِيِينْ رَاهْ الْمَسِيحْ هُوَ قُوَةْ اَللهْ وُ الْحِكْمَةْ تَاعَهْ
25
عْلَى خَاطَرْ جْهَالَةْ اَللهْ رَاهْ حِكْمَةْ كْثَرْ مَنْ حِكْمَةْ اَلنَاسْ ، وُالضِعْفْ نْتَاعَهْ رَاهْ قُوَةْ مَنْ قُوَةْ تَاعْ اَلنَاسْ
26
نْتُمْ يَا الْإِخْوَةْ اَلْلِي عَيَطْ لْكُمْ اَللهْ، بْلَي مَا فِيكُمْشْ بَزَافْ تَاعْ الْحُكَمَاءْ عْلَى حْسَابْ الْحِكْمَةْ تَاعْ بْنَادَمْ، وَلاَ فِيكُمْ نَاسْ قْوَيِينْ وَلاَ شُرَفَاءْ.
27
وَلَكِنْ اَللهْ خْتَارْ اَلنَاسْ لِيْحَسْبُوهُمْ لَخْرِينْ جْهَالْ بَاهْ يَحْشَمْ الْحُكَمَاءْ، وُاخْتَارْ اَلضْعَافْ بَاهْ يَحْشَمْ الَقْوَيِينْ
28
وُاخْتَارْ اَللهْ اَلضُعَفَا وُالْمَحْقُورِينْ وُاَلْلِي مَا عَنْدْهُومْشْ قِيمَةْ فَي الدَنْيَا ، بَاشْ يَمْحِي اَلنَاسْ لِيْحَسْبُوهُمْ لَخْرِينْ عَنْدْهُمْ قِيمَةْ
29
وُهَكَا حَتَى وَاحَدْ مَا يَقْدَرْ يَفْتَخَرْ قُدَامْ اَللهْ .
30
بَصَحْ نْتُمَا وَلِيتُو فَالْمَسِيحْ يَسُوعْ لِي هُوَ حِكْمَةْ مَنْ اَللهْ وُالتَقْوَى وُالْقَدَاسَةْ وَالْفِدَاءْ
31
وُكِيمَا يْقُولْ فَكْتَابْ اَللهْ " اَلْلِي بْغَا يَفْتَخَرْ، يَفْتَخَرْ بَالرَبْ"