¹ Pablu, ti ni daguyoo xti Cristu Jesús ne Timoteu bichinu, ni cucaadu para Filemon bichidu ni nadxiidu, ni runine laadu dxiiña ² ne para Apia bizanadu, ne Arquipo ni ridxelazaa ne laadu lu neza di', ne para yu'du' ni napalu ralidxu. ³ Guenda nachahui chu' ne laatu ne guendaratadxi xti Diuxi bixozenú, ne Xpiaxua'nanu Jesucristu. ⁴ Naa guira dxi cudiee xquixe Diuxi xtine'. Naa rinaba pur lii ora guinie nia Diuxi. ⁵ Naa ma binadiaga de guenda runi cre ne guendaranaxii ni napalu pur Xpixuananu Jesús ne de guira ca ni ma runi cre. ⁶ Naa rinie nia Diuxi para que ni lii canayunilu lu guenda runi cre di ganda guiquiiñeni para gana restu de guira ca dxiina sicaru ni nuu ladenu en Cristu. ⁷ Naa ma bieche xtale , ne ma gutadxi ladxidua pur xquendaranaxiilu', purti ladxido' ca ni ma runi cre ma bigaanda ca pur lii, biche'. ⁸ Pur nga runi, necape naca' ti xaique en Cristu para guseenda gunilu ni nexe gunilu, ⁹ neca sacá pur guendaranaxii, lu xcar gna lá, na canaba pia ni lii, naa Pablu, ti hermanu gola, ne yanna ti ni daguyoo pur sinanda Cristu Jesús. ¹⁰ Canaba lii pur xiiñe Onésimo, ni naa gupa ra daguayuaa. ¹¹ Purti jma atra nin ti ladu que niquiiñebe para lii, peru yanna la ma zaquiiñebe casi ca para lii saqueca para naa. ¹² Naa cuseenda laabe, nacabe ladxidua' pia', guibiguetabe ranu'lu'. ¹³ Ñacaladxe ñanania laabe, ti ma laabe ñacanebe naa lu xcar lu', bia dxi naa idaguayuaa pur enda runi xneza xti Evangeliu. ¹⁴ Peru que nina'ya ñune xiixa ni lii que ña'bu naa. Bine ndi ti zaca nin ti dxiiña sicarú ñacani purtisi naa bicaa lii gunilu ni, gacani purti racalaadxilu gúnilu ni. ¹⁵ Ne guni ndi nga runi laabe bixalebe de lii caadxi si, gucani para gapu laabe bia dxi nabanibé. ¹⁶ Ma cadi casi tobi ni runi dxiiña sin guiaxa, sinu jma que ni runi dxiiña sin guiaxa, casi ti bichinu ni nadxiinu, para naa pía, ne jma ru para lii, guiropanu casi ca binni guidxilayu ne casi ca ni runi cre xpixuaana ¹⁷ Pa rusa'cu naa casi ti ni runinelu dxiiña, gucuaa laabe casi ca nicaalu naa. ¹⁸ Peru pa pur xiixa laabe binibe lii ni nadxaba, o pa nuzaabibe lii xiixa, bicaa naa nuzaabe ní. ¹⁹ Naa Pablu, cucaa ra nuu lu ne naya pia: Naa saguixe ní. Cadi cayabe dia' nusaabilu naa xquendanabani lu'. ²⁰ Ya, biche', bidii lugar gápa guendanayeche' lu Xpixuananu de lii; bisiganda ladxidua en Cristu. ²¹ Nanadxiiche rusuubalu diidxa, cucaa ra nuu lu. Naa nana sunilu jma que bia' canabalii. ²² Ne laaca racaca, bizuchaaui ti ra guiaana, purti nana sedanda dxi deque pur rinabalu Diuxi naa sabigueta ra nuu lu'. ²³ Epafras, ni daguyoo ne naa en Cristu Jesús, cuseenda diuxi xtiu; ²⁴ zaqueca cayuni Marcos, Aristarco, Demas, Lucas ne ca ni cayunine naa dxiiña. ²⁵ Xquendanachaui Xpixuaana nu Jesucristu gáca' ne xquenda lu'. zaca gaca ní.