¹ Ora que Jesús guni' nebe guira binni ni nuu raque ne ca discipulu xtibe. ² Laabe guní be: "Ca escriba ne ca Fariseu,ribí ca lu xpangu Moisés. ³ Nga runi intica si ni guseenda cabe gúnitu, la gúni ca ní ne laguuyadxi ca ní. Peru cadi gunitu casi ca runi cabe, purti laacabe rini' cabe didxa,peru que runi cabe ca ní. ⁴ Yá, laacabe rugua' cabe ni nanaa ni iza' nagana guá tobi, ne ora que laacabe rudxiibacabe ni xique binni. Peru laape cabe que suniibicabe nin ti bicuini ná cabe para gua cabe ni. ⁵ Ira ni runi cabe, runi cabe ni ti ma guuya binni laacabe. Purti laacabe rusi rooba cabe ra ridxa cadxi gui'chi' ndaani, ni ricá lucua cabe qué, ne laacabe rusi zoo acabe ca ñudu ni riliibi ñee ca ni racucabe qué. ⁶ Laacabe nadxiicabe cui cabe ra jma sicarú ruaa mexa' ra nu ira tipu endaro qué, ne cui cabe lu ca bangu ra jma sicarú ndaani ca sinagoga, ⁷ ne nabé sicarú ugapadiuxi binni laacabe ndaani ca lugiaa, ne iree lá cabe 'Rabí' pur ca binni. ⁸ Peru laatu que iree lá tu 'Rabí', purti tobi si nga maistru xti tu, ne irátu bi'chitu. ⁹ Ne que cuee lá tu binni ni nuu ndaani guidxilayu bixhoze tu, purti laatu ti Bixhoze si tu napa tu, ne LAABE nuu be iba'. ¹⁰ Nin ca que sanda guiree lá tu 'maistru', yaque xa laatu ti maistru si nga napa tu, laa nga Cristu. ¹¹ Peru ni laa jma risáca de lade tu, saca ni gúsuuba xtiidxa tu. ¹² Ne tutiica gudxiiba laca laa Diuxi susi tui lú. Ne tutiica ni guindete laca laa Diuxi súni laa tobi ni jma risaca. ¹³ ¡Pa bia naná saca para laatu, escriba ne Fariseu ca',binni ni riguite si bínni! Laatu que rudii tu gunibia' binni de lú xquenda runi mandar Diuxi, purti nin laatu cadi cayuu tu, ne nin ca que cudii tu ca ni ma yaca chu', guni ni. ¹⁴ ¡Pa bia naná saca para laatu, escriba ne Fariseu ca', binni ni riguite si bínni! Laatu raxa tu xti ca gunaa ni ma guti xheela. ¹⁵ ¡Pa bia naná saca para laatu escriba ne Fariseu ca', binni ni riguite si bínni! Purti laa tu ca ni rie tu pur nisado' ne pur neza yú para gúni tu que tobi za nanda ca ni rini' tu, ne ora laabe ma rinandabe ni na tu, laatu runi tu laabe chupa ca tiru xiiñi gabiá casi ca laatu. ¹⁶ La gapa ga laatu, laatu ni rabi tu xtobi ladu za' ne lape tu nacheepa lú tu', laatu ni rini' tu: 'Tutica ni quixe xtiidxa pur yu'du', gaxti náca, peru tutiica ni quixe xtiidxa pur tobi ni nuu ndaani yu'du' qué, naquiiñe guni casi ca gudixe xtiidxa'. ¹⁷ Laatu binni huati ni nacheepa lú, ¿Xinga ni jma risaca, guiiba ni risaaca la, o yu'du' ni ma bisigaade guiiba ni risaca Diuxi? ¹⁸ Ne, ' Tutiica ni quixe xtiidxa pur ra rusuxibi cabe ndaani yu'du', gaxti naca. Peru tutiica ni quixe xtiidxa pur ofrenda ni laa rusába, laabe naquiiñe gunibe casi ca gudixe xtiidxa. Laatu binni ni nacheepa lú, ¹⁹ ¿Xi jma naroba, ofrenda la, o ra rusuxibi cabe ndani yu'du' ra rine cabe ofrenda ni rudii cabe Diuxi la? ²⁰ Nuni ni laa quixe xtiidxa pur ra rusuxibi cabe ndaani yu'du' qué, riguixe xtiidxa lú ira ni rine xcaadxi lú ni'. ²¹ Ne ni laa quixe xtiidxa pur yu'du' la, pur laasibe riquixebe xtiidxa be ne pur Diuxi ni nabáni ndaani ní. ²² Ne ni laa quixe xtiidxa pur iba', riguixe xtiidxa pur xpangu ndxo' Diuxi, ne pur ni LAA ribí lu ní. ²³ ¡Xi gaca xa de laatu, escriba ne Fariseu ca', binni ni riguite si binni! Purti laatu runi diezmar tu menta, eneldo ne comino, peru laatu ma bisaana tu de gúnitu ca diidxa ni ca lu ley ni jma naquiiñe gaca'--ni biaasi, guenda ria' ne guenda runi cre. Peru ca ndi nga ni naquiiñe ñuni lu, sin nusaana lu de ñuni lu ca xcaadxi ca. ²⁴ ¡Laatu ni rului tu tobi ladu za' ne laapetu nacheepa lu tu, ribee tu biuxi lu endaro peru rabitu ti camellu! ²⁵ ¡Pa bia naná saca para laatu, escriba ne Fariseu ca', binni ni riguite si binni! Purti laatu pur fuera si rusia tu xíga ne bladu', peru pur dentru dxa tu de enda riguiite binni ne icaatu jma que bia' napa tu. ²⁶ Laatu Fariseu lu cheepa ca', lagusia niiru ndaani xíga ne bladu', ti ma zaca laca gia ni nuu pur fuera. ²⁷ ¡Pa bia naná saca para laatu escriba ne Fariseu ca', binni ni riguiite si binni! Purti laatu nacatu casi ba' ni bidiee de naqui'chi', pur fuera rihuini sicarú, peru ndaani dxa de dxita gue'tu' ne guira ni nayuudxu. ²⁸ Ne casi ca sacá, sacaca laatu pur fuera rului nachahui tu neza lú ca hombre, peru dxa tu de guenda rusi guii ne de ni cadi xneza. ²⁹ ¡Pa bia naná saca para laatu escriba ne Fariseu ca', binni ni riguite si binni! Purti laatu rusa' tu ca ba' xti ca profeta ne rusuchahui tu ca ba' xti ca ni nachahui. ³⁰ Laatu ná tu: 'Pa ñaca nibanidu dxi bibani ca bixhozedu, laadu que nudi' ná du laacabe ora bixii cabe ríni xti ca profeta'. ³¹ Ne nga runi, laatu rini tu laca lade tu deque naca tu xiiñi ca ni biiti ca profeta. ³² Ngaca laatu rugaanda xtonda ni nusaabi ca bixhoze tu. ³³ Laatu beenda ca',ca ni za de ca beenda, ¿xi modo sanda guxooñe tu de guenda naná xti gabia pue? ³⁴ Nga runi, la guuya, naa cuseenda ra nuutu ca Profeta, hombre nuu xpiaani, ne ni rucaa lu xqui'chi Diuxi. Caadxi de laaca be suutitu laaca ne sucaa tu laacabe lu cruz. Ne xcaadxi suguu tu cuarta laaca ndaani sinagoga xti tu ne zaza nandatu laaca de guidxi en guidxi. ³⁵ Ne guni ndi' lugia tu seeda guiaba ira ríni xti ca ni nachahui ni bixii layu, dede ríni xti Abel ni nachahui ne dede rini xti Zacarías xiiñi Berequías, ni laatu biiti tu neza nuu santuariu ne altar. ³⁶ Dxandi pe cayabe laatu, que guira ndi saca ni lugia ca ni nabani yanna. ³⁷ ¡Jerusalén, Jerusalén, laatu ni ruuti tu ca profeta, ne rucha tu guie ca binni ni ruseenda cabe ra nuu tu! ¡Panda tiru gucaladxe nuchiña ca xiiñi lu' casi ca bere ruchiña ca xpere huiini za xiaa, peru lii que niná lu'! ³⁸ Biiya, ra liidxu siaana xtúbi para laatu. ³⁹ Pur ni naa cayabe laatu, laatu ma que suuya ru tu naa dede yana ne lu ca dxi seeda, dede dxi laatu guiní' tu: 'Nuu ndaaya ni seeda lu lá xti Xpixuaana.'