¹ Ne ca dxi qué, ca discípulu beedaca ra nuu Jesús ne naa ca': "¿Tu nga ni jma risáca de ndaani ra runi mandar Diuxi pue?" ² Jesús bicaaridxi ti xcuidi para gueeda ra nuube ne bisuhuaa laabe láde ca', ³ ne guni' bé: "Dxandi pe' cayabe laatu, pa que gueda gaca arrepentirtu', ne gacatu' casi ca cá xcuidi huiini, de nin ti modo que ziuu tu' ra runi mandar Diuxi. ⁴ Ne sacá tutiica ni guindéte laa casi xcuiidi huiini di', ndi' nga ni jma risáca ndaani ra runi mandar Diuxi. ⁵ Ne tutiica ni ricaa ti xcuidi huiini casi ndi' pur láya', naa nga cacaabe. ⁶ Peru tutica ni guni laa tobi de ca ni nahuiini ni ma runi cre NAA guchee lá, jma galan ñaca para laabe niliibi ti guié xti molinu yanni be ne nilabe ra jma guete nisado'. ⁷ ¡Naná záca para lii binni guidxilayu pur ca dxi ni guedandáru ni guni que lii gucheelu! purti naquiiñe que ca dxii ca gueedandá ca'; peru, ¡naná záca para biini, ni guni laa guedandá ca dxi qué! ⁸ Pa nálu' o ñeelu' guni que lii guiábu, bigá ni' ne bisa'bini zitu de lii. Jma galan para lii chu'lu' lu guendanabani cayaadxa ti chu nálu' o ti chu ñeelu', que ilá lu' lu bele ni que riu' dxi guisui' ne gapu' guiropa chu nálu ne guiropa chu ñeelu'. ⁹ Pa guie lú lu' guni que lii guiábu, guxa ni' ne bisa'bini zitu de lii. Jma galan para lii chu'lu lu guendanabani ne ti chu guie lú lu', que guila lu' lu bele ni que riu dxi guisui' ne guiropa guie lú lu'. ¹⁰ La guuya que nin tobi gicaa casi ni que risáca ca ni nahuiini di'. Purti naa sabe laatu deque iba', Ca angel xtibe ira dxi ruuya ca lú bixhoze' ni laa nuu iba'. ¹¹ Purti xiiñi Hombre beeda para gulá ni ma biniti. ¹² ¿Xi rini' xpiaani lu? Pa tutica binni napa ti gayuaa dendxu', ne tobi de laacamé guiníti, ¿que susaanabe tappa late gandé chii ne ga' dendxu qué ndaani currá ne siyúbi be dendxu ni biníti que la? ¹³ Ne pa idxélabe laame, dxandi pe' cayabe laatu siechebe jma pur ndi, que pur tappa late gandé chii ne ga' ni que niníti qué. ¹⁴ Ne laca sacaca, cadi zacá racaladxi Bixhozelu ni nuu iba' que tobi de ca ni nahuiini di' guiniti lú. ¹⁵ Pa bi'chilu guchee ne lii, guyé bilui' laabe ra bicheebe, lii ne laasibe xtúbitu. Pa gucaa diagabe lii, ma zaca bi'chitu xti tiru. ¹⁶ Peru pa que gucaa diagabe lii, yené tobi o chupa hermanu jma, ti ma sacá pur xtiidxa chuppa o chona ni ucaa diaga gihuini deque ni caní lu de bi'chilu dxandi ní. ¹⁷ Ne pa laabe que nábe gucaadiagabe laaca, gúdxi ni cayaca di' yu'du'. Ne pa que nábe gucaadiagabe yu'du' lá, ucuaa laabe casi tobi ni que runi cre, ne casi tobi ni ruquixe impuestu. ¹⁸ De dxandi cayabe laatu, de ira ni lii undiibu ndaani guidxilayu, saliibi ni iba', ne guira xixe ni lii guxágue lu' ndaani guidxilayu, zaxague ní iba'. ¹⁹ Ne jma ru cayabe laatu, pa chuppa de laatu chu' tóbisi para guinaba ca inticasi, záca ni pur Bixhoze' ni nuu iba'. ²⁰ Purti ra nuu chuppa o chona guidaagu ca' lu La'ya', racá nuaa Naa galahui de laaca." ²¹ Udidi si ngue, beeda Pedru ne gudxibe Jesús: "Xpixuaanadu, ¿Pánnda tiru bi'che' uchee né naa ne naa gusiaanda xquenda rucheebe pue? ¿Ñee gadxe si tiru la?" ²² Jesús gudxi laabe: "Naa cadi cayabe lii gadxé si tiru, laga de chindou' chonna late gande chii tiru gadxé." ²³ Nga runi, ra runi mandar Diuxi seda gaca casi ti ni runi mandar ni dxiiba laapa íque, ne nuube quixe ca ni runi xiiña be ni nuzaabica laabe. ²⁴ Ora ma bizulu chi uquíxe be, bedanecabe tobi ni runi xiiñabe, ni nuzaabi laabe chii bixiapa de bidxichi. ²⁵ Peru laabe que gápabe xi né quixe be ní, xpixuaanabe biseenda gúni idoo be ne xheela be ne ca xiiñibe ne ira xixe ni napa be, ne saqué guiaxa ní. ²⁶ Ora qué ni runi xiiña xpixuaana que, biábabe ne ulaqui lucua be neza lú xpixuaana be, ne gudxibe laa: 'Xpixuáana uleza naa xcaadxi si, ne naa saguíxe ira ni lii.' ²⁷ Ne xpixuaana be, gupa xilase, bindaa laabe ne bixá ni nusaabi be. ²⁸ Peru ni runi xiiña xpixuaana que uyé be ne bidxagalú be xtobi de ca ni runinebe dxiiña, ni nusaabi laabe ti gayuaa bidxichi, laabe biruuxabe laa, udiébe yanni' ne gudxibe laa: 'udixe naa ni nusaabilu naa.' ²⁹ Peru ni runinebe dxiiña qué biaba ne iza' canaba xañee be na": 'uleza naa xcaadxi si, ne naa saguixe ira xixe ni lii.' ³⁰ Peru niiru ni runi xiiña xpixuaana que' que niná nibéza,laga, uyébe ne bisa'bibe laa ndaani lidxi guiiba, de dxi laa quixe laabe ni nusaabi laabe. ³¹ Ora ca xcaadxi ni runinebe dxiiña bi'ya ca' ni uca di',ne nabé biguundu ladxido' ca'; beeda ca' ne gudxi ca' xpixuaana ca' ira ni gu'ca qué. ³² Ne ora que xpixuaana be bisenda caa laabe ne gudxibe laa: ' Ni runi dxiiña xtine, ni nadxaba, bixáya ira ni lii nuzaabilu naa purti nabe gunabalu ni naa. ³³ ¿Cadi niquiiñe ñapalu xilase de ni runi neu dxiiña ca', casi' naa gupa xilase de lii la?' ³⁴ Xpixuaanabe bidxiichí ne bidii laabe lu ná ca ni runiná binni dede dxi laabe ganda quixebe ira ni laabe nusaabibe qué. ³⁵ Sacaca Bixhoze' ni dxiiba iba' súni ne laatu, pa cadi ne ladxido' to uxia tu ni bichee né ca biichi'tu laatu.