¹ Raque beeda guirá' ca ni rutopa bidxichi ne ca ni ruchee ra nuu Jesús ti gucaadiagaca laabe. ² Ca fariseu ne ca escriba la? cani' lisaaca sicari': nguiiudi' la? ricaabe ca ni ruchee ne rónebe laaca. ³ Biui'neca Jesús laacabe ejempludi': ⁴ ¿tu tobi de laatu, pa ñapa ti gayuaa dendxu' ne malasi niniti tobi de laacame, que nusaana tapa lategande nuu chii ne ga' dendxu' xtica ne ñé niyubi ni binitica de ra nidxelabe laa? ⁵ Ra laabe ma bidxelabe laame la? zudxiibabe laame lu xiquebe ne ziechebe xtale. ⁶ Ra laabe chindabe ra lidxibe la? ribidxibe ca xhamigube ne ca xpecinube ne rabibe laaca: laguiechene naa, ti ma bidxela' xa dendxu' xtinne' ni binitique. ⁷ Ne naa cayabeca' laatu, jmá ziuu guendanayeche' guibá' ra ti ni ruchee guinaba' guixiá ca donda xti', que ora tapa lategande nuu chii ne ga' binni ni cadi caquiiñe' guixiá guendaruchee xtica'. ⁸ O, ¿tu gunaa napa chii moneda de plata, ra laa nusiniti tobi de laacani, ñee que nucaagui biaani', nunduuba' ndaani' yoo, ne nuyubichaahui' de ra laa nidxelani la? ⁹ Ne ra laa ma bidxelani la? rusendacaa guirá' ca xhamigu ne ca xpecinu, ne rabibe laaca: laguiechene naa, ti ma bidxela xa bueltu ni bisini'teque. ¹⁰ Zacaca nga rabe' laatu, riuu xtale guendanayeche' nezalú ca ángel xti' diuxi ora ti binni ruchee guinaba' guixiá donda xti'. ¹¹ Raqué biui'ne Jesús laacabe ca diidxadi': guyuu ti nguiiu' ni gupa chupa xiiñi', ¹² ne xiiñibe ni jmá nahuiinique la? beedanda ti dxi gudxi laabe: apa, racaladxe' gudiiu naa guiraxixe ni racacaber naa, gucuaacabe gundaabe guirá' ni napabeque ne gudiizibeni lu guiropa xiiñibeque. ¹³ Que nindaa de ngue , ni jmá nahuiinique bizulú bitopa guirá ca xti' ne biree ze' guidxi zitu, ne ra yendabe raqué la? bizulube gudxitebe ca xpueltube, guzi'be xtale xiixa ni cadi dxandi' caquiiñebe ne gudxitebe ca xpueltube lu ti guendanabani ni cadi xneza nuu. ¹⁴ Ra laabe ma bisirabe guiraxixe xpueltubeque la?, guiza' naro'ba' guendarindaana beedanda guidxique, ne bizulu biaadxa laabe ni caquiiñebe. ¹⁵ Guyebe yenababe dxiiña' ra nuu tobi de ca binni nabeza ndaani' guidxique, ne binnique biseenda' laabe ra ca layú xti' chigudiibe ni gó bihui. ¹⁶ Ne laabe ne xtale guendanayeche' ñóbe ca biidxi ni cayó ca bihuique ti guiruti' cudii ni góbe. ¹⁷ Ne ora laabe bigueta gutachaahui' xpiaanibe la? guni'be: panda nga tu cayuni xhiiña' bixhoze' ne napaca' xtale ni góca', ne naa nuaa' rari', cayatezie. ¹⁸ Zaree' de rari' ne ziaa' ra nuu bixhoxe', ne zabe' laa: apa, bicheenia' diuxi ne bichee' neza lulu'. ¹⁹ Naa que lica guiquiiñedia' gaca' xiiñilu', bi'ni naa sica tobi de ca ni cayuni xhiiñaluca'. ²⁰ Ne zaqué xa badunguiiu ni jmá nahuiinique bireebe zeedabe ne beedandabe ra nuu bixhozebe. Zituru' zeedabeque, mapeca biiya' bixhozebe laabe, gupa xilase de laabe ne bixooñe' gudiidxi laabe ne bidii ti bixidu' cue' xhagabe. ²¹ Gudxi xiiñibeque laabe: apá, bicheenia' diuxi ne bichee' neza lulu', que lica guiquiiñedia' para gaca' xiiñilu'. ²² Gudxi bixhozebeque ca ni runiné laa dxiiña'que sicari': nagueenda', latané lari ni jmá sicarú ne laguyacuni laabe, ne lacuu ti aniu' nabe ne lagucaa guelaguidi ñeebe. ²³ Raca latané yuzehuiini' ni jmá naro'ba' ne laguuti laame. ¡Laguieche ne laguni saa! ²⁴ Ti xiiñe' gue'tu' nga gucabe, ne yanna ma nabanibe. Laabe binitibe, yanna ma bidxelabe, ne bizulucabe bi'nicabe saa. ²⁵ Yanna dxa xiiñibe huaniisique guyé ra ñaa, ne laga zeeda ne zeedaguidxiña ra lidxi bixhozeque la? binadiagabe nuu saa ne cuyaacabe. ²⁶ Laabe bicaaridxibe tobi de ca badunguiiu runiné bixhozebeque dxiiña' ne gunabadiidxabe laa xi ngue cazaaca raque. ²⁷ Badunguiiuque bicabi laabe: Ma bigueta bi'chilu' ne bixho'zo' la? biiti yuzehuiini' ni jmá naro'ba' ti laabe biguetabe nazaaca. ²⁸ Xiiñibe huaniisique bidxiichi, ne qui ñuudi', para biree bixhozebe, ne cugá laabe guiuube. ²⁹ Huaxa laabe bicabibe bixhozebe ne gudxibe laa: biaa, ma xtale iza cayune' xhiiñalu', ne que ñuudi' dxi nucheenia' lii, xisi la? nin que lica huayuu dxi gudiiu naa neca ti dendxuhuiini' ñahuania' ca xhamigua', ³⁰ huaxa ra beeda xti xiiñu' ni yechite xpueltulu' ne ca gunaa rizá zacasi la? biitucou' yuze ni jmá naro'ba'ca ja'. ³¹ Bixhozebeque bicabi laabe: xiiñe', lii guirá' dxi nuunelu' naa, ne guiraxixe ni naa napa' xtilu' nga cani. ³² Huaxa xtalepe' nga biquiiñe' gunidu saa ne chuudu nayeche', ti bi'chilu' ma guetu' nga nacabe, ne yanna ma nabanibe, binitibe ne yanna ma bidxelabe.