¹ Yanna la? nabé ma nayooxho' Josué ra gudxi Diuxi laabe sicari': "guiza' ma nagolalu', xisi nuuru' xtale layú ni naquiiñe' guni xtinu. ² Ndi' nga ca layú ni riaanaru': guirá ra xti' ca filisteu ne ra xti' ca gesurita ³ (dede ra nuu Sihor, ni nuu neza rindani gubidxa xti' guidxi Egipto, ne neza guia' neza ra dxaaga guidxi Ecrón, ni nácabe xti' ca cananeu; ca gaayu' xa ique xti' guidxi Filistea: ca de Gaza, Asdod, Ascalón, Get ne Ecrón, ca layú xti' ca aveu). ⁴ Neza guete' la? nuuru' ca guidxi xti' ca cananeu, ne guidxi Mehara xti' ca Sidonio dede ra nuu guidxi Afec ne de ra ruzulu' ca layú xti' ca Amorreu; ⁵ layú xti' ca giblita, guidubi naca guidxi Líbano ne jmá cherica' neza ra rindani gubidxa, dede ra nuu guidxi Baal Gad xa'na' Dani Hermón de ra nuu guidxi Lebo Hamat. ⁶ Zaqueca, guirá ca binni nabeza lu ca dani xti' Líbano de ra nuu guidxi Misrefot Maim, ne zaqueca guirá' binni de guidxi Sidón. Zaladxe' laacabe neza lu ca xpinni rudxiilu' xti' Israel. Lagannadxiichi gudiitu Israel ca layúca, casi naa ma gudxe' laatu gunitu. ⁷ Laguindaa ca layúca ne lagudiini casi ni chiguiaana guicaa ca ga' tribuca ne xcalaa tribu xti' Manasés. ⁸ Ne xcaala tribu xti' Manasés ni biaana, ca rubenita, ca gadita la? laaca gucuaaca ca layú nuu nezara rindani gubidxa xti' guiigu' Jordán ni bisanane Moisés laaca, ⁹ dede Aroer ni nuu gaxha layú ro' xti' guiigu' Arnón (dede né guidxi nuu galaa batoo layú ro' que) dede ra nuu layú nasoo xti' Medeba ne bia' zitu nuu guidxi Dibón; ¹⁰ Guirá ca guidxi xti' Sehón xa ique ca amorreu, ni guca xa ique xti' guidxi Hesbón, de ra dxaaga layú xti'cabe ne xti' ca amonita; ¹¹ Galaad ne ca layú xti' ca gesurita ne ca maacateu, guidubi naca dani Hermón, guidubi naca Basán dede ra nuu Salca, ¹² guidubinaca guidxiro' xti' Og ni nuu Basán, ni guca xa ique ndaani' guidxi Astarot ne ndaani' guidxi Edrei (ca ndi' nga ni biaana xti' ca refaíta) bininá Moisés laacabe ne guladxi laacabe. ¹³ Xisi guidxi Israel que niladxidica' ca gesurita ne ca maacateu. Ni bizaaca nga guidxi Gesur ne Maaca ca la? nabeza ca xpinnicabe lade ca xpinni Israel dede yannadxi. ¹⁴ Ca xpinnisi Leví nga que nusaananedi' Moisés laaca ti ndaa layú guicaaca. Ca ni reedanecabe gusiga'decabe xa ique xtinu, diuxi xti' Israel ne ruza'quicabe nezalube ca nganga gudxi diuxi Moisés chicaacabe. ¹⁵ Moisés bisanané ca xpinni Rubén ti ndaa guicaaca', bia' tica naca ca binnilidxicabe. ¹⁶ Ca layú xti'cabe nacacani dede Aroer ni nuu ra riluxe ca layú nuu cue' guiigu' Arnón ne guidxi nuu galaa ca layú que gapa gaxti', ne guidubi naca xcaadxi layú que gapa gaxti' de ra nuu Medeba. ¹⁷ Rubén zaqueca gucuaa Hesbón, ne guirá ca guidxi ni nuu lu ca layú gaxti' gapa que: Dibón, Bamoot Baal ne Bet Baal Meón ¹⁸ ne Jahaza ne Cademot ne Mefaat ¹⁹ ne Quiriataim ne Sibma ne Zaret Sahar nuu ique dani xti' ca layú que gapa gaxti' que. ²⁰ Rubén zaqueca gucuaa Bet Peor, ca layú nuu guriá dani xti' Pisga, Bet Jesimot, ²¹ guirá ca guidxi nuu lu ca layú nasoo que, ne guidubinaca guidxiro' xti' Sehón, xa ique xti' ca amorreu ni guca xa ique ndaani' guidxi Hesbón, ni Moisés bidxelasaa ne gudiñe ne ca xcaadxi xa ique xti' Madián, Evi, Requem, Zur, Hur ne Reba, ca xiiñi' ca xa ique xti' Zeón, ni gulezaca' lu ca layú que. ²² Ca xpinni Israel la? zaqueca biiticabe ne gudxiu ziuula Balaam xiiñi' Beor, ni gupa guenda guuya' xi zeeda ne ni chiguizaaca, ne nuu nebe ca xcaadxi ni biiticabe qué. ²³ Ra riluxe ca layú xti' ca lizaa ni zá de Rubén nga ra nuu guiigu' Jordán, ra que nga rindacani. Ndi' ca layú biaana guicaa ca ni zeeda de Rubén, ni bidii cabe cada tobi de ca lizaa , ne ca guidxi ro' ne guidxi huiini' xti ca'. ²⁴ Ndi' nga ni bidii Moisés ca trbu xti Gad, guiraxixeca' ne ca binnilidxica'. ²⁵ Ca layú xti' cabe nga guca Jazer, guiraxixe ca guidxi nuu Galaad ne galaa guidubinaca layú xti' ca amonita de ra nuu Aroer ni nuu neza ra rindani gubidxa xti' Rabá, ²⁶ de ra nuu Hesbón ne de ra nuu Ramat Mizpa ne Betonim, de ra nuu Mahanaim ne de ra nuu ca layú xti' Debir. ²⁷ Lu layú pampa' que', Moisés bidii laacabe Bet Aram, Bet Nimra, Sucot ne Zafón, ne ca xcaadxini biaana de ca layú xti' Sehón, xa ique xti' Hesbón, guiigu' Jordán nga guca ra riluxe ca layú que, de ra xaguete' xti' nisado' xti' Cineret, cherica' guia' de ra nuu guiigu' Jordán. ²⁸ Ndi' layú biaana' guicaa tribu xti' Gad, guiraxixeca' ne ca binnilidxica' ne ca guidxiro' ne guidxihuiini' xtica'. ²⁹ Moisés la? laaca bisaanabe ni guicaa galaa tribu xti' Manasés. Bidiicabe ca xpinni galaa tribu Manasés que bia' nacaca' ne ca binnilidxica'. ³⁰ Layú xti'cabe gucani dede Mahanaim la? guidubinaca Basán, guidubinaca guidxiro' xti' Og xa ique xti' guidxi Basán, ne guirá' ca guidxi xti' Jair ni nuu Basán, bia'si chonna lategande guidxi, ³¹ galaa guidxi Galaad, Astarot ne Edrei (ca guidxidi' la? nuu cani ndaani' guidxiro' xti' Og ni nuu Basán). Ca ndi' nga bidiicabe Maquir xiiñi' Manasés ne ca binnilidxi xti' (galaa de ca xpinni Maquir, ni bidiicabe guiraxixe ca xpinnilidxi). ³² Ndi' nga ni bisaana Moisés guicaacabe ra nuu ca layú pampa xti' Moab, jmá cherica' de ra nuu guiigu' Jordán neza ra rindani gubidxa xti' guidxi Jericó. ³³ Moisés la? que nusaanadibe gaxti' guicaa Tribu xti' Leví. xa ique xtinu, diuxi xti' Israel nganga biaana guicaacabe, casi ca gudxibe laaca.