¹ Pablo, Silvano, ne Timoteo, ra iglesia xti ca Tesalonicenses de Diuxi ne Señor Jesuscristo. ² Ne guenda xti Diuxi guiana ne laatu ne guenda' ratadxi ladxido xti Diuxi bixhoxhe nu ne Señor Jesuscristo. ³ Naquiñe gudinu xquixhepe Diuxi gati'ga' pur laatu, bicheca. Ti naquiñe ni', purti quenda' runni cree xtibe sirobani xtale, ne guenda rana xhii xti cada tobi de laatu ruchina ni laatu ra nu xtobi. ⁴ Saca ladu' rinidu ne ruchardu guenda naroo xti ca yudu xti Diuxi. Laadu rinidu de guenda que rire gana ne guenda runni cree xtibe ne guira zixhe ni cuzabi nanda cabe laa. Laadu rinnidu de ca guenda naganna nilaatu rapatu guantar. ⁵ Ne ndi rihuni ni jneza runi Diuxi. Ni rudini la de que laatu saca tu tobi ni bibi ni zanda guiu ra runni mandar Diuxi, pur ni laatu racana tu. ⁶ Nachahui nga Diuxi ti gudxigueta be guenda nanna' ca ni raca ladxi ni', ⁷ Ne gusiandalu ca ni ma uca na' ngaca lannu. Labe zunibe ndi ora guihuini Señor Jesuscristo de lu guiba' ne ca Angel de lu guenda nandxo xtibe. ⁸ Ne lu belee nanda' labee zudxigueta be ca ni bini ca ni que runi biaca Diuxi ne ca ni que rucabi ca evangeliu xti Señor Jesuscristo. ⁹ Lacabe zaca nacabe lu guenda nanna ni que siu dxi guiluxe, zituu de ra lu Diuxi ne guenda' sicaru xti guenda' nandxo xtibe. ¹⁰ Labe zuni be ndi ora gueda nda dxi tgi gusisaca xpini be labe, ti guidxaga yaaca ni bini cree laabe. pue ca mni gunnidu jma binicretu ni'. ¹¹ Pur ndinga laadu ruzuxhibidu xha ñee Diuxi gati ga' pur laatu. Ne rinaba du de que Diuxi gapa laatu ni bibi ca ora ucabe ridxi laaca. Ruca du ridxi ti gaca guira ni racaladxi gaca ne xtobi ne guiraa guenda' runni cree ne guenda' nandxo. ¹² Ruzuxhibidu xha ñee Diuxi ti candi di gacani ne lu laa Señor Jesucristo ti ganda gusizaca tu labe. Rinabadu de que zaca'ca labe guzisacabe lannu, pur guenda' xti Diuxi xtinu ne Señor jesucristo.