¹ Amorreos tujjanewi Jordán mene juameto pepitsapea namuto jawa wetsina pe enaiwi yajawa canaenos tujjanewi Mediterráneo mene itapata pejinawonopaewi jumetane liweisi PETUJJANENU jjaneto Jordán mene petsewiepaejawa Israel tomara penikabinejjalia, jamatabu deideijei kujuna nejjata apo jamatabu nabejitsipae, Israel tomara yabara. ² Bajara pamatakabila PETUJJANENU Josué jumeitsi: "Iboo kusiupa nakuenabare dajjita pebijiwi Israelwi nebó upi koukubinejja." ³ Nejjata Josué iboo kusiupanu wertajeba dajjita Israel pebijiwi bo upi koukuba Aralot tsututatsia. ⁴ Barajjuota Josué bo upi koukuba: pebaru pütsapaewi pebijiwi Egipto werena najjuoba tajetabo jjanetota pepitsapaekuijinae Egipto. ⁵ Itsietajane barapamonae pebijiwi Egipto werena pepitsapaewiüpebo upikopia koukubiwitsi, pejewajji tajetabota penaejjanaewi apo bo upi kopia koukubitsi. ⁶ Israel tomara tajetabota cuarenta (40) paweu nubenapona nejjata dajjita jiwi, pwbaru nabewi pebaru pitsapaewi Egipto werena werewereka, apo jume liweisi yeyatae PETUJJANENU. PETUJJANENU kaeliweisi kuenia jumeitsi, apo pakatae ejjanaitsanetsi ira kaeliweisi kuenia tarajutsijawa panieja salineiwi, lechera bana pejjeina ira. ⁷ Bajara pamonae pejji, PETUJJANENU pekowuta núba, pamonae Josué bo upi koukuba, apo pe bo upi koukubijjaetsi namutua. ⁸ Pe bo upi koukubikuijinaetsi, pieja boo kuijiba pejumenejjalia. ⁹ PETUJJANENU jumeitsi Josué: "Mápa matakabi JJANU paka wekua pitatsi papeka urabijawa pajjamu Egipto." Barajjuota panakua nawunu jjeina Gilgal akonojjae jebi. ¹⁰ Israel tomara Gilgaljawata nubenaotjopa. Nakaituona baruyaya penajamatabuna notsinejja pakuenia Dioso juta Israel tomara Egipto wekua (Pascua) catorce (14) matakabita pejena jumetota, kaniwiyota, penajjanewaitsijawata Jericó wayapjota. ¹¹ Itsa matakabi jawabelia, penakaetuotsikuijinae, ira pijijawa jjane, pan levadura apo pejjenaijawa, petajatsi trigo kuey, ¹² Bajara pamatakabi ajibitsajuni maná peri, pejjae kuijinae ira piejawa. Maná peri to ajibitsibaja Israel, bajara paweita Canaán irapijijawa jjaewonopa. ¹³ Josué itsa imojjoyota Jericó, peitajjuto yotabaya nejjata taitaba, jiwitonu peitabarata; pieja kopeiwato kobena nuka. Imojjoyotabalia nejjata jumeitsi: "¿Panejamatabo jupame wajabitsoünumu?" ¹⁴ Bajara ponu jumeitsi: "Apoitsajiwiyo. Jjanu PETUJJANENU pieja ejército comandantenunu. Barajjuota najetarukajü."Nejjata Josué irata bokajunua bajara ponu peitabuta peyeyataenejja nejjata jumeilsi: "¿Itsa kuijirujawayo neitorobiename?" Pieja pienenunu. ¹⁵ Peitotobinu PETUJJANENU pieja ejército jumeitsi Josué: "Natajjü jonore nieja sandalia, maapa nakua jota nukame, Santo". Bajara pakuijiruta itsi Josué.