¹ Ta patil yu´un spisil to la jkil yan ch´ul abat te kotel ta ch´ulchane. Tulan yich´oj yat´el sok te balumilale xojoba ta yutsilal. ² Yak´ ta aw sok yip´ sk´op, yak ta yalel: "¡Ch´ayix, ch´ayix ko-el te muk´ul Babilonia! Melel Ja k´atbujix ta sna te pukujetike, anjibalix yu´un te espiritu-etik te ilabil sbaike sok anjibal yu´un spisil ta chajp´ mutetik te ilabil sbae sok te k´ax bolobenixe. ³ Melel spisil te muk´ikal pam lume yakubikix yu´un te svino te ja te beluk ilabil sba te k´ax smulanejike ta yak ta spasele. Te muk´ikal ajwaliletik yu´un te balumilale la spasikix te beluk k´ax ilabil sba soke. Te chombajeletik yu´un te balumilal k´atbujikix ta k´ulej yu´un ta swenta te bit´il kuxul ta mulile". ⁴ Jich la jkay stojol yan k´op ta ch´ulchan te yak ta yalel: "Lok´antel ta stojol lum jku´un, jich ma ajo-in ta spasel te muliletike sok ma awich´ik tenuk te wokolil ya xtal ta stojole. ⁵ Te smulike tsobolix k'otix ta k'alal ch´ulchan jich´ te Diose julix ta sjol te beluk ma lekuk la spasike. ⁶ Tojbeya sut´el jich´ te bit´il la spasbey te yantike sok k´axemtoxan ja tojbeya te bit´il la spasuke; te beluk la skap ta kopa-e, chexan me buelta ja kap´beya te bit´il la spase. ⁷ Jich te bit'il la yich sbaik ta muk' stukelike sok te xk'ulejal xkuxinelik, ak'beya k'axuk swokol sok ta uts'inel. Melel jich ya yal ta yot'an: "Te jo'one nakalon jich te bit'il antsil-ajwalil: maba mebajon, sok mayuk bin ora ya x-ok'on jtukel. ⁸ Jich yu'un ya sta sk'alel te xtaot te woklajele; lajel, mel ot'an sok winal. Sok yame yich' chik'el ta k'ak, melel te Kajwaltik Diose ay yu'el stukel sok Ja' ya slik te mulil". ⁹ Te muk'ul ajwaliletik ta balumilal te la spasik mulil te ilebil sba-e sok te ma la snaik stsajte bel sbaik ya me x-ok'ik sok k'axemto me ya snaik te k´alal ya yilik te xch'alel te beluk yak ta chik'ele. ¹⁰ Ja' k'ejelto ya xba stek'an sbaik, yu'un x-iel te woklajele, ya yalik: "¡Ya xtal swokol, ya xtal swokol ta stojol te muk'ul lum, Babilonia, ja' te lum te ay yipe! Melel ta jun nax ora jul te swokole". ¹¹ Te chonbajeletik yu´un te balumilale ok'ik sok k´axemtoxan la smel yot'anik yu'un, melel mayuk mach'a ya xmanbotix yu'un te sbiluke, ¹² biluketik te pasbil ta oro (k'anal tak'in), plata (sakil tak'in) lekikal ch'en, perlaetik, lino pak', púrpura, seda pak', tsajal pak' sok spisil te te'etik te xjuk'et nax yik'ik, te ju jun tsima bojch´ te pasbil ta marfil sok spisil tsima bojch´ te pasbil ta t´ujbil te, sok te bronce tak'in, sok ta hierro tak'in, marmoletik, ¹³ canela sbiil te x-uk'et sbujts'e, wamaletik te ay sbuts´e, pom, mirra, pom te yich´oj perfume, vino, aceite, harina te buen tsabilik, trigo, alak chambalamil sok tunim chijetik, kawuetik sok karroetik, sok te mosoetik sok nix te ants-winiketik. ¹⁴ Te sit te beluk amulane sok spisil awip´ bajt´ix ta atojol. Spisil te beluk t´ujbilik sok te beluk xtilik ch´ayix ba-el, yu´un mayuk bi ora ya yich´ tael ta yan buelta. ¹⁵ Te chonbajeletik yu'un te biluke k'ulinajik ta swentae jich ya sk´esbaik lok´el ta stojol ta namal yu´un te xi-el ta skaj te swokole, yak ta ok´el sok tulan yak ta wok´ajel. ¹⁶ Ja´ikme ya yalik: "Yame xtal swokol, yame xtal swokol te muk´ul lum te la yich´ lapel sk´u te pasbil ta lekil lino, te tsajal pak´e, te escarlatae, sok te ch´albil te oro-e, te ch´aljibalil te t´ujbilike sok te t´ujbikal tonetik te perla sbiile! ¹⁷ Ta jun nax ora spisil te sk´ulejalto ch´ay k´axel". Tulu tul te wolwanejetik yu´un te barkoetike, tulutul winik te yak ta at´el ta muk´ul ja´ sok spisilik te mach´atik staik swe-elik ta muk´ul ja´, k´ejelto la sk´ej sbaik. ¹⁸ Jaik te awunik te k´alal la yilik te xch´alel te yak´ ta k´ajk´ele. Jich´ la yalik: "¿Te bit´il te lum to ay bal jich´ yan?" ¹⁹ La me yak´ik ts´ubilum ta sjolik sok yakik ta aw, ta ok´el sok ta mel ot´an: "Yame xtal swokol, yame xtal swokol ta swenta te muk´ul lume te banti k´ulinajik te mach´atik ay sbarkoik ta muk´ul ja´. Ja´ukmeto ta junax ora la yich´ix jinel". ²⁰ "¡Busnajuk me awot´anik ta stojol, te jaex ayatik ta ch´ulchan, jaex te ch´unjelexe, jaex te wolwanejetik, chol k´opetik sok te alwanejetike, melel te Diose la yich´ixtel te kastigo ta stojol te ja ta awentaike. ²¹ Tul ch´ul abat te ay yipe la stsak bij ch´en, jich smuk´ul yilel te bit´il te xch´enul te cha-e sok ba jch´oj ta bay muk´ul ja´, jich la yal: "Jich´ ta ora to, Babilonia, te muk´ul lum, yame yich´ ch´ojel koel ta tulan sok mayuk bi ora ya yich´xan ilel. ²² Te sk´op te tij arpa-etike, te k´ayojetike, te tij amayetike sok te tij ok´esetike ma xchiknajix ta atojol. Te mach´a ya snaik sjalel bitik nax ma xchikna jix ta atojol. Janix jich ma xchiknajix ta atojol te sk´op te cha-e. ²³ Te x-ojobil te k´ajk´e mayuk bi ora xchiknajix ta atojol. Te sk´opik te nujb´inele mayuk bi ora xchiknaxan ta atojol, melel te chonbajeletik awu´une ja´ik mero ich´bilik ta muk ta balumilal, sok te muk´ul lumetik la yich´ik lolayel yu´un te yannax la apas te ts´ilewaneje. ²⁴ Ta stojol la yich´ix ta-el te xch´ich´el te alwanejetike sok te ch´unjeletike sok te xch´ich´elik te mach´atik la yich´ik milel ta balumilal.